ഫ്ലോറൻസ്: ലോകപ്രശസ്തമായ ചരിത്രസ്മാരകങ്ങൾക്കും കലാരൂപങ്ങൾക്കും പേരു കേട്ട ഇറ്റലിയിലെ ഫ്ലോറൻസിൽ വിനോദസഞ്ചാരിയുടെ അതിക്രമം. പതിനാറാം നൂറ്റാണ്ടിൽ നിർമ്മിച്ച ‘ഫൗണ്ടൻ ഓഫ് നെപ്റ്റ്യൂൺ’ (Fountain of Neptune) എന്ന സ്മാരകത്തിന് മുകളിൽ കയറി കേടുപാടുകൾ വരുത്തിയ 28 വയസ്സുകാരിയായ യുവതിക്കെതിരെ അധികൃതർ നടപടിയെടുത്തു. ബാച്ചിലററ്റ് പാർട്ടിക്കിടെ (Bachelorette Party) സുഹൃത്തുക്കൾ നൽകിയ വെല്ലുവിളി ഏറ്റെടുക്കുന്നതിനിടയിലാണ് സ്മാരകത്തിന് ലക്ഷക്കണക്കിന് രൂപയുടെ നാശനഷ്ടം സംഭവിച്ചത്.
കഴിഞ്ഞ ശനിയാഴ്ച ഫ്ലോറൻസിലെ പ്രധാന നഗരചത്വരമായ പിയാസ ഡെല്ല സിഗ്നോറിയയിലായിരുന്നു സംഭവം. ജലധാരയ്ക്ക് ചുറ്റുമുള്ള സുരക്ഷാ വേലി ചാടിക്കടന്ന യുവതി, പ്രതിമയുടെ കുതിരകളുടെ കാലുകളിൽ ചവിട്ടിയാണ് മുകളിലേക്ക് കയറിയത്. സ്മാരകത്തിലെ നെപ്റ്റ്യൂൺ പ്രതിമയെ സ്പർശിക്കുക എന്നതായിരുന്നു ഇവരുടെ ലക്ഷ്യമെന്ന് പോലീസ് പറഞ്ഞു. വെള്ളത്തിൽ ഇറങ്ങാതെ പ്രതിമയുടെ ഭാഗങ്ങളിൽ ചവിട്ടി കയറാൻ ശ്രമിച്ചതാണ് ശില്പത്തിന് കേടുപാടുകൾ സംഭവിക്കാൻ കാരണമായത്. ഏകദേശം 5000 യൂറോയുടെ (ഏകദേശം 5 ലക്ഷത്തോളം രൂപ) നാശനഷ്ടം സ്മാരകത്തിന് സംഭവിച്ചതായാണ് പ്രാഥമിക കണക്ക്.
ഫ്ലോറൻസ് പ്രഭുവായിരുന്ന കോസിമോ ഒന്നാമൻ ഡി മെഡിസിയുടെ നിർദ്ദേശപ്രകാരം 1559-ലാണ് ഈ ജലധാര നിർമ്മിച്ചത്. റോമൻ സമുദ്രദേവനായ നെപ്റ്റ്യൂൺ കുതിരകൾ വലിക്കുന്ന രഥത്തിൽ നിൽക്കുന്ന രൂപത്തിലാണ് ഈ ശില്പം കൊത്തിയെടുത്തിരിക്കുന്നത്. യുവതിയുടെ അശ്രദ്ധമായ നീക്കത്തിനിടയിൽ പ്രതിമയുടെ കുതിരയുടെ കാലുകൾക്കും വശങ്ങളിലെ കൊത്തുപണികൾക്കും (Frieze) വിള്ളലുകൾ സംഭവിച്ചതായി വിദഗ്ധ പരിശോധനയിൽ കണ്ടെത്തി. സംഭവസ്ഥലത്തുണ്ടായിരുന്ന പോലീസ് ഉദ്യോഗസ്ഥർ ഉടൻ തന്നെ യുവതിയെ പ്രതിമയിൽ നിന്നും താഴെയിറക്കുകയും കസ്റ്റഡിയിലെടുക്കുകയും ചെയ്തു.
കലാരൂപത്തെ വികൃതമാക്കിയതിനും ചരിത്രസ്മാരകത്തിന് നാശം വരുത്തിയതിനും യുവതിക്കെതിരെ നിയമനടപടികൾ ആരംഭിച്ചിട്ടുണ്ട്. ഫ്ലോറൻസിലെ ഈ ചരിത്രസ്മാരകത്തിന് നേരെ വിനോദസഞ്ചാരികളുടെ ഭാഗത്തുനിന്നുണ്ടാകുന്ന ആദ്യത്തെ അതിക്രമമല്ലിത്. 2023-ലും ജർമ്മൻ സ്വദേശിയായ യുവാവ് സമാനമായ രീതിയിൽ പ്രതിമയിൽ കയറി നാശനഷ്ടങ്ങൾ വരുത്തിയിരുന്നു. 2005-ൽ ഒരാൾ സ്മാരകത്തിൽ കയറി പ്രതിമയുടെ കൈ ഒടിച്ചതിനെത്തുടർന്ന് ഇവിടെ നിരീക്ഷണ ക്യാമറകൾ സ്ഥാപിച്ചിരുന്നെങ്കിലും ഇത്തരം പ്രവണതകൾ ആവർത്തിക്കുന്നത് അധികൃതരെ ആശങ്കയിലാക്കുന്നുണ്ട്. വരും ദിവസങ്ങളിൽ സ്മാരകങ്ങളുടെ സുരക്ഷ കർശനമാക്കാനാണ് നഗരസഭയുടെ തീരുമാനം.
'Bachelorette party' goes too far; 16th century wonder destroyed due to carelessness, tourist arrested
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
