ലണ്ട്ബ്രെക്ക് ഫാൾസ്: വെള്ളച്ചാട്ടത്തിന് മുകളിൽ നിന്ന് ബോട്ടുമായി താഴേക്ക് ചാടി ഒരു യുവാവിന്റെ അതിസാഹസിക പ്രകടനം. ആൽബർട്ടയിലുള്ള ലണ്ട്ബ്രെക്ക് വെള്ളച്ചാട്ടത്തിലാണ് സംഭവം. ഡസ്റ്റി ഫ്രൈസൻ എന്ന യുവാവാണ് ഒമ്പത് മീറ്ററോളം ഉയരമുള്ള വെള്ളച്ചാട്ടത്തിൽ നിന്ന് തന്റെ ജെറ്റ് ബോട്ടും കൊണ്ട് താഴേക്ക് പറന്നിറങ്ങിയത്. വായുവിൽ ഉയർന്നുപൊങ്ങി ബോട്ട് വെള്ളത്തിലേക്ക് പതിക്കുന്ന വീഡിയോയാണ് ഇപ്പോൾ സോഷ്യൽ മീഡിയയിൽ വലിയ രീതിയിൽ പ്രചരിക്കുന്നത്. സമുദ്രങ്ങൾ വൃത്തിയാക്കുന്നതിനെക്കുറിച്ച് ജനങ്ങളിൽ ബോധവൽക്കരണം നടത്താനും ഇതിനായി പണം കണ്ടെത്താനുമാണ് താൻ ഈ സാഹസികതയ്ക്ക് മുതിർന്നതെന്ന് ഡസ്റ്റി പറയുന്നു.
ഒരു ദിവസം പെട്ടെന്ന് എടുത്ത തീരുമാനമല്ല ഇതെന്നും മാസങ്ങൾ നീണ്ട തയ്യാറെടുപ്പുകൾ ഇതിന് പിന്നിലുണ്ടെന്നും ഡസ്റ്റി വ്യക്തമാക്കി. സുരക്ഷയ്ക്കായി ഒരു ടീമിനെ കൂടെ കൂട്ടിയിരുന്നു. കൂടാതെ ഈ ചാട്ടത്തിന് വേണ്ടി മാത്രം പ്രത്യേകമായി ഡിസൈൻ ചെയ്ത ‘ഡെന്റ്’ എന്ന ബോട്ട് ആണ് അദ്ദേഹം ഉപയോഗിച്ചത്. കടലിലെ പ്ലാസ്റ്റിക്കും മറ്റ് മാലിന്യങ്ങളും നീക്കം ചെയ്യാൻ വലിയ കപ്പലുകൾ നിർമ്മിക്കുകയാണ് തന്റെ ലക്ഷ്യമെന്ന് ഡസ്റ്റി പറയുന്നു. മുൻപും ഇയാൾ ഇത്തരത്തിൽ വെള്ളച്ചാട്ടത്തിൽ നിന്ന് ചാടിയിട്ടുണ്ട്. ഭാവിയിൽ ലോകപ്രശസ്തമായ നയാഗ്ര വെള്ളച്ചാട്ടത്തിൽ നിന്നും ഇതുപോലെ ബോട്ടുമായി ചാടാൻ പദ്ധതിയുണ്ടെന്നും അദ്ദേഹം കൂട്ടിച്ചേർത്തു.
എന്നാൽ, ഈ സാഹസിക പ്രകടനത്തിന് പിന്നാലെ ഡസ്റ്റിക്ക് നേരെ പോലീസ് അന്വേഷണവും തുടങ്ങിയിട്ടുണ്ട്. റോയൽ മൗണ്ടഡ് പോലീസ് സംഭവത്തെക്കുറിച്ച് അന്വേഷിക്കുന്നുണ്ടെങ്കിലും താൻ ഒരു നിയമവും തെറ്റിച്ചിട്ടില്ലെന്നാണ് ഡസ്റ്റിയുടെ വാദം. ഇവിടുത്തെ പാർക്കുകളുടെ വെബ്സൈറ്റും നിയമങ്ങളും കൃത്യമായി പരിശോധിച്ചിട്ടാണ് താൻ വന്നതെന്നും, ബോട്ടിൽ നിന്ന് വെള്ളച്ചാട്ടത്തിലേക്ക് ചാടുന്നത് നിരോധിച്ചുകൊണ്ടുള്ള ഒരു നിയമവും അതിൽ ഇല്ലായിരുന്നു എന്നും അദ്ദേഹം പറയുന്നു. എന്തായാലും സംഭവത്തിൽ പോലീസിന്റെ അന്വേഷണം ഇപ്പോഴും നടക്കുകയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
A single jump into a waterfall with a boat! Video goes viral, police investigate the youth
