കൊച്ചി: മലയാള സിനിമയിലെ യുവതാരങ്ങളായ ബേസിൽ ജോസഫ്, ടൊവിനോ തോമസ്, വിനീത് ശ്രീനിവാസൻ എന്നിവർ ഒന്നിക്കുന്ന മൾട്ടി സ്റ്റാർ ചിത്രം ‘അതിരടി’യുടെ ഫസ്റ്റ് ലുക്ക് പോസ്റ്റർ പുറത്തുവിട്ടു. നവാഗതനായ അരുൺ അനിരുദ്ധൻ സംവിധാനം ചെയ്യുന്ന ചിത്രം മെയ് 14-ന് ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും. കാമ്പസ് പശ്ചാത്തലമാക്കി ഒരുക്കുന്ന ഒരു മാസ് കോമഡി ആക്ഷൻ എന്റർടെയ്നറാണ് ഈ ചിത്രം.
നടിമാരായ റിയ ഷിബു, സരിൻ ഷിഹാബ് എന്നിവരും പ്രധാന വേഷങ്ങളിലെത്തുന്ന ചിത്രത്തിൽ ഗംഭീര മേക്കോവറിലാണ് താരങ്ങൾ പ്രത്യക്ഷപ്പെടുന്നത്. കോളേജ് വിദ്യാർത്ഥിയായ സാം ബോയിയെ ബേസിൽ അവതരിപ്പിക്കുമ്പോൾ, ഗായകനായ ശ്രീക്കുട്ടൻ വെള്ളായണിയായി ടൊവിനോ എത്തുന്നു. ഡോ. അനന്തു എന്റർടൈൻമെന്റ്സും ബേസിൽ ജോസഫ് എന്റർടൈൻമെന്റ്സും ചേർന്നാണ് ചിത്രം നിർമ്മിക്കുന്നത്. സമീർ താഹിറും ടൊവിനോ തോമസും ചിത്രത്തിന്റെ സഹനിർമ്മാതാക്കളാണ്.
മിന്നൽ മുരളി എന്ന ചിത്രത്തിന് ശേഷം ബേസിൽ ജോസഫും ടൊവിനോ തോമസും ഒന്നിക്കുന്നു എന്ന പ്രത്യേകതയും അതിരടിക്കുണ്ട്. ബേസിൽ ജോസഫ് ആദ്യമായി നിർമ്മാണ പങ്കാളിയാകുന്ന ചിത്രം കൂടിയാണിത്. വിഷ്ണു വിജയ് സംഗീതവും സാമുവൽ ഹെൻറി ഛായാഗ്രഹണവും നിർവ്വഹിക്കുന്ന ചിത്രം മലയാളത്തിന് പുറമെ തമിഴ്, തെലുങ്ക്, കന്നഡ ഭാഷകളിലും പുറത്തിറങ്ങും. അവധിക്കാലത്ത് എല്ലാത്തരം പ്രേക്ഷകർക്കും ആസ്വദിക്കാവുന്ന രീതിയിലാണ് അണിയറപ്രവർത്തകർ ചിത്രം ഒരുക്കിയിരിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Minnal Murali team up again, along with Vineeth Sreenivasan: 'Athirady' first look poster released; film to hit theatres on May 14
