കാൽഗറി: കാൽഗറി നഗരത്തിൽ വസന്തകാലത്തെ അപ്രതീക്ഷിത മഞ്ഞുവീഴ്ചയെത്തുടർന്ന് ജനജീവിതം ദുസഹമാകുന്നു. ബുധനാഴ്ച വൈകുന്നേരത്തോടെ ആരംഭിച്ച മഴയും മഞ്ഞുവീഴ്ചയും നഗരത്തിലെ പ്രധാന പാതകളെ ഒന്നാകെ വഴുക്കലുള്ളതാക്കി മാറ്റി. രാത്രിയോടെ താപനില കുത്തനെ താഴ്ന്നത് സ്ഥിതിഗതികൾ കൂടുതൽ വഷളാക്കി. മഞ്ഞുവീഴ്ചയെത്തുടർന്ന് റോഡുകൾ ‘സ്കേറ്റിംഗ് റിങ്ക്’ പോലെയായെന്ന് ഡ്രൈവർമാർ സാക്ഷ്യപ്പെടുത്തുന്നു.
ബുധനാഴ്ച വൈകുന്നേരം 6 മണി മുതൽ അർദ്ധരാത്രി വരെ നഗരത്തിന്റെ വിവിധ ഭാഗങ്ങളിൽ നിരവധി വാഹനാപകടങ്ങളാണ് റിപ്പോർട്ട് ചെയ്തത്. പോലീസ് കണക്കുകൾ പ്രകാരം 30 അപകടങ്ങളിൽ ആർക്കും പരിക്കില്ലെങ്കിലും, പത്തോളം അപകടങ്ങളിൽ യാത്രക്കാർക്ക് പരിക്കേറ്റു. കൂടാതെ ഏഴ് ഹിറ്റ് ആൻഡ് റൺ കേസുകളും റിപ്പോർട്ട് ചെയ്തിട്ടുണ്ട്. നോർത്ത് ബൗണ്ട് ഡീർഫൂട്ട് ട്രയലിൽ ഗ്ലെൻമോർ ട്രയലിന് സമീപം പന്ത്രണ്ടോളം വാഹനങ്ങൾ ഒന്നിനുപുറകെ ഒന്നായി കൂട്ടിയിടിച്ചതിനെത്തുടർന്ന് ഗതാഗതം പൂർണ്ണമായും തടസ്സപ്പെട്ടു. അപകടത്തിൽ പരിക്കേറ്റവരുടെ നില ഗുരുതരമല്ലെന്നാണ് പ്രാഥമിക വിവരം.
റോഡുകളിലെ മഞ്ഞ് നീക്കം ചെയ്യുന്നതിനും ഗതാഗതം പുനഃസ്ഥാപിക്കുന്നതിനുമായി സിറ്റി അധികൃതർ രാത്രി മുഴുവൻ സജീവമായിരുന്നു. ഡീർഫൂട്ട്, സ്റ്റോണി, ക്രൗചൈൽഡ്, ഗ്ലെൻമോർ ട്രയലുകൾ തുടങ്ങിയ പ്രധാന പാതകളിലെ മഞ്ഞ് നീക്കം ചെയ്യുന്നതിനാണ് മുൻഗണന നൽകുന്നത്. നിലവിൽ മഞ്ഞ് നീക്കം ചെയ്യാനുള്ള മതിയായ സജ്ജീകരണങ്ങൾ നഗരഭരണകൂടത്തിന് ഉണ്ടെങ്കിലും താപനിലയിലെ വ്യതിയാനം വെല്ലുവിളിയായി തുടരുകയാണ്.
ഈ മഞ്ഞുവീഴ്ച ദീർഘനേരം നീണ്ടുനിൽക്കില്ലെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തലെങ്കിലും റോഡുകളിലെ അപകടസാധ്യത ഇപ്പോഴും നിലനിൽക്കുന്നുണ്ട്. പ്രത്യേകിച്ച് പാലങ്ങൾ, ഓവർപാസ്സുകൾ, എക്സിറ്റ് റാംപുകൾ എന്നിവിടങ്ങളിൽ കനത്ത വഴുക്കൽ അനുഭവപ്പെടാൻ സാധ്യതയുള്ളതിനാൽ വാഹനമോടിക്കുന്നവർ അതീവ ജാഗ്രത പാലിക്കണമെന്ന് സിറ്റി അധികൃതർ മുന്നറിയിപ്പ് നൽകി. രാവിലെ ജോലിക്ക് പോകുന്നവരും ദീർഘദൂര യാത്രക്കാരും റോഡിലെ സ്ഥിതിഗതികൾ വിലയിരുത്തിയ ശേഷം മാത്രം യാത്ര പുറപ്പെടണമെന്നും നിർദ്ദേശമുണ്ട്.
Calgary shivers in spring snow; Twelve vehicles collide in accident, caution issued
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
