ബെയ്ജിങ്: ലോകമെമ്പാടുമുള്ള യുവ ശാസ്ത്രജ്ഞരെയും സാങ്കേതിക വിദഗ്ധരെയും തങ്ങളുടെ രാജ്യത്തേക്ക് ആകർഷിക്കാനായി ചൈന പുതിയൊരു വിസ പദ്ധതിക്ക് തുടക്കമിട്ടു. “കെ വിസ” എന്ന് പേരിട്ടിരിക്കുന്ന ഈ വിസ, പ്രത്യേകിച്ച് ശാസ്ത്രം, സാങ്കേതികവിദ്യ, എഞ്ചിനീയറിങ്, ഗണിതം തുടങ്ങിയ മേഖലകളിലെ (STEM) യുവപ്രൊഫഷണലുകൾക്ക് വേണ്ടിയുള്ളതാണ്. അമേരിക്കയടക്കമുള്ള രാജ്യങ്ങൾ വിദേശ തൊഴിലാളികൾക്ക് കടുത്ത നിയന്ത്രണങ്ങൾ ഏർപ്പെടുത്തുന്ന സമയത്താണ് ചൈനയുടെ ഈ നീക്കം എന്നത് ശ്രദ്ധേയമാണ്.
സെപ്റ്റംബർ 22, 2025-ന് ചൈനീസ് സ്റ്റേറ്റ് കൗൺസിൽ പുറത്തിറക്കിയ പുതിയ നിയമം അനുസരിച്ച്, ഒക്ടോബർ 1 മുതൽ ഈ വിസ പ്രാബല്യത്തിൽ വരും. വിദേശികളുടെ പ്രവേശനവും താമസവും സംബന്ധിച്ച നിയമങ്ങളിൽ വരുത്തിയ പ്രധാന ഭേദഗതിയാണിത്. ഇതുവരെ ചൈനയിൽ പഠനം, ജോലി, ബിസിനസ് തുടങ്ങിയ ആവശ്യങ്ങൾക്കായി 12 തരം വിസകളായിരുന്നു ഉണ്ടായിരുന്നത്. പുതിയ കെ വിസയുടെ വരവോടെ ഇത് 13 ആയി ഉയർന്നു.
അമേരിക്കയിൽ വിദേശ തൊഴിലാളികൾക്കുള്ള എച്ച്-1ബി വിസയ്ക്ക് അടുത്തിടെ ഫീസ് കുത്തനെ കൂട്ടിയിരുന്നു. ഒരു വർഷത്തേക്ക് ഒരു ലക്ഷം ഡോളർ വരെ ഫീസ് ഏർപ്പെടുത്തിയ ട്രംപ് ഭരണകൂടത്തിന്റെ നീക്കം, ഇന്ത്യയടക്കമുള്ള രാജ്യങ്ങളിൽ നിന്നുള്ള ആയിരക്കണക്കിന് പ്രൊഫഷണലുകളെ ആശങ്കയിലാക്കിയിരുന്നു. ഈ സാഹചര്യത്തിൽ, അമേരിക്കയിൽ അവസരം കുറയുമെന്ന് ഭയക്കുന്ന പ്രൊഫഷണലുകൾക്ക് പുതിയൊരു വഴി തുറന്നു കൊടുക്കുകയാണ് ചൈന.
പുതിയ കെ വിസയുടെ ഏറ്റവും വലിയ പ്രത്യേകത, ഇതിന് ചൈനയിലെ ഒരു കമ്പനിയുടെ സ്പോൺസർഷിപ്പ് ആവശ്യമില്ല എന്നതാണ്. സാധാരണഗതിയിൽ, വിദേശികൾക്ക് ചൈനയിൽ ജോലി ചെയ്യണമെങ്കിൽ അവിടുത്തെ ഒരു കമ്പനി ജോലി വാഗ്ദാനം ചെയ്യുകയും അതിനുള്ള രേഖകൾ സമർപ്പിക്കുകയും വേണം. എന്നാൽ കെ വിസക്ക് അപേക്ഷിക്കാൻ അത്തരം കടമ്പകളൊന്നും ഇല്ല.
പകരം, അപേക്ഷകരുടെ പ്രായം, വിദ്യാഭ്യാസ യോഗ്യത, തൊഴിൽ പരിചയം എന്നിവ മാത്രമാണ് പരിഗണിക്കുന്നത്. വിദ്യാഭ്യാസം, ഗവേഷണം, അക്കാദമിക് എക്സ്ചേഞ്ച് എന്നിവയിലെല്ലാം കെ വിസക്കാർക്ക് കൂടുതൽ സ്വാതന്ത്ര്യം ലഭിക്കും. ഒരു ബാച്ചിലർ ബിരുദമോ അതിനു മുകളിലുള്ള യോഗ്യതയോ ഉള്ള ആർക്കും ഈ വിസയ്ക്ക് അപേക്ഷിക്കാം. നിലവിലുള്ള വിസകളെ അപേക്ഷിച്ച് കൂടുതൽ കാലം ചൈനയിൽ താമസിക്കാനും പലതവണ രാജ്യത്തേക്ക് വരാനും ഈ വിസ അവസരം നൽകുന്നു.
ലോകത്തിലെ മിടുക്കരായ യുവാക്കളെ ആകർഷിച്ച് സാങ്കേതിക മേഖലയിലെ തങ്ങളുടെ ശക്തി വർദ്ധിപ്പിക്കുകയാണ് ചൈനയുടെ ലക്ഷ്യം. ചൈനയുടെ ഈ നീക്കം ഇന്ത്യയടക്കമുള്ള രാജ്യങ്ങളിലെ യുവപ്രൊഫഷണലുകൾക്ക് പുതിയ പ്രതീക്ഷ നൽകിയിട്ടുണ്ട്. അമേരിക്കൻ വിസ ലഭിക്കാൻ ബുദ്ധിമുട്ടുന്ന ആയിരക്കണക്കിന് പ്രതിഭകൾക്ക് ചൈന ഒരു പുതിയ തൊഴിൽ കേന്ദ്രമായി മാറിയേക്കാം.
ഈ വിസ വഴി സ്റ്റാർട്ടപ്പുകൾ ആരംഭിക്കാനും ഗവേഷണ പ്രവർത്തനങ്ങളിൽ ഏർപ്പെടാനും സാധിക്കും. ലോകസാമ്പത്തിക രംഗത്തെ ഒരു പ്രധാന ശക്തിയായി വളരുന്ന ചൈനയുടെ ഈ നീക്കം ആഗോള തലത്തിൽ വലിയ മാറ്റങ്ങൾക്ക് കാരണമായേക്കുമെന്നാണ് വിദഗ്ദ്ധർ വിലയിരുത്തുന്നത്.
America got the job; China with 'K' visa; coming after these workers!
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
