വാൻകൂവർ: ബ്രിട്ടീഷ് കൊളംബിയയിൽ 2025-ലെ കാട്ടുതീ സീസണിൽ 8,864 ചതുരശ്ര കിലോമീറ്റർ ഭൂമി കത്തിനശിച്ചതായി മിനിസ്റ്ററി ഓഫ് ഫോറസ്ററ് പ്രസ്താവനയിലൂടെ അറിയിച്ചു. ഏപ്രിൽ ഒന്നു മുതൽ ബിസിയിൽ 1,350-ലധികം തീപിടുത്തങ്ങളാണ് റിപ്പോർട്ട് ചെയ്തത്. റെക്കോർഡ് നാശനഷ്ടങ്ങൾ രേഖപ്പെടുത്തിയ 2023-ലെ സാഹചര്യവുമായി താരതമ്യം ചെയ്യുമ്പോൾ ഈ വർഷത്തെ നാശനഷ്ടം ഏകദേശം മൂന്നിലൊന്ന് മാത്രമാണെന്ന് മന്ത്രാലയം വ്യക്തമാക്കി.
കഴിഞ്ഞ പത്ത് വർഷത്തെ ശരാശരിയായ 8,500 ചതുരശ്ര കിലോമീറ്ററിന് അടുത്താണ് ഈ വർഷത്തെ കണക്കുകൾ. 2024-ൽ 10,811 ചതുരശ്ര കിലോമീറ്ററും, എക്കാലത്തെയും ഉയർന്ന നിരക്ക് രേഖപ്പെടുത്തിയ 2023-ൽ 28,400 ചതുരശ്ര കിലോമീറ്ററും വനമേഖലയാണ് അഗ്നിക്കിരയായത്. 2023-ൽ 2,293 തീപിടുത്തങ്ങളാണ് സംസ്ഥാനത്ത് ആകെ റിപ്പോർട്ട് ചെയ്തിരുന്നത്.
കാട്ടുതീയെത്തുടർന്ന് ഈ വർഷം 2,600 പ്രോപ്പർട്ടികൾ ഉൾപ്പെടുന്ന 42 എവാക്യുവേഷൻ ഓർഡറുകൾ പുറപ്പെടുവിച്ചു. കഴിഞ്ഞ വർഷം 51 ഉത്തരവുകളും 2023-ൽ 208 ഉത്തരവുകളുമാണ് ഉണ്ടായിരുന്നത്. മുൻവർഷങ്ങളെ അപേക്ഷിച്ച് തീപിടുത്തങ്ങളുടെ എണ്ണം കുറവാണെങ്കിലും, ഇത് പ്രവിശ്യയിലെ താമസക്കാരെ സാരമായി ബാധിച്ചുവെന്ന് അധികൃതർ ചൂണ്ടിക്കാട്ടി.
കാലാവസ്ഥാ വ്യതിയാനത്തിന്റെ ആഘാതം ജനജീവിതത്തെ വല്ലാതെ ബാധിക്കുന്നുണ്ടെന്നും ഇത്തരം അടിയന്തര സാഹചര്യങ്ങളെ നേരിടാൻ മുൻകരുതൽ നടപടികൾ സ്വീകരിക്കണമെന്നും എമർജൻസി മാനേജ്മെന്റ് മന്ത്രി കെല്ലി ഗ്രീൻ പറഞ്ഞു. കമ്മ്യൂണിറ്റികൾക്ക് ആവശ്യമായ വിഭവങ്ങളും പിന്തുണയും ഉറപ്പാക്കുന്നതിലാണ് പ്രവിശ്യാ ഭരണകൂടം ശ്രദ്ധ കേന്ദ്രീകരിക്കുന്നതെന്നും അവർ കൂട്ടിച്ചേർത്തു.
കാനഡയിലെ ഏറ്റവും മോശപ്പെട്ട രണ്ടാമത്തെ കാട്ടുതീ സീസണായിരുന്നു 2025-ലേതെന്ന് വനം മന്ത്രി രവി പാർമർ വിലയിരുത്തി. ബി.സി വൈൽഡ് ഫയർ സർവീസിലെ അംഗങ്ങളെ ഇത്തവണ മറ്റ് കനേഡിയൻ പ്രദേശങ്ങളിലേക്ക് വലിയ തോതിൽ വിന്യസിച്ചതായും അദ്ദേഹം അറിയിച്ചു. സാങ്കേതികവിദ്യയിലും പരിശീലനത്തിലും ബി.സി വൈൽഡ് ഫയർ സർവീസ് ആഗോളതലത്തിൽ മുൻപന്തിയിലാണെന്നും മന്ത്രി വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
BC wildfires: Report says 8,800 square kilometers of forest destroyed this year
