ഒട്ടാവ: സ്മിത്ത്സ് ഫാൾസിന് സമീപമുള്ള കെല്ലി ജോർഡൻ റോഡിലെ വസ്തുവിൽ നിന്ന് കണ്ടെത്തിയ മനുഷ്യാവശിഷ്ടങ്ങൾ നാലുവർഷമായി കാണാതായ ലോറൻസ് ബെർട്രിം (44)ന്റേതാണെന്ന് ഒന്റാറിയോ പ്രൊവിൻഷ്യൽ പൊലീസ് സ്ഥിരീകരിച്ചു. 2022 സെപ്റ്റംബർ 30നാണ് ബെർട്രിമിനെ സ്മിത്ത്സ് ഫാൾസ് ഡൗൺടൗണിൽ അവസാനമായി കണ്ടത്. ആഗസ്റ്റ് 6നാണ് പൊലീസ് മൃതദേഹം കണ്ടെത്തിയത്. മരണകാരണം വ്യക്തമല്ലെന്നും കേസിൽ ഇതുവരെ ആരെയും അറസ്റ്റ് ചെയ്യുകയോ കുറ്റം ചുമത്തുകയോ ചെയ്തിട്ടില്ലെന്നും പൊലീസ് അറിയിച്ചു.
ഇതേ വസ്തുവിൽ നിന്ന് മനുഷ്യാവശിഷ്ടങ്ങൾ കണ്ടെത്തുന്നത് ഇത് മൂന്നാം തവണയാണ്. ജൂലൈ 20ന് മോണ്ടേഗ് ടൗൺഷിപ്പിൽ നിന്നുള്ള 75കാരനായ റോബർട്ട് ലാംബർട്ടിന്റെയും കഴിഞ്ഞ ഒക്ടോബറിൽ 2023ൽ കാണാതായ സ്മിത്ത്സ് ഫാൾസ് സ്വദേശിയായ 34കാരൻ റോബി തോംസണിന്റെയും മൃതദേഹങ്ങൾ ഇവിടെ നിന്ന് കണ്ടെത്തിയിരുന്നു. തോംസണിന്റെ മരണവുമായി ബന്ധപ്പെട്ട് നാല് പേർ അറസ്റ്റിലായിട്ടുണ്ട്; മൂന്ന് പേർക്കെതിരെ ഫസ്റ്റ് ഡിഗ്രി കൊലക്കുറ്റമാണ് ചുമത്തിയിരിക്കുന്നത്. ലാംബർട്ടിന്റെ മരണകാരണം ഇതുവരെ കണ്ടെത്തിയിട്ടില്ല.
READ MORE ; യു.എസ് നികുതി വ്യവസ്ഥയുമായി പൊരുത്തപ്പെടേണ്ടി വരും; വ്യാപാര നയങ്ങളിൽ പ്രതികരണവുമായി ക്യുബെക്ക് പ്രീമിയർ
2023 നവംബറിൽ നാലാമത്തെ കാണാതായ വ്യക്തിയായ സ്റ്റീവൻ ടേറ്റിനെയും ഈ വസ്തുവിന് സമീപമുള്ള ഹൈവേ 15ൽ മരിച്ച നിലയിൽ കണ്ടെത്തിയിരുന്നു. ഹിറ്റ് ആൻഡ് റൺ സംഭവത്തിലാണ് ടേറ്റ് മരിച്ചതെന്നാണ് പൊലീസിന്റെ നിഗമനം. ബെർട്രിമിനെ കണ്ടെത്തുന്നതിനായി 2025 മേയിൽ പൊലീസ് 50,000 ഡോളർ പാരിതോഷികം പ്രഖ്യാപിച്ചിരുന്നു. പുതിയ കണ്ടെത്തൽ അന്വേഷണത്തിൽ നിർണായക പുരോഗതിയാണെങ്കിലും അന്വേഷണം തുടരുകയാണെന്നും കെല്ലി ജോർഡൻ റോഡിൽ പൊലീസ് സാന്നിധ്യം തുടരുമെന്നും OPP അറിയിച്ചു. ഒട്ടാവയിൽ നിന്ന് ഏകദേശം 80 കിലോമീറ്റർ അകലെയാണ് ഈ പ്രദേശം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
