ഇന്ത്യയിലെ ചെറുകിട, ഇടത്തരം ബിസിനസ് സംരംഭങ്ങളെ സഹായിക്കുന്നതിനായി വാട്സ്ആപ്പിൽ ‘ബിസിനസ് എഐ’ എന്ന പുതിയ ഫീച്ചർ അവതരിപ്പിച്ച് മെറ്റ. സംരംഭകർക്ക് ഉപഭോക്താക്കളുമായി എളുപ്പത്തിൽ ആശയവിനിമയം നടത്താനും വ്യാപാരം വർദ്ധിപ്പിക്കാനും സഹായിക്കുന്നതാണ് ഈ എഐ സംവിധാനം. വരും ആഴ്ചകളിൽ രാജ്യത്തെ എല്ലാ വാട്സ്ആപ്പ് ബിസിനസ് അക്കൗണ്ടുകളിലും ഈ സേവനം ലഭ്യമായി തുടങ്ങുമെന്ന് കമ്പനി അറിയിച്ചു.
ഉപഭോക്താക്കളുടെ ചോദ്യങ്ങൾക്ക് 24 മണിക്കൂറും മറുപടി നൽകാനും ഉൽപ്പന്നങ്ങൾ ശുപാർശ ചെയ്യാനും അപ്പോയിന്റ്മെന്റുകൾ ബുക്ക് ചെയ്യാനും പുതിയ എഐ സംവിധാനത്തിലൂടെ സാധിക്കും. ഓരോ ബിസിനസ് സ്ഥാപനത്തിന്റെയും വിവരങ്ങൾ അടിസ്ഥാനമാക്കിയാണ് എഐ പ്രവർത്തിക്കുന്നത്. അതിനാൽ വില, നിലവിലെ ഓഫറുകൾ, ഷിപ്പിംഗ് വിവരങ്ങൾ തുടങ്ങിയവയെക്കുറിച്ചുള്ള അന്വേഷണങ്ങൾക്ക് ഉടൻ തന്നെ മറുപടി ലഭിക്കും. എഐ മറുപടി നൽകുന്നതിനൊപ്പം തന്നെ ആവശ്യമുള്ള ഘട്ടങ്ങളിൽ ബിസിനസ് ഉടമകൾക്ക് നേരിട്ട് ചാറ്റിൽ ഇടപെടാനുള്ള സൗകര്യവും ഇതിലുണ്ട്.
ഇന്ത്യയിലെ ഓൺലൈൻ ഉപയോക്താക്കളിൽ 91 ശതമാനം പേരും ആഴ്ചതോറും ബിസിനസ് ആവശ്യങ്ങൾക്കായി ചാറ്റിംഗിനെ ആശ്രയിക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്. ഈ സാഹചര്യം കണക്കിലെടുത്താണ് ചെറുകിട വ്യാപാരികൾക്ക് വലിയ ചിലവില്ലാതെ എഐ സാങ്കേതികവിദ്യ ലഭ്യമാക്കാൻ മെറ്റ തീരുമാനിച്ചത്. ഭാവിയിൽ വാട്സ്ആപ്പ് വഴി നേരിട്ട് യുപിഐ പേയ്മെന്റുകൾ നടത്താനുള്ള സൗകര്യവും ഇതിനൊപ്പം ഒരുക്കുമെന്ന് മെറ്റ ഇന്ത്യ ബിസിനസ് മെസേജിംഗ് ഡയറക്ടർ രവി ഗാർഗ് വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
AI will now respond to customers; Meta is revolutionizing WhatsApp business
