ഒട്ടാവ :ഹരിതോർജ്ജ മേഖലയിൽ ചൈനയുമായി അടുക്കാൻ കാനഡ തന്ത്രപരമായ നീക്കങ്ങൾ നടത്തുന്നു. ചൈനീസ് ഇലക്ട്രിക് വാഹനങ്ങൾക്ക് പ്രവേശനാനുമതി നൽകിയത് വെറുമൊരു കച്ചവട വിട്ടുവീഴ്ചയല്ല, മറിച്ച് ഹരിത സാങ്കേതികവിദ്യയിൽ പങ്കാളിത്തം ഉറപ്പാക്കാനാണ്. കനേഡിയൻ പ്രധാനമന്ത്രി മാർക്ക് കാർണി ചൈനീസ് പ്രസിഡന്റ് ഷി ജിൻപിംഗുമായി കൂടിക്കാഴ്ച നടത്തിയിരുന്നു. ഇതിന് പിന്നാലെ വ്യവസായ മന്ത്രി മെലാനി ജോളി ബെയ്ജിംഗിലെത്തി മുൻനിര ചൈനീസ് ഇ.വി കമ്പനികളുമായി ചർച്ചകൾ നടത്തുകയും ചെയ്തു. നവംബറിൽ കാനഡയിൽ നിന്നുള്ള ഒരു ബിസിനസ് സംഘം ചൈന സന്ദർശിക്കാനും പദ്ധതിയുണ്ട്.
ലോകത്തെ ഭൂരിഭാഗം ഹരിതോർജ്ജ ഉൽപ്പന്നങ്ങളും നിർമ്മിക്കുന്നത് നിലവിൽ ചൈനയാണ്. സൗരോർജ്ജ പാനലുകളുടെ 80 ശതമാനവും കാറ്റാടിയന്ത്രങ്ങളുടെ 60 ശതമാനവും ഇലക്ട്രിക് വാഹന ബാറ്ററികളുടെ 75 ശതമാനവും ഉത്പാദിപ്പിക്കുന്നത് ചൈനയിലാണ്. ആഗോള വിപണിയിൽ ബി.വൈ.ഡി (BYD) ടെസ്ലയെപ്പോലും മറികടന്നത് ഈ മുന്നേറ്റത്തിന് കരുത്തേകി. ഇത്തരമൊരു സാഹചര്യത്തിലാണ് കാനഡയും ചൈനയുമായി കൈകോർക്കുന്നത്. ചൈനയുടെ ആധുനിക സാങ്കേതികവിദ്യയും കാനഡയിലുള്ള ധാതുശേഖരവും ഒന്നിക്കുന്നത് ഇരുരാജ്യങ്ങൾക്കും വലിയ നേട്ടമാകുമെന്ന് വിദഗ്ധരായ ബിജൻ അഹ്മദിയും മോ കബ്ബാരയും വ്യക്തമാക്കുന്നു.
80-കളിലും 90-കളിലും പാശ്ചാത്യ രാജ്യങ്ങളിൽ നിന്ന് ചൈന സാങ്കേതികവിദ്യയും വിവരങ്ങളും സ്വീകരിച്ചിരുന്ന സ്ഥാനത്ത്, ഇന്ന് ചൈനയിൽ നിന്ന് അത്യാധുനിക ബാറ്ററി സാങ്കേതികവിദ്യയും നിർമ്മാണ വൈദഗ്ധ്യവും സ്വായത്തമാക്കാൻ കാനഡയ്ക്ക് അവസരമൊരുങ്ങുകയാണ്. കാനഡയിലുള്ള കോപ്പർ, കൊബാൾട്ട്, ക്രോമിയം തുടങ്ങിയ അപൂർവ ധാതുശേഖരം ഉപയോഗിച്ച് ആഭ്യന്തര വിതരണ ശൃംഖല ശക്തമാക്കാൻ ഇതിലൂടെ സാധിക്കും. ഇതിന്റെ ഭാഗമായി നോവ സ്കോഷിയയിലെ സിഡ്നിയിൽ എൻവിഷൻ എനർജിയും കേപ് ബ്രെട്ടൺ ചൈന കോർപ്പും ചേർന്ന് ഹൈബ്രിഡ് കാറ്റാടി-ബാറ്ററി സംഭരണ പദ്ധതിയും പ്രഖ്യാപിച്ചിട്ടുണ്ട്.
അതേസമയം, വിലകുറഞ്ഞ ചൈനീസ് വാഹനങ്ങൾ പ്രാദേശിക വിപണിയെ ബാധിക്കുമോയെന്ന ആശങ്കയും സുരക്ഷാ-സ്വകാര്യതാ പ്രശ്നങ്ങളും ആഭ്യന്തര വാഹന നിർമ്മാതാക്കൾ ഉയർത്തുന്നുണ്ട്. എന്നാൽ ചൈനീസ് ഹാർഡ്വെയറുകളിൽ കനേഡിയൻ സോഫ്റ്റ്വെയറുകൾ ഉപയോഗിച്ച് സുരക്ഷാ ആശങ്കകൾ പരിഹരിക്കാനാകുമെന്ന് വിദഗ്ധർ വ്യക്തമാക്കുന്നു. ആഗോള കാലാവസ്ഥാ മാറ്റങ്ങളെ കാര്യക്ഷമമായും ചുരുങ്ങിയ ചെലവിലും നേരിടാൻ പ്രായോഗിക നയതന്ത്രമാണ് കാനഡ ഇപ്പോൾ സ്വീകരിക്കുന്നതെന്ന് ക്ലീൻ എനർജി കാനഡ എക്സിക്യൂട്ടീവ് ഡയറക്ടർ റേച്ചൽ ഡൊറാൻ അഭിപ്രായപ്പെട്ടു.
Canada and China join hands in green energy sector; crucial move in EV market
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
