ടൊറന്റോ: ഒടുവിൽ ആ ഭാഗ്യം കാനഡയിലെ ഒരു കുടിയേറ്റക്കാരായ കുടുംബത്തെ തേടിയെത്തി, അതും ചരിത്രത്തിലാദ്യമായി ഒരു സഹോദരനും സഹോദരിക്കും ഒന്നിച്ച്! ടൊറന്റോയിൽ താമസിക്കുന്ന ജോനാഥനും സഹോദരി മൈലീനുമാണ് മാർച്ചിൽ നടന്ന ‘ലോട്ടോ മാക്സ്’ നറുക്കെടുപ്പിലൂടെ 75 മില്യൺ കനേഡിയൻ ഡോളർ സ്വന്തമാക്കിയത്. ഒന്റാറിയോ ലോട്ടറി ചരിത്രത്തിൽ ആദ്യമായാണ് സഹോദരങ്ങൾ ഒന്നിച്ച് ഇത്രയും വലിയൊരു ജാക്ക്പോട്ട് നേടുന്നത്. കഴിഞ്ഞ രണ്ട് വർഷമായി ഇരുവരും ചേർന്നാണ് ലോട്ടറി എടുത്തിരുന്നത്. തങ്ങളുടെ ജീവിതവുമായി ബന്ധപ്പെട്ട ചില പ്രത്യേക നമ്പറുകളാണ് ഇവർ സ്ഥിരമായി തിരഞ്ഞെടുത്തിരുന്നത്.
രാവിലെ ഉറക്കമുണർന്നയുടൻ ഒ.എൽ.ജി (OLG) ആപ്പിൽ ലോട്ടറി ഫലം പരിശോധിച്ച ജോനാഥൻ ആദ്യം കരുതിയത് തങ്ങൾക്ക് 75,000 ഡോളറാണ് അടിച്ചതെന്നാണ്. “ഉറക്കം തൂങ്ങി നിന്ന കണ്ണുകളോടെയാണ് ഞാൻ ആദ്യം ഫലം നോക്കിയത്. 75,000 ഡോളർ അടിച്ചെന്നാണ് കരുതിയത്. എന്നാൽ കണ്ണട എടുത്ത് വെച്ച് സൂക്ഷിച്ചു നോക്കിയപ്പോഴാണ് ഒടുവിലുള്ള പൂജ്യങ്ങളുടെ എണ്ണം കൂടിയത് ശ്രദ്ധയിൽ പെട്ടത്! എനിക്ക് സന്തോഷം അടക്കാനായില്ല,” ജോനാഥൻ പറഞ്ഞു.
ഉടൻ തന്നെ ജോനാഥൻ സഹോദരി മൈലീനെ വിളിച്ചുണർത്തി വിവരം അറിയിച്ചു. മൈലീനും ആദ്യം കരുതിയത് 75,000 ഡോളർ ആണെന്നാണ്. എന്നാൽ പൂജ്യങ്ങൾ എണ്ണി നോക്കാൻ സഹോദരൻ പറഞ്ഞപ്പോഴാണ് 75 മില്യൺ ഡോളറിന്റെ മഹാഭാഗ്യമാണ് തങ്ങളെ തേടിയെത്തിയതെന്ന് മൈലീൻ തിരിച്ചറിഞ്ഞത്. ഇതോടെ സന്തോഷം കൊണ്ട് മൈലീൻ കരഞ്ഞുപോയി.
തുടക്കത്തിൽ ഈ വാർത്ത വിശ്വസിക്കാൻ ജോനാഥന്റെ ഭാര്യ തയ്യാറായില്ല. മുൻപും തമാശകൾ ഒപ്പിക്കാറുള്ളതുകൊണ്ട് ഭാര്യ ഇത് വെറുമൊരു തമാശയായി തള്ളിക്കളഞ്ഞു. പിന്നീട് സഹോദരി മൈലീനും ചേർന്ന് ലോട്ടറി ടിക്കറ്റ് കാണിച്ചപ്പോഴാണ് ഭാര്യയ്ക്ക് കാര്യം മനസ്സിലായതും അവർ വികാരാധീനയായതും.
ഒരു മെച്ചപ്പെട്ട ജീവിതം സ്വപ്നം കണ്ടാണ് തങ്ങൾ കാനഡയിലേക്ക് കുടിയേറിയതെന്ന് ജോനാഥൻ പറയുന്നു. ഈ തുക കൊണ്ട് കുടുംബത്തിന് ഒന്നിച്ച് താമസിക്കാൻ വലിയൊരു വീട് നിർമ്മിക്കണമെന്നാണ് ഇരുവരുടെയും ആഗ്രഹം. കുട്ടികളുടെ മികച്ച വിദ്യാഭ്യാസത്തിനും ഈ പണം വിനിയോഗിക്കും. കൂടാതെ, തന്റെ ജന്മനാട്ടിൽ ഒരു ചെറിയ ചാപ്പൽ പണിയണമെന്നും മറ്റുള്ളവരെ സഹായിക്കാൻ ഈ തുക ഉപയോഗിക്കണമെന്നും ജോനാഥൻ ആഗ്രഹിക്കുന്നു.
വീടുകൾ വൃത്തിയാക്കുന്ന ജോലിയായിരുന്നു മൈലീന്. “ഞാൻ ഇതുവരെ മറ്റുള്ളവരുടെ മനോഹരമായ വീടുകൾ വൃത്തിയാക്കിയാണ് ജീവിച്ചിരുന്നത്. ഇനി എനിക്ക് എന്റെ സ്വന്തം മനോഹരമായ വീട് വൃത്തിയാക്കാം. എന്റെ ഹൃദയം സന്തോഷം കൊണ്ട് നിറഞ്ഞിരിക്കുകയാണ്,” മൈലീൻ പറഞ്ഞു. ലോട്ടറി അടിച്ച സന്തോഷത്തിൽ ജർമ്മനി, ഓസ്ട്രിയ, ജപ്പാൻ തുടങ്ങിയ രാജ്യങ്ങളിലേക്ക് കുടുംബസമേതം ഒരു യാത്ര പോകാനും ഇവർ പദ്ധതിയിടുന്നുണ്ട്. നോർത്ത് യോർക്കിലെ ‘ഡ്രൂറിസ് വെറൈറ്റി’ എന്ന കടയിൽ നിന്നാണ് ഇവർ ഭാഗ്യ ടിക്കറ്റ് വാങ്ങിയത്.
Brother and sister from Toronto score $75M Lotto Max prize together
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
