അമേരിക്കൻ നയങ്ങളിലെ മാറ്റം കാനഡയ്ക്ക് വെല്ലുവിളി; ദേശീയ നയം പരിഷ്കരിക്കുമെന്ന് പ്രധാനമന്ത്രി മാർക്ക് കാർണി

ഒട്ടാവ : അമേരിക്കൻ സാമ്പത്തിക നയങ്ങളിൽ വന്ന മാറ്റങ്ങൾ കാനഡയുടെ വ്യാപാര മേഖലയ്ക്ക് വലിയ ഭീഷണിയാണെന്ന് പ്രധാനമന്ത്രി മാർക്ക് കാർണി അറിയിച്ചു. ഞായറാഴ്ച രാവിലെ രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. പ്രസിഡന്റ് ഡൊണാൾഡ് ട്രംപിന് കീഴിൽ അമേരിക്ക ഒരു സഖ്യകക്ഷിയേക്കാൾ സാമ്പത്തിക ശത്രുവിനെപ്പോലെയാണ് പെരുമാറുന്നതെന്ന് അദ്ദേഹം വിലയിരുത്തി. മുമ്പ് കാനഡയുടെ കരുത്തായിരുന്ന അമേരിക്കയുമായുള്ള അടുത്ത ബന്ധം ഇപ്പോൾ രാജ്യത്തിന്റെ ബലഹീനതയായി മാറിയിരിക്കുകയാണെന്നും ഇത് തിരുത്തേണ്ടത് അനിവാര്യമാണെന്നും പ്രധാനമന്ത്രി വ്യക്തമാക്കി. അമേരിക്കൻ തീരുവകൾ വർദ്ധിച്ചതോടെ കാനഡയിലെ ഓട്ടോമൊബൈൽ, സ്റ്റീൽ, തടി വ്യവസായങ്ങൾ കനത്ത ഭീഷണിയിലാണെന്നും കാർണി ചൂണ്ടിക്കാട്ടി.

അമേരിക്കയോടുള്ള അമിത ആശ്രിതത്വം കുറയ്ക്കുന്നതിനായി ‘കാനഡ സ്ട്രോങ്ങ്’ (Canada Strong) പദ്ധതി നടപ്പിലാക്കുമെന്ന് പ്രധാനമന്ത്രി പ്രഖ്യാപിച്ചു. പുതിയ വ്യാപാര-ഊർജ്ജ ഇടനാഴികൾ നിർമ്മിക്കുക, ശുദ്ധമായ ഊർജ്ജ ഉൽപ്പാദനം ഇരട്ടിയാക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ. വിഭജിക്കപ്പെട്ട ലോകസാഹചര്യത്തിൽ കാനഡ തങ്ങളുടെ അന്താരാഷ്ട്ര ബന്ധങ്ങൾ പുനർമൂല്യനിർണ്ണയം ചെയ്യണമെന്നും ദേശീയ തന്ത്രത്തിൽ മാറ്റം വരുത്തണമെന്നും അദ്ദേഹം ആവശ്യപ്പെട്ടു. 1812-ലെ യുദ്ധത്തിലെ നായകൻ മേജർ ജനറൽ സർ ഐസക് ബ്രോക്കിന്റെ പ്രതിമ ഉയർത്തിക്കാട്ടി, കാനഡ ഒത്തൊരുമയോടെ നിന്നാൽ ഏത് വലിയ വെല്ലുവിളിയെയും അതിജീവിക്കുമെന്ന് അദ്ദേഹം പറഞ്ഞു.

പ്രധാനമന്ത്രിയുടെ പ്രസ്താവനയ്ക്കെതിരെ രൂക്ഷമായ വിമർശനവുമായി പ്രതിപക്ഷ നേതാവ് പിയറി പൊയിലീവ് രംഗത്തെത്തി. രാജ്യത്തെ സാമ്പത്തിക പരാജയങ്ങളിൽ നിന്ന് ശ്രദ്ധ തിരിക്കാനുള്ള തന്ത്രമാണ് പ്രധാനമന്ത്രിയുടേതെന്ന് അദ്ദേഹം ആരോപിച്ചു. കാനഡയിൽ പണപ്പെരുപ്പവും കടബാധ്യതയും വർദ്ധിച്ചുവരികയാണെന്നും ജി7 രാജ്യങ്ങളിൽ ചുരുങ്ങിക്കൊണ്ടിരിക്കുന്ന ഏക സമ്പദ്‌വ്യവസ്ഥ കാനഡയുടേതാണെന്നും പൊയിലീവ് സോഷ്യൽ മീഡിയയിൽ കുറിച്ചു. മുൻ പ്രധാനമന്ത്രി ജസ്റ്റിൻ ട്രൂഡോയുടെ കാലത്തേക്കാൾ ഇരട്ടി കമ്മിയാണ് നിലവിലുള്ളതെന്നും അമേരിക്കയുമായുള്ള വ്യാപാര ബന്ധം തകരുന്നത് രാജ്യത്തിന് ഗുണകരമാകില്ലെന്നും അദ്ദേഹം കൂട്ടിച്ചേർത്തു.

ലിബറൽ സർക്കാരിന്റെ സാമ്പത്തിക തത്വശാസ്ത്രങ്ങൾ സാധാരണക്കാർക്ക് ഗുണകരമാകുന്നില്ലെന്ന് കൺസർവേറ്റീവ് ഡെപ്യൂട്ടി ലീഡർ മെലിസ ലാന്റ്സ്മാൻ വിമർശിച്ചു. കഴിഞ്ഞ ദശകത്തിൽ ഒരു ലക്ഷം കോടി ഡോളറിന്റെ നിക്ഷേപം രാജ്യത്തിന് നഷ്ടമായതായി അവർ അവകാശപ്പെട്ടു. പ്രധാനമന്ത്രിയുടെ പ്രസംഗങ്ങൾ കൊണ്ട് യാഥാർത്ഥ്യം മാറില്ലെന്നും വിപണിയിലെ വിലക്കയറ്റം തടയുകയാണ് സർക്കാർ ചെയ്യേണ്ടതെന്നും അവർ വ്യക്തമാക്കി. പാർലമെന്റ് നൽകിയ അസാധാരണ അധികാരങ്ങൾ ഉപയോഗിച്ച് കഴിഞ്ഞ ഒരു വർഷമായി സർക്കാർ ഒന്നും ചെയ്തിട്ടില്ലെന്നും ലാന്റ്സ്മാൻ ആരോപിച്ചു.

Canada faces challenge from changing US policies; Prime Minister Mark Carney says national policy will be revised

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt