ബില്ലി ബിഷപ്പ് വിമാനത്താവള വികസനം: ഒന്റാറിയോ സർക്കാരിന്റെ പദ്ധതി തടഞ്ഞ് കനേഡിയൻ ഫെഡറൽ സർക്കാർ

ടൊറന്റോ: ടൊറന്റോയിലെ ബില്ലി ബിഷപ്പ് വിമാനത്താവളം വികസിപ്പിക്കാനുള്ള ഒന്റാറിയോ പ്രവിശ്യാ സർക്കാരിന്റെ പദ്ധതി ഫെഡറൽ സർക്കാർ തടഞ്ഞതായി റിപ്പോർട്ട്. നിർദ്ദിഷ്ട വികസനവുമായി ബന്ധപ്പെട്ട് ട്രാൻസ്പോർട്ട് കാനഡ നടത്തിയ സർവേയിൽ പ്രദേശവാസികളിൽ നിന്ന് 87,000-ത്തിലധികം പ്രതികരണങ്ങൾ ലഭിച്ചതിനെത്തുടർന്നാണ് ഈ തീരുമാനമെന്ന് കേന്ദ്ര ഗതാഗത മന്ത്രി സ്റ്റീവൻ മക്കിന്നൻ വ്യക്തമാക്കി. നിലവിൽ വിമാനത്താവളത്തിൽ സുരക്ഷിതമായ പ്രവർത്തനങ്ങൾ ഉറപ്പാക്കുന്നതിന് ആവശ്യമായ സുരക്ഷാ മെച്ചപ്പെടുത്തലുകളിൽ മാത്രമാണ് ശ്രദ്ധ കേന്ദ്രീകരിക്കുന്നതെന്ന് എക്സ് പ്ലാറ്റ്‌ഫോമിലെ കുറിപ്പിലൂടെ അദ്ദേഹം അറിയിച്ചു.

വാട്ടർഫ്രണ്ട് വിമാനത്താവളത്തിൽ നിന്ന് ജെറ്റ് വിമാനങ്ങൾക്ക് സർവീസ് നടത്താൻ സാധിക്കുന്ന രീതിയിൽ റൺവേ ദീർഘിപ്പിക്കാനാണ് വികസന പദ്ധതി ലക്ഷ്യമിട്ടിരുന്നത്. കഴിഞ്ഞ മാർച്ച് മാസത്തിലാണ് ഒന്റാറിയോ പ്രീമിയർ ഡഗ് ഫോർഡ് വിമാനത്താവള വികസന പദ്ധതി പ്രഖ്യാപിച്ചത്. വിമാനത്താവളത്തിന്റെ പ്രവർത്തനം നടത്തുന്ന ഫെഡറൽ ഏജൻസിയായ ടൊറന്റോ പോർട്ട് അതോറിറ്റിയുടെ പിന്തുണയോടെയായിരുന്നു പ്രഖ്യാപനം. തുടർന്ന് വിമാനത്താവള ഭൂമിയിൽ നഗരസഭയ്ക്കുള്ള അധികാരം ഇല്ലാതാക്കുന്ന നിയമനിർമ്മാണം പ്രവിശ്യാ സർക്കാർ പാസാക്കിയിരുന്നു.

കേന്ദ്ര സർക്കാരിന്റെ തീരുമാനത്തെ സ്വാഗതം ചെയ്ത ടൊറന്റോ മേയർ ഒലീവിയ ചൗ, ജനങ്ങളുടെ ശബ്ദം കേട്ടതിന് പ്രധാനമന്ത്രിക്കും ഗതാഗത മന്ത്രിക്കും നന്ദി അറിയിച്ചു. വികസന പദ്ധതി ഉപേക്ഷിച്ച സാഹചര്യത്തിൽ പ്രവിശ്യാ സർക്കാർ നഗരസഭയുടെ ഭൂമി തിരികെ നൽകണമെന്നും അവർ ആവശ്യപ്പെട്ടു. പദ്ധതി പ്രഖ്യാപിച്ച സമയത്ത് ഇത് അധികാര ദുർവിനിയോഗമാണെന്ന് ആരോപിച്ച് ഒലീവിയ ചൗ നിയമനടപടി സ്വീകരിക്കുമെന്ന് മുന്നറിയിപ്പ് നൽകിയിരുന്നു. നേരത്തെ 2015-ലും വിമാനത്താവളം വികസിപ്പിക്കാനുള്ള നിർദ്ദേശം അന്നത്തെ ജസ്റ്റിൻ ട്രൂഡോ സർക്കാർ തള്ളിക്കളഞ്ഞിരുന്നതായും റിപ്പോർട്ടുണ്ട്.

അതേസമയം, ബില്ലി ബിഷപ്പ് വിമാനത്താവളത്തിന്റെ വികസന ശ്രമങ്ങളുമായി മുന്നോട്ടുപോകുമെന്ന് ഒന്റാറിയോ ഗതാഗത മന്ത്രി പ്രഭ്മീത് സിങ് സർക്കാരിയ പ്രസ്താവനയിലൂടെ വ്യക്തമാക്കി. ഈ പദ്ധതി നടപ്പിലാകുന്നതിലൂടെ രാജ്യത്തിന്റെ സമ്പദ്‌വ്യവസ്ഥയിലേക്ക് പ്രതിവർഷം 8.5 ബില്യൺ ഡോളർ വരെ സംഭാവന ചെയ്യാനും ആയിരക്കണക്കിന് തൊഴിലവസരങ്ങൾ സൃഷ്ടിക്കാനും സാധിക്കുമെന്ന് അദ്ദേഹം വിലയിരുത്തി. യാത്രക്കാർക്കും വ്യവസായങ്ങൾക്കും തമ്മിലുള്ള ബന്ധം കൂടുതൽ മെച്ചപ്പെടുത്താൻ പദ്ധതി ഉപകരിക്കുമെന്നും അദ്ദേഹം കൂട്ടിച്ചേർത്തു.

Billy Bishop Airport Development: Canadian federal government blocks Ontario government’s plan

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt