ഓട്ടവ: കാനഡയിൽ ഇലക്ട്രിക് വാഹന, ബാറ്ററി നിർമ്മാണ മേഖലകളിൽ പ്രഖ്യാപിച്ച വൻകിട പദ്ധതികൾ വൈകുന്നതും റദ്ദാക്കപ്പെടുന്നതും രാജ്യത്തിന്റെ ഭാവി വാഹന നയങ്ങളെക്കുറിച്ചുള്ള ചർച്ചകൾക്ക് വഴിവെച്ചിരിക്കുകയാണ്. ഒന്റാരിയോ, ക്യുബെക്ക് എന്നിവിടങ്ങളിൽ ഫെഡറൽ -പ്രവിശ്യാ സർക്കാരുകൾ കോടിക്കണക്കിന് ഡോളർ നിക്ഷേപിച്ച പദ്ധതികളാണ് ഇപ്പോൾ തടസ്സം നേരിടുന്നത്. വിപണിയിൽ ഇലക്ട്രിക് വാഹനങ്ങൾക്ക് പ്രതീക്ഷിച്ചത്ര ആവശ്യക്കാരില്ലാത്തതാണ് ഈ പ്രതിസന്ധിക്ക് പ്രധാന കാരണം.
ഒന്റാരിയോയിലെ സെന്റ് തോമസിലുള്ള ഫോക്‌സ്‌വാഗണിന്റെ PowerCo ബാറ്ററി പ്ലാന്റിൽ ഉൽപ്പാദനം ആരംഭിക്കുന്നത് 2027-ൽ നിന്നും 2029-ലേക്ക് മാറ്റിവെച്ചു. വിപണിയിലെ തളർച്ച കാരണം പ്രതിവർഷം 10 ലക്ഷം വാഹനങ്ങൾക്കുള്ള ബാറ്ററി നിർമ്മിക്കാനുള്ള പദ്ധതിയാണ് നീണ്ടുപോകുന്നത്. ഫോക്‌സ്‌വാഗണിന്റെ പ്രധാന വാഹന നിർമ്മാണ കേന്ദ്രങ്ങൾ അമേരിക്കയിലും മെക്സിക്കോയിലുമായതിനാൽ, കാനഡയിൽ നിന്ന് ബാറ്ററികൾ അങ്ങോട്ട് എത്തിക്കാനുള്ള വലിയ യാത്രാച്ചെലവും പദ്ധതിക്ക് വെല്ലുവിളിയാകുന്നുണ്ട്.
എന്നാൽ പദ്ധതികൾ വൈകുന്നത് സർക്കാരിന്റെ സാമ്പത്തിക ബാധ്യത കുറയ്ക്കുമെന്നാണ് ഒരു വിഭാഗം വിദഗ്ധർ ചൂണ്ടിക്കാണിക്കുന്നത്. കമ്പനികൾ ഉൽപ്പാദിപ്പിക്കുന്ന ബാറ്ററികളുടെ എണ്ണം അനുസരിച്ചാണ് സർക്കാർ സബ്സിഡി നൽകുന്നത് എന്നതിനാൽ, ഉൽപ്പാദനം നീളുന്നതോടെ വാഗ്ദാനം ചെയ്ത വലിയ തുക ഉടൻ നൽകേണ്ടി വരില്ല. എങ്കിലും പ്ലാന്റിന്റെ നിർമ്മാണത്തിനായി ഇതുവരെ 700 മില്യൺ ഡോളറോളം സർക്കാർ അനുവദിച്ചു കഴിഞ്ഞു.
അതേസമയം, വിപണിയിലെ ഈ മന്ദഗതി താൽക്കാലികം മാത്രമാണെന്ന് പരിസ്ഥിതി-ഊർജ്ജ മേഖലയിലെ വിദഗ്ധർ അഭിപ്രായപ്പെടുന്നു. വരും ദശാബ്ദങ്ങളിൽ വാഹന വ്യവസായം പൂർണ്ണമായും ഇലക്ട്രിക് രീതിയിലേക്ക് തന്നെ മാറുമെന്നാണ് ഇവരുടെ വിലയിരുത്തൽ. സ്റ്റാറ്റിസ്റ്റിക്സ് കാനഡയുടെ കണക്കുകൾ പ്രകാരം പുതിയ വാഹന രജിസ്ട്രേഷനിൽ വർധനയുണ്ട്. കൂടാതെ, ഭാവിയിൽ ഊർജ്ജ സംഭരണ സംവിധാനങ്ങൾക്കും വലിയ തോതിൽ ബാറ്ററികൾ ആവശ്യമായി വരും.
Also Read: കാനഡ ഗ്രോസറീസ് ആന്റ് എസൻഷ്യൽസ് ബെനിഫിറ്റ്: നിങ്ങളും അർഹരാണോ? വിശദാംശങ്ങൾ അറിയാം
എന്നാൽ, വിപണിയിലെ യഥാർത്ഥ ആവശ്യകത പരിശോധിക്കാതെയാണ് സർക്കാരുകൾ വൻതോതിൽ പണം നിക്ഷേപിച്ചതെന്ന വിമർശനവും ശക്തമാണ്. പുതിയ വാഹന വിൽപ്പനയിൽ ഇലക്ട്രിക് വാഹനങ്ങളുടെ വിഹിതം പ്രതീക്ഷിച്ചത്ര ഉയരാത്തതിനെ തുടർന്ന്, ഫെഡറൽ സർക്കാർ തങ്ങളുടെ നിർബന്ധിത EV വിൽപ്പന ലക്ഷ്യങ്ങളിൽ മാറ്റം വരുത്താൻ നിർബന്ധിതരായിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
