നടി അൻസിബയുടെ പരാതി: നടൻ ടിനി ടോമിനെതിരെ ഇന്ന് കേസെടുക്കും

കൊച്ചി: നടി അൻസിബ ഹസ്സൻ നൽകിയ പരാതിയിൽ നടൻ ടിനി ടോമിനെതിരെ കടവന്ത്ര പൊലീസ് ഇന്ന് കേസെടുക്കും. താരസംഘടനയായ ‘അമ്മ’യുടെ മുൻ ജോയിന്റ് സെക്രട്ടറി കൂടിയായ അൻസിബയുടെ പരാതിയിൽ ടിനി ടോമിനെതിരെ എഫ്.ഐ.ആർ രജിസ്റ്റർ ചെയ്ത് അന്വേഷണം നടത്താൻ എറണാകുളം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി കഴിഞ്ഞദിവസം നിർദ്ദേശം നൽകിയിരുന്നു. കേട്ടുകേൾവിയുടെ മാത്രം അടിസ്ഥാനത്തിലുള്ള പരാതിയായതിനാൽ കേസെടുക്കേണ്ടതില്ലെന്നായിരുന്നു പൊലീസിന്റെ ആദ്യ നിലപാട്. ഇതിനെതിരെ അൻസിബ കോടതിയെ സമീപിച്ചതോടെയാണ് ഇപ്പോൾ നടപടിയുണ്ടായിരിക്കുന്നത്.

കഴിഞ്ഞ ജൂൺ ഒന്നിനാണ് അൻസിബ ടിനി ടോമിനെതിരെ പൊലീസിൽ പരാതി നൽകിയത്. ടിനി ടോം തനിക്കെതിരെ തുടർച്ചയായി വംശീയവും വ്യക്തിപരവുമായ അപവാദ പ്രചാരണങ്ങൾ നടത്തിയെന്നാണ് നടിയുടെ ആക്ഷേപം. താൻ ടിനി ടോമിന്റെ ഡ്രൈവറെ മതം മാറ്റാൻ ശ്രമിച്ചു എന്നതുൾപ്പെടെയുള്ള വ്യാജവാർത്തകൾ പ്രചരിപ്പിച്ചതായും അൻസിബ ആരോപിക്കുന്നു. തന്നെയും കുടുംബത്തെയും വേട്ടയാടാൻ ശ്രമിച്ചതിലൂടെ കടുത്ത മാനസിക പീഡനമാണ് ഉണ്ടായതെന്നും സ്ത്രീത്വത്തെ അപമാനിക്കുന്ന രീതിയിലായിരുന്നു ടിനിയുടെ പെരുമാറ്റമെന്നും മാധ്യമങ്ങളിലൂടെ വ്യക്തമാക്കിയ ശേഷമാണ് നടി പരാതി നൽകിയത്.

പരാതി ലഭിച്ചതിനെത്തുടർന്ന് കടവന്ത്ര പൊലീസ് നടത്തിയ പ്രാഥമിക അന്വേഷണത്തിൽ നടിമാരായ ശ്വേതാ മേനോൻ, നീന കുറുപ്പ്, നടൻ ടിനി ടോം എന്നിവരുടെ മൊഴികൾ രേഖപ്പെടുത്തിയിരുന്നു. വാട്‌സ്ആപ്പ് ഗ്രൂപ്പിലെ പരാമർശം അൻസിബയെ ഉദ്ദേശിച്ചുള്ളതല്ലെന്ന് ശ്വേതയും, താൻ അത്തരം വാക്കുകൾ ഉപയോഗിച്ചിട്ടില്ലെന്ന് ടിനി ടോമും മൊഴി നൽകി. കേട്ടുകേൾവി മാത്രമാണെന്ന നീന കുറുപ്പിന്റെ മൊഴിയുടെയും മറ്റ് സാക്ഷികളില്ലാത്തതിന്റെയും അടിസ്ഥാനത്തിൽ കേസെടുക്കാനാകില്ലെന്ന് പൊലീസ് റിപ്പോർട്ട് നൽകുകയായിരുന്നു. എന്നാൽ, ഈ റിപ്പോർട്ടിനെതിരെ അൻസിബ തന്റെ പക്കലുള്ള ഡിജിറ്റൽ തെളിവുകൾ സഹിതം കോടതിയെ സമീപിക്കുകയായിരുന്നു.

കോടതി ഉത്തരവ് ലഭിച്ചയുടൻ ടിനി ടോമിനെതിരെ എഫ്.ഐ.ആർ രജിസ്റ്റർ ചെയ്യുമെന്ന് കടവന്ത്ര പൊലീസ് വ്യക്തമാക്കിയിട്ടുണ്ട്. സ്ത്രീത്വത്തെ അപമാനിക്കൽ, അശ്ലീല പരാമർശങ്ങൾ നടത്തൽ, വംശീയ അധിക്ഷേപം വഴി മതവികാരം വ്രണപ്പെടുത്താൻ ശ്രമിക്കൽ തുടങ്ങിയ കുറ്റങ്ങൾ ചുമത്തിയാകും കേസെടുക്കുക. താരസംഘടനയായ ‘അമ്മ’യിലെ ആഭ്യന്തര തർക്കങ്ങൾക്കും അൻസിബയുടെ രാജി പ്രഖ്യാപനത്തിനും പിന്നാലെയുണ്ടായ ഈ നിയമനടപടി മലയാള സിനിമാ ലോകത്ത് വലിയ ചർച്ചകൾക്കാണ് വഴിതുറന്നിരിക്കുന്നത്.

Actress Ansiba’s complaint: Case to be filed against actor Tini Tom today

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt