ന്യൂഡല്‍ഹി: അജിത് അഗാര്‍ക്കറുടെ കാലാവധി അവസാനിച്ചതിന് പിന്നാലെ പുതിയ ചീഫ് സെലക്ടറെ കണ്ടെത്താനുള്ള നടപടികള്‍ ബിസിസിഐ ആരംഭിച്ചു. 2023 ജൂലൈയിലാണ് അഗാര്‍ക്കര്‍ സീനിയര്‍ പുരുഷ സെലക്ഷന്‍ കമ്മിറ്റി ചെയര്‍മാനായി ചുമതലയേറ്റത്. അദ്ദേഹത്തിന്റെ കാലയളവില്‍ ഇന്ത്യ 2024, 2026 ടി20 ലോകകപ്പുകളും 2025 ചാമ്പ്യന്‍സ് ട്രോഫിയും നേടി. 2023 ഏകദിന ലോകകപ്പ് ഫൈനലിലും ഇന്ത്യ എത്തിയിരുന്നു. അഗാര്‍ക്കറുടെ സംഭാവനകളെ ബിസിസിഐയും പരിശീലകന്‍ ഗൗതം ഗംഭീറും പ്രത്യേകം അഭിനന്ദിച്ചിരുന്നു.
ഇന്ത്യന്‍ ക്രിക്കറ്റ് ടീമിന്റെ തെരഞ്ഞെടുപ്പില്‍ നിര്‍ണായക പങ്കുള്ള സ്ഥാനമാണ് ചീഫ് സെലക്ടറുടേത്. ബിസിസിഐയുടെ സീനിയര്‍ പുരുഷ സെലക്ഷന്‍ കമ്മിറ്റിയുടെ ചെയര്‍പേഴ്സണായാണ് ചീഫ് സെലക്ടര്‍ പ്രവര്‍ത്തിക്കുന്നത്. ടെസ്റ്റ്, ഏകദിനം, ടി20 ഉള്‍പ്പെടെ വിവിധ ഫോര്‍മാറ്റുകളിലേക്കുള്ള ഇന്ത്യന്‍ ടീമിനെ തെരഞ്ഞെടുക്കുകയാണ് സെലക്ഷന്‍ കമ്മിറ്റിയുടെ പ്രധാന ചുമതല.
ചീഫ് സെലക്ടര്‍ ഒറ്റയ്ക്കല്ല തീരുമാനമെടുക്കുന്നത്. കമ്മിറ്റിയിലെ മറ്റ് അംഗങ്ങളുമായി ചേര്‍ന്നാണ് ടീമിനെ തെരഞ്ഞെടുക്കുന്നത്. മികച്ച താരങ്ങളെ കണ്ടെത്തുന്നതിനൊപ്പം ശക്തമായ ബെഞ്ച് സ്‌ട്രെങ്ത് ഒരുക്കുന്നതും കമ്മിറ്റിയുടെ ചുമതലയാണ്. ആഭ്യന്തര, അന്താരാഷ്ട്ര മത്സരങ്ങള്‍ നിരീക്ഷിച്ച് താരങ്ങളുടെ പ്രകടനം വിലയിരുത്തുകയും ടീമിന്റെ ആവശ്യങ്ങള്‍ക്കനുസരിച്ച് പുതിയ പ്രതിഭകളെ കണ്ടെത്തുകയും ചെയ്യും.
ALSO READ: അജിത് അഗാര്‍ക്കറിന് ബിസിസിഐയുടെ നന്ദി; മൂന്ന് വര്‍ഷത്തെ കാലാവധി അവസാനിച്ചു
താരങ്ങളെ തെരഞ്ഞെടുക്കുന്നതിന് പുറമെ ടീമുകളുടെ പ്രകടനം വിലയിരുത്തുന്നതും സെലക്ഷന്‍ കമ്മിറ്റിയുടെ ഭാഗമാണ്. ക്യാപ്റ്റനെ തെരഞ്ഞെടുക്കുന്നതും കമ്മിറ്റിയുടെ ഉത്തരവാദിത്വങ്ങളില്‍ ഉള്‍പ്പെടുന്നു. എന്നാല്‍ മത്സരത്തിനിടയിലെ തന്ത്രപരമായ തീരുമാനങ്ങള്‍ ചീഫ് സെലക്ടറുടെ ചുമതലയല്ല. താരങ്ങളെ തെരഞ്ഞെടുക്കുന്നതിലും ടീമിന്റെ ദീര്‍ഘകാല ഘടന ഒരുക്കുന്നതിലുമാണ് പ്രധാന ശ്രദ്ധ.
ചീഫ് സെലക്ടര്‍ സ്ഥാനത്തേക്ക് എത്താന്‍ ബിസിസിഐ നിശ്ചിത യോഗ്യതകളും മുന്നോട്ടുവയ്ക്കുന്നുണ്ട്. കുറഞ്ഞത് ഏഴ് ടെസ്റ്റ് മത്സരങ്ങള്‍, അല്ലെങ്കില്‍ 30 ഫസ്റ്റ് ക്ലാസ് മത്സരങ്ങള്‍, അല്ലെങ്കില്‍ 10 ഏകദിനങ്ങളും 20 ഫസ്റ്റ് ക്ലാസ് മത്സരങ്ങളും കളിച്ചിരിക്കണം. കൂടാതെ ക്രിക്കറ്റില്‍ നിന്ന് വിരമിച്ച് കുറഞ്ഞത് അഞ്ച് വര്‍ഷം കഴിഞ്ഞിരിക്കണം. ബിസിസിഐയുടെ ഏതെങ്കിലും ക്രിക്കറ്റ് കമ്മിറ്റിയില്‍ ആകെ അഞ്ച് വര്‍ഷം അംഗമായിരുന്നവര്‍ക്കും ഈ സ്ഥാനത്തേക്ക് യോഗ്യതയില്ല.
ഉദാഹരണത്തിന്, സജീവമായി ക്രിക്കറ്റ് കളിക്കുന്ന രവീന്ദ്ര ജഡേജയ്ക്ക് ഇപ്പോള്‍ ചീഫ് സെലക്ടര്‍ സ്ഥാനത്തേക്ക് അപേക്ഷിക്കാനാകില്ല. 2024 ടി20 ലോകകപ്പിന് ശേഷം അദ്ദേഹം ടി20 അന്താരാഷ്ട്ര ക്രിക്കറ്റില്‍ നിന്ന് വിരമിച്ചെങ്കിലും ടെസ്റ്റ്, ഏകദിന ഫോര്‍മാറ്റുകളിലും ഐപിഎല്ലിലും തുടരുകയാണ്. എല്ലാ ക്രിക്കറ്റില്‍നിന്നും വിരമിച്ച് അഞ്ച് വര്‍ഷം പൂര്‍ത്തിയാക്കാത്തതിനാല്‍ നിലവിലെ ബിസിസിഐ മാനദണ്ഡപ്രകാരം അദ്ദേഹം യോഗ്യനല്ല.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
‘BCCI Chief Selector Role’
