കാൽഗറി: ജനങ്ങളുമായി എളുപ്പത്തിൽ ബന്ധപ്പെടാനും സുരക്ഷാ നിർദ്ദേശങ്ങൾ നൽകാനും കാൽഗറി പൊലീസ് ടിക്ടോക് സജീവമാകുന്നു. യുവതലമുറയിലേക്ക് ലളിതമായി സന്ദേശങ്ങൾ എത്തിക്കുക എന്ന ലക്ഷ്യത്തോടെയാണ് ഈ പ്രവർത്തനം. സ്കൂൾ റിസോഴ്സ് ഓഫീസർമാരെയും വിദഗ്ധരായ ജീവനക്കാരെയും ഉൾപ്പെടുത്തിയാണ് പൊലീസ് വീഡിയോകൾ തയ്യാറാക്കുന്നത്.
പൊതുജനങ്ങളുടെ സുരക്ഷ ഉറപ്പാക്കാനും കൃത്യമായ ബോധവൽക്കരണം നൽകാനുമാണ് പൊലീസ് ഇത്തരത്തിൽ വീഡിയോകൾ തയ്യാറാക്കുന്നത്. സഹപാഠികളോട് നല്ല രീതിയിൽ പെരുമാറേണ്ടതിന്റെ ആവശ്യകതയും പൊലീസ് യൂണിഫോമിനെക്കുറിച്ചുള്ള വിവരങ്ങളുമാണ് പ്രധാനമായും ഈ വീഡിയോകളിൽ ഉൾപ്പെടുത്തുന്നത്. ഇന്നത്തെ കുട്ടികളും യുവാക്കളും കൂടുതൽ സമയവും ഫോണിൽ ചെലവഴിക്കുന്നതിനാൽ, അവരിലേക്ക് സന്ദേശങ്ങൾ എത്തിക്കാൻ ഈ വഴി വളരെ ഫലപ്രദമാണെന്ന് പൊലീസ് ഉദ്യോഗസ്ഥർ പറയുന്നു.
നേരത്തെ കാൽഗറിയിൽ വെള്ളപ്പൊക്ക സമയത്താണ് പൊലീസ് സോഷ്യൽ മീഡിയ സാന്നിധ്യം ശക്തമാക്കിയത്. എന്നാൽ കാണാതാകുന്നവരെ കണ്ടെത്താനും അടിയന്തര വിവരങ്ങൾ തത്സമയം ജനങ്ങളിലേക്ക് എത്തിക്കാനും ഇപ്പോൾ ടിക്ടോക് വലിയ പങ്കുവഹിക്കുന്നുണ്ട്. പ്രതിസന്ധി ഘട്ടങ്ങളിൽ മുൻകൂട്ടി തയ്യാറാക്കിയ വീഡിയോകൾ മാറ്റി വെച്ച് പൊലീസ് ഇത്തരം വിഷയങ്ങൾക്ക് മുൻഗണന നൽകുന്നു.
കേവലം വിനോദം മാത്രമല്ല, കൃത്യമായ ബോധവൽക്കരണമാണ് ഓരോ പോസ്റ്റിന് പിന്നിലുമുള്ളതെന്ന് പൊലീസ് അധികൃതർ വ്യക്തമാക്കുന്നു. കൂടുതൽ ആളുകൾ സോഷ്യൽ മീഡിയയിൽ സമയം ചെലവഴിക്കുന്ന സാഹചര്യത്തിൽ വാർത്തകളും സുരക്ഷാ നിർദ്ദേശങ്ങളും ജനങ്ങളിൽ എളുപ്പത്തിൽ എത്തിക്കാൻ ഈ ഔദ്യോഗിക പ്ലാറ്റ്ഫോം സഹായിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
