സെന്റ് ജോൺസ്: നഴ്സിംഗ് ഏജൻസിയിലെ ക്രമക്കേടുകൾ അന്വേഷിച്ച റിപ്പോർട്ട് ഉടൻ പുറത്തുവരും. ന്യൂഫൗണ്ട്‌ലാൻഡ് ആൻഡ് ലാബ്രഡോറിലെ ആരോഗ്യമേഖലയിൽ താൽക്കാലിക നഴ്സിംഗ് സേവനങ്ങൾ നൽകുന്ന സ്വകാര്യ ഏജൻസിക്കെതിരായ സാമ്പത്തിക ക്രമക്കേട് സംബന്ധിച്ച ഓഡിറ്റ് റിപ്പോർട്ട് ഉടൻ സമർപ്പിക്കുമെന്ന് എൻ.എൽ ഹെൽത്ത് സർവീസസ് സി.ഇ.ഒ ഡോ. പാറ്റ് പാർഫ്രെ അറിയിച്ചു.
പ്രവിശ്യയിലെ ഓഡിറ്റർ ജനറൽ നടത്തിയ പരിശോധനയിൽ ഒരു സ്വകാര്യ ട്രാവൽ നഴ്സിംഗ് ഏജൻസി സമർപ്പിച്ച ഇൻവോയ്‌സുകളിൽ ക്രമക്കേടുകൾ നടന്നതായി കണ്ടെത്തിയതിനെത്തുടർന്നാണ് വിശദമായ അന്വേഷണം പ്രഖ്യാപിച്ചത്. ഓഡിറ്റർ ജനറലിന്റെ റിപ്പോർട്ടിൽ ‘ഏജൻസി എ’ എന്ന് രേഖപ്പെടുത്തിയിട്ടുള്ള ഈ സ്ഥാപനം, താൽക്കാലിക നഴ്സുമാരെ വിട്ടുനൽകിയതുമായി ബന്ധപ്പെട്ട് ബില്ലുകളിൽ തട്ടിപ്പ് നടത്തിയെന്ന ശക്തമായ സൂചനകളാണ് നേരത്തെ പുറത്തുവന്നത്.
ഓഡിറ്റർ ജനറലിന്റെ കണ്ടെത്തലുകളുടെ അടിസ്ഥാനത്തിൽ ഇൻവോയ്‌സുകളും പണമിടപാടുകളും സൂക്ഷ്മമായി പരിശോധിക്കാൻ ഡെലോയിറ്റ് കാനഡ (Deloitte Canada) എന്ന ഏജൻസിയെയാണ് ഹെൽത്ത് സർവീസസ് ചുമതലപ്പെടുത്തിയിരിക്കുന്നത്. ഈ ഒക്ടോബറിൽ ഓഡിറ്റ് പൂർത്തിയാക്കാൻ ലക്ഷ്യമിട്ടിരുന്നെങ്കിലും സമഗ്രമായ വിലയിരുത്തൽ ഉറപ്പാക്കുന്നതിനായി സമയക്രമത്തിൽ മാറ്റം വരുത്തുകയായിരുന്നു.
പരിശോധന പൂർത്തിയാക്കിയ ശേഷമുള്ള അന്തിമ റിപ്പോർട്ട് തനിക്ക് ഉടൻ ലഭിക്കുമെന്ന് പ്രതീക്ഷിക്കുന്നതായും എന്നാൽ ഈ റിപ്പോർട്ട് പരസ്യപ്പെടുത്തണമോ എന്ന കാര്യത്തിൽ പ്രവിശ്യാ സർക്കാരാണ് തീരുമാനമെടുക്കേണ്ടതെന്നും ഡോ. പാർഫ്രെ ഒരു അഭിമുഖത്തിൽ വ്യക്തമാക്കി.
ആരോഗ്യമേഖലയിലെ ജീവനക്കാരുടെ ക്ഷാമം പരിഹരിക്കാനായി കരാറടിസ്ഥാനത്തിൽ നഴ്സുമാരെ നിയമിക്കുന്ന പ്രക്രിയയിൽ വൻതോതിൽ പൊതുപണം ദുരുപയോഗം ചെയ്യപ്പെട്ടതായാണ് പ്രാഥമിക വിലയിരുത്തൽ. ഇൻവോയ്‌സുകളിലെ പൊരുത്തക്കേടുകൾ സംബന്ധിച്ച ആദ്യ മുന്നറിയിപ്പ് നൽകിയത് ഓഡിറ്റർ ജനറലായിരുന്നു.
നിലവിൽ ഡെലോയിറ്റിന്റെ റിപ്പോർട്ടിനായി കാത്തിരിക്കുകയാണെന്നും റിപ്പോർട്ട് ലഭിക്കുന്ന മുറയ്ക്ക് ഗവൺമെന്റ് തുടർനടപടികൾ സ്വീകരിക്കുമെന്നും അധികൃതർ അറിയിച്ചു. സ്വകാര്യ ഏജൻസികളുമായുള്ള ഭാവിയിലെ കരാറുകൾക്കും അന്വേഷണ റിപ്പോർട്ടിലെ കണ്ടെത്തലുകൾ നിർണ്ണായകമാകും.
audit-coming-on-travel-nurse-firm-flagged-for-possible-fraud-says-nl-health-ceo
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
