ഓട്ടവ: രാജ്യത്ത് ഈ സീസണിലെ ആദ്യ -10 ഡിഗ്രി സെൽഷ്യസ് തണുപ്പ് രേഖപ്പെടുത്തിയതിന് പിന്നാലെ, ചില പ്രവിശ്യകളിൽ വേനൽച്ചൂട് വീണ്ടും ശക്തമാകുന്നു. മിക്ക പ്രധാന നഗരങ്ങളിലും സാധാരണയായി ഈ സമയത്ത് വേനൽക്കാലം അവസാനിക്കാറുണ്ടെങ്കിലും, സെപ്റ്റംബർ 18 മുതൽ 23 വരെയുള്ള ദിവസങ്ങളിൽ അന്തരീക്ഷ താപനില വീണ്ടും ഉയർന്നേക്കും. തെക്കൻ ബ്രിട്ടീഷ് കൊളംബിയയിലെ ലിറ്റൺ, കാംലൂപ്പ്സ്, ഒസോയൂസ്, ആഷ്ക്രോഫ്റ്റ് തുടങ്ങിയ പ്രദേശങ്ങളിലാണ് താപനില വീണ്ടും 30 ഡിഗ്രി സെൽഷ്യസിന് അടുത്തെത്താൻ സാധ്യതയെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. അമേരിക്കയിൽ രൂപപ്പെടുന്ന ഉഷ്ണ തരംഗത്തിന്റെ ആഘാതമാണ് കാനഡയിലും ചൂട് കൂടാൻ കാരണമാകുന്നത്.
ഈ വർഷം ഏപ്രിൽ 20-നാണ് ബ്രിട്ടീഷ് കൊളംബിയയിലെ ലിറ്റണിൽ കാനഡയിലെ ആദ്യ 30 ഡിഗ്രി ചൂട് രേഖപ്പെടുത്തിയത്. സാധാരണയായി എഡ്മിന്റൻ, വടക്കൻ ഒന്റാറിയോ, ക്യുബെക്ക് എന്നിവിടങ്ങളിൽ ഓഗസ്റ്റ് അവസാനത്തോടെയും, ടൊറന്റോയിൽ സെപ്റ്റംബർ പകുതിയോടെയും 30 ഡിഗ്രിക്ക് മുകളിലുള്ള ചൂട് അവസാനിക്കാറുണ്ട്. എന്നാൽ ശരത്കാലത്തും ചൂട് തിരിച്ചെത്തുന്ന പ്രവണത മുൻ വർഷങ്ങളിലും റിപ്പോർട്ട് ചെയ്തിട്ടുണ്ട്. 1924 ഒക്ടോബർ 25-ന് സസ്കാച്വാനിലെ മാപ്പിൾ ക്രീക്കിൽ രേഖപ്പെടുത്തിയ 30.6 ഡിഗ്രിയാണ് രാജ്യത്ത് ഏറ്റവും വൈകി രേഖപ്പെടുത്തിയ ഉയർന്ന താപനില.
Also Read: ഇനി ക്ലോക്ക് മാറ്റി സമയം കളയണ്ട: മാനിറ്റോബയിൽ സ്ഥിര ഡേലൈറ്റ് സേവിംഗ് ടൈം നടപ്പിലാക്കുന്നു
കഴിഞ്ഞ അഞ്ച് വർഷത്തിനിടെ നാല് തവണയും ഒക്ടോബർ മാസങ്ങളിൽ രാജ്യത്തിന്റെ വിവിധ ഭാഗങ്ങളിൽ 30 ഡിഗ്രിക്ക് മുകളിൽ ചൂട് അനുഭവപ്പെട്ടിട്ടുണ്ട്. 2025-ൽ ന്യൂ ബ്രൺസ്വിക്, 2023-ൽ ഒന്റാറിയോ, 2022-ൽ ബ്രിട്ടീഷ് കൊളംബിയ എന്നിവിടങ്ങളിൽ ഒക്ടോബറിലും ഉയർന്ന ചൂട് രേഖപ്പെടുത്തിയിരുന്നു. വരും ദിവസങ്ങളിൽ വീണ്ടും താപനില ഉയർന്നേക്കാമെങ്കിലും സെപ്റ്റംബർ അവസാനത്തോടെ രാജ്യത്തുടനീളം തണുപ്പ് ശക്തമാകുമെന്നാണ് പ്രതീക്ഷിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
