കാട്ടുതീ പുക പടരുന്നു: ഹാമിൽട്ടണിലും നയാഗ്രയിലും വായു ഗുണനിലവാരം അതീവ ഗുരുതരത്തിലേക്ക്

ഹാമിൽട്ടൺ: വടക്കുപടിഞ്ഞാറൻ ഒന്റാറിയോയിൽ പടരുന്ന കാട്ടുതീയെത്തുടർന്ന് ഹാമിൽട്ടൺ, ബ്രാൻ്റ്ഫോർഡ്, നയാഗ്ര മേഖലകളിൽ വായു ഗുണനിലവാരം അതീവ ഗുരുതരമാകുന്നു. കാട്ടുതീയിൽ നിന്നുള്ള പുക തെക്കൻ ഒന്റാറിയോയിലേക്ക് വ്യാപിച്ചതോടെയാണ് എൻവയോൺമെന്റ് കാനഡ ഈ പ്രദേശങ്ങളിൽ കനത്ത ജാഗ്രതാ നിർദ്ദേശം പുറപ്പെടുവിച്ചത്. ബുധനാഴ്ചയോടെ വായു ഗുണനിലവാര സൂചിക (AQHI) ഏറ്റവും അപകടകരമായ ’10+’ എന്ന നിലയിലെത്തുമെന്നാണ് കാലാവസ്ഥാ നിരീക്ഷകർ പ്രവചിക്കുന്നത്. കനത്ത പുകയും ചൂടും കാരണം അന്തരീക്ഷം പൂർണ്ണമായും പുകമൂടിയ നിലയിലാണ്. കാഴ്ചപരിധി കുറഞ്ഞത് ഗതാഗതത്തെയും ബാധിച്ചിട്ടുണ്ട്. വടക്കൻ ഒന്റാറിയോയിൽ പടരുന്ന നൂറിലധികം കാട്ടുതീകൾ നിയന്ത്രണവിധേയമാക്കാൻ സാധിക്കാത്ത സാഹചര്യത്തിൽ പല പ്രദേശങ്ങളിൽ നിന്നും ആളുകളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു വരികയാണ്.

കനത്ത പുകമൂടൽ കാരണം പ്രായവ്യത്യാസമില്ലാതെ എല്ലാവർക്കും ആരോഗ്യപ്രശ്നങ്ങൾക്ക് സാധ്യതയുണ്ടെന്ന് ആരോഗ്യവകുപ്പ് മുന്നറിയിപ്പ് നൽകുന്നു. പ്രത്യേകിച്ച് മുതിർന്ന പൗരന്മാർ, ഗർഭിണികൾ, കുട്ടികൾ, ശ്വാസകോശ രോഗമുള്ളവർ എന്നിവർ കൂടുതൽ ജാഗ്രത പാലിക്കണം. ആളുകൾ അനാവശ്യമായി പുറത്തിറങ്ങരുതെന്നും ജനലുകളും വാതിലുകളും അടച്ചിട്ട് വീടുകൾക്കുള്ളിൽ തന്നെ കഴിയണമെന്നും അധികൃതർ നിർദ്ദേശിച്ചു. അത്യാവശ്യ കാര്യങ്ങൾക്കായി പുറത്തിറങ്ങുന്നവർ മാസ്ക് കൃത്യമായി ധരിക്കണം. പുക ശ്വസിക്കുന്നത് വഴി തലവേദന, കണ്ണ് ചൊറിച്ചിൽ, ചുമ എന്നിവ ഉണ്ടാകാം. ശ്വാസതടസ്സമോ നെഞ്ചുവേദനയോ അനുഭവപ്പെട്ടാൽ ഉടൻ തന്നെ ചികിത്സ തേടണമെന്നും നിർദ്ദേശമുണ്ട്. വെള്ളിയാഴ്ച രാവിലെയോടെ മാത്രമേ വായു ഗുണനിലവാരത്തിൽ നേരിയ പുരോഗതി ഉണ്ടാകൂ എന്നാണ് നിലവിലെ കണക്കുകൂട്ടൽ.

മോശം വായുവിന് പുറമെ ഹാമിൽട്ടൺ ഉൾപ്പെടെയുള്ള നഗരങ്ങളിൽ കടുത്ത ചൂടും അനുഭവപ്പെടുന്നുണ്ട്. താപനില 30 ഡിഗ്രി സെൽഷ്യസിലേക്ക് ഉയരുമ്പോൾ അനുഭവപ്പെടുന്ന ചൂട് 39 ഡിഗ്രി വരെയാകാൻ സാധ്യതയുള്ളതിനാൽ ഇവിടെ ചൂട് മുന്നറിയിപ്പ് ദീർഘിപ്പിച്ചു. കടുത്ത ചൂടിനെ പ്രതിരോധിക്കാൻ നഗരസഭയുടെ നേതൃത്വത്തിൽ വിവിധയിടങ്ങളിൽ പ്രത്യേക തണൽ കേന്ദ്രങ്ങൾ ഒരുക്കിയിട്ടുണ്ട്. പൊതുജനങ്ങൾക്ക് ചൂടിൽ നിന്ന് ആശ്വാസം ലഭിക്കുന്നതിനായി നഗരത്തിലെ നീന്തൽക്കുളങ്ങളിൽ നിശ്ചിത സമയങ്ങളിൽ സൗജന്യമായി പ്രവേശനം അനുവദിക്കുമെന്നും നഗരസഭാ അധികൃതർ അറിയിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Wildfire smoke spreading: Air quality in Hamilton and Niagara has reached critical levels.