ഒട്ടാവ: ഇന്റർനെറ്റിലെ തെറ്റായ ആരോഗ്യവിവരങ്ങൾ വിശ്വസിച്ച് സ്വയം ചികിത്സ നടത്തുന്നവരുടെ എണ്ണം വർധിക്കുന്നതായി റിപ്പോർട്ട്. കനേഡിയൻ മെഡിക്കൽ അസോസിയേഷൻ (CMA) നടത്തിയ പുതിയ സർവേയിലാണ് ഈ കണ്ടെത്തൽ. ഓൺലൈനിൽ കണ്ട വിവരങ്ങൾ പരീക്ഷിച്ച് രോഗം വഷളായവരെ ചികിത്സിക്കാൻ ഡോക്ടർമാർക്ക് കൂടുതൽ സമയം ചെലവാക്കേണ്ടി വരുന്നു എന്നതാണ് പ്രധാന പ്രതിസന്ധി. സർവേയിൽ പങ്കെടുത്ത 97 ശതമാനം ഡോക്ടർമാരും ഇത്തരം രോഗികളെ ചികിത്സിക്കേണ്ടി വന്നിട്ടുണ്ടെന്ന് വ്യക്തമാക്കി. ഏപ്രിൽ ആദ്യവാരം 645 ഡോക്ടർമാരുടെ ഇടയിൽ നടത്തിയ പഠനത്തിലാണ് ഈ കണ്ടെത്തൽ ഉള്ളത്.
കൃത്യസമയത്ത് ഡോക്ടറെ കാണാൻ സാധിക്കാത്തതാണ് പലരെയും ഓൺലൈൻ വിവരങ്ങളെ ആശ്രയിക്കാൻ പ്രേരിപ്പിക്കുന്നത്. ഗൂഗിൾ, ചാറ്റ് ജി.പി.ടി (AI) തുടങ്ങിയ പ്ലാറ്റ്ഫോമുകൾ വഴിയാണ് ഭൂരിഭാഗം പേരും വിവരങ്ങൾ തേടുന്നത്. ഇത്തരത്തിൽ ലഭിക്കുന്ന ഉപദേശങ്ങൾ പിന്തുടരുന്നവർക്ക് ശാരീരികമായ ബുദ്ധിമുട്ടുകൾ ഉണ്ടാകാൻ അഞ്ചിരട്ടി സാധ്യത കൂടുതലാണെന്ന് പഠനം ചൂണ്ടിക്കാട്ടുന്നു. യുവാക്കളാണ് ആരോഗ്യപ്രശ്നങ്ങൾ സ്വയം നിർണ്ണയിക്കാൻ നിർമ്മിത ബുദ്ധി (AI) കൂടുതൽ ഉപയോഗിക്കുന്നത്. ലക്ഷണങ്ങൾ ഓൺലൈനിൽ തിരയുമ്പോൾ ഗൗരവകരമായ രോഗങ്ങളെ സാധാരണ പ്രശ്നങ്ങളായി തെറ്റിദ്ധരിക്കാൻ ഇടയാകുന്നുണ്ടെന്നും വിദഗ്ധർ മുന്നറിയിപ്പ് നൽകുന്നു.
ആരോഗ്യമേഖലയിൽ ആവശ്യത്തിന് ഡോക്ടർമാരില്ലാത്തതാണ് ഈ പ്രവണത വർധിക്കാൻ കാരണമെന്ന് അസോസിയേഷൻ പ്രസിഡന്റ് ഡോ. മാർഗോട്ട് ബർനെൽ പറഞ്ഞു. ഏകദേശം 23,000 കുടുംബ ഡോക്ടർമാരുടെ കുറവ് നിലവിൽ കാനഡയിലുണ്ട്. തെറ്റായ വിവരങ്ങൾ തടയുന്നതിനായി ‘ഹെൽത്ത്കെയർ ഫോർ റിയൽ’ (Healthcare For Real) എന്ന പേരിൽ പുതിയ ബോധവൽക്കരണ പദ്ധതിക്ക് തുടക്കമിട്ടിട്ടുണ്ട്. ഇന്റർനെറ്റിൽ കാണുന്ന വിവരങ്ങൾ വിശ്വസനീയമാണോ എന്ന് കൃത്യമായി പരിശോധിക്കണമെന്നും സംശയങ്ങൾ ഉണ്ടെങ്കിൽ വിദഗ്ധരായ ഡോക്ടർമാരോട് നേരിട്ട് ചോദിക്കണമെന്നും അധികൃതർ ജനങ്ങളോട് അഭ്യർത്ഥിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
"AI treatment is harmful to health": Doctors are concerned that the disease is getting worse after trying online information
