ഒട്ടാവ : കഴിഞ്ഞ വാരാന്ത്യത്തിൽ ജർമ്മനിയിലെ ബർലിനിൽ നടന്ന ‘പ്രൈഡ്’ ആഘോഷത്തിനിടെയുണ്ടായ ആക്രമണത്തിന്റെ പശ്ചാത്തലത്തിൽ, നഗരത്തിലെ 2SLGBTQ+ സമൂഹത്തിന്റെ സുരക്ഷ ഉറപ്പാക്കാൻ നടപടികൾ സ്വീകരിച്ചതായി ഒട്ടാവ പോലീസ് സർവീസ് അറിയിച്ചു. ബർലിൻ ആക്രമണത്തിൽ ഒരാൾ കൊല്ലപ്പെടുകയും 29 പേർക്ക് പരിക്കേൽക്കുകയും ചെയ്തിരുന്നു. ഒട്ടാവയിൽ വരാനിരിക്കുന്ന വാർഷിക ആഘോഷങ്ങൾക്ക് മുന്നോടിയായി സുരക്ഷയും മുൻകരുതലുകളും വർദ്ധിപ്പിക്കുമെന്ന് പോലീസ് വാർത്താക്കുറിപ്പിൽ വ്യക്തമാക്കി.
ആഗസ്റ്റ് 22 മുതൽ 30 വരെയാണ് ഓട്ടവയിൽ ‘ക്യാപിറ്റൽ പ്രൈഡ്’ സമ്മർ ഫെസ്റ്റിവലും പരേഡും സംഘടിപ്പിക്കുന്നത്. ആഘോഷങ്ങൾ നടക്കുന്ന പ്രധാന കേന്ദ്രങ്ങളിൽ പോലീസിന്റെ സാന്നിധ്യം വർദ്ധിപ്പിക്കുമെന്നും കമ്മ്യൂണിറ്റി പങ്കാളികളുമായി ചേർന്ന് സുരക്ഷ ഉറപ്പാക്കുമെന്നും പോലീസ് അറിയിച്ചു. അക്രമ സംഭവങ്ങൾ ഉയർന്നുവരുന്ന സാഹചര്യത്തിൽ ജനങ്ങളുടെ ഭീതി അകറ്റാനും സുരക്ഷിതത്വം ഉറപ്പാക്കാനുമാണ് ഈ നടപടിയെന്നും അധികൃതർ കൂട്ടിച്ചേർത്തു.
ബർലിൻ സംഭവത്തിന്റെ പശ്ചാത്തലത്തിൽ നിലവിലുള്ള സുരക്ഷാ ക്രമീകരണങ്ങൾ പുനഃപരിശോധിക്കുമെന്ന് ക്യാപിറ്റൽ പ്രൈഡ് എക്സിക്യൂട്ടീവ് ഡയറക്ടർ കാളി മെറ്റ്ലർ വ്യക്തമാക്കി. സുരക്ഷാ കാര്യങ്ങളുമായി ബന്ധപ്പെട്ട് ക്യാപിറ്റൽ പ്രൈഡ് ഭാരവാഹികൾ ഓട്ടവ പോലീസുമായി ചർച്ച നടത്തിയിട്ടുണ്ട്. കൂടുതൽ പോലീസ് സേനയെ വിന്യസിക്കുന്ന കാര്യത്തിൽ വരും ദിവസങ്ങളിൽ കൂടുതൽ യോഗങ്ങൾ ചേരുമെന്നും സംഘാടകർ അറിയിച്ചു.
സ്വകാര്യ സുരക്ഷാ ജീവനക്കാരെ കൂടാതെ ഗതാഗത നിയന്ത്രണങ്ങൾക്കായി പോലീസിന്റെ സേവനവും ക്യാപിറ്റൽ പ്രൈഡ് ഉറപ്പാക്കുന്നുണ്ട്. ആക്രമണ ഭീഷണികൾ നിലനിൽക്കുന്നുണ്ടെങ്കിലും പരിപാടികൾ സുരക്ഷിതമായി തന്നെ നടക്കുമെന്ന് സോമർസെറ്റ് വാർഡ് കൗൺസിലർ അരിയൽ ട്രോസ്റ്റർ അറിയിച്ചു. വിദ്വേഷ പ്രചാരണങ്ങൾക്കെതിരെ ഒരുമിച്ച് നിൽക്കണമെന്നും അവർ ആഹ്വാനം ചെയ്തു.
Berlin attack: Ottawa police to beef up security for ‘Pride’ parade
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
