വാട്സാപ്പിന് വെല്ലുവിളി; ഐഫോൺ ഉപയോക്താക്കൾക്കായി എലോൺ മസ്കിന്റെ ‘XChat’ എത്തി

സാൻഫ്രാൻസിസ്കോ: സോഷ്യൽ മീഡിയ പ്ലാറ്റ്‌ഫോമായ ‘X’ (പഴയ ട്വിറ്റർ) മെസേജിംഗ് രംഗത്ത് വിപ്ലവകരമായ മാറ്റത്തിനൊരുങ്ങുന്നു. വാട്സാപ്പിന് ബദലായി ഐഫോൺ ഉപയോക്താക്കൾക്കായി ‘XChat’ എന്ന പേരിൽ സ്വതന്ത്ര മെസേജിംഗ് ആപ്പ് എലോൺ മസ്ക് പുറത്തിറക്കി. നിലവിൽ X പ്ലാറ്റ്‌ഫോമിലുള്ള കോൺടാക്റ്റുകളുമായി കൂടുതൽ സ്വകാര്യതയോടെ സംവദിക്കാൻ സഹായിക്കുന്ന പ്ലാറ്റ്‌ഫോമായാണ് XChat വിഭാവനം ചെയ്തിരിക്കുന്നത്.

വാട്സാപ്പ് ഉൾപ്പെടെയുള്ള ആപ്പുകളിൽ നിന്ന് വ്യത്യസ്തമായി ഫോൺ നമ്പറുകൾ കൈമാറാതെ തന്നെ X-ലെ സുഹൃത്തുക്കളുമായും സഹപ്രവർത്തകരുമായും ആശയവിനിമയം നടത്താം എന്നതാണ് ഇതിന്റെ പ്രധാന പ്രത്യേകത. സന്ദേശങ്ങൾ അയക്കുന്നതിനൊപ്പം ഓഡിയോ-വീഡിയോ കോളുകൾ ചെയ്യാനും ഫയലുകൾ കൈമാറാനും ഈ ആപ്പിലൂടെ സാധിക്കും. പരസ്യങ്ങളോ ട്രാക്കിംഗ് സംവിധാനങ്ങളോ ഇല്ലാത്ത, പൂർണ്ണമായും എൻഡ്-ടു-എൻഡ് എൻക്രിപ്റ്റഡ് ആയ സംവിധാനമാണ് XChat വാഗ്ദാനം ചെയ്യുന്നത്.

ഉപയോക്താക്കളുടെ സ്വകാര്യതയ്ക്ക് വലിയ പ്രാധാന്യമാണ് XChat നൽകുന്നത്. അയച്ച സന്ദേശങ്ങൾ എഡിറ്റ് ചെയ്യാനും നിശ്ചിത സമയത്തിനുള്ളിൽ തനിയെ അപ്രത്യക്ഷമാകുന്ന ‘ഡിസപ്പിയറിംഗ് മെസേജ്’ (Disappearing Messages) ഫീച്ചറും ആപ്പിലുണ്ട്. സുരക്ഷയുടെ ഭാഗമായി സംഭാഷണങ്ങളുടെ സ്ക്രീൻഷോട്ട് എടുക്കുന്നത് തടയാനുള്ള സംവിധാനവും ഇതിൽ ഉൾപ്പെടുത്തിയിട്ടുണ്ട്. ഡിവൈസിൽ മാത്രം സൂക്ഷിക്കുന്ന പിൻ (PIN) മുഖേനയാണ് സന്ദേശങ്ങൾ സംരക്ഷിക്കപ്പെടുന്നത്. X പ്ലാറ്റ്‌ഫോമിന് പോലും ഉപയോക്താക്കളുടെ സന്ദേശങ്ങൾ വായിക്കാൻ കഴിയില്ലെന്ന് ആപ്പ് സ്റ്റോറിലെ വിവരണത്തിൽ കമ്പനി വ്യക്തമാക്കുന്നു.

എല്ലാ സേവനങ്ങളും ഒരിടത്ത് ലഭ്യമാകുന്ന ‘എവരിതിംഗ് ആപ്പ്’ (Everything App) എന്നതായിരുന്നു എലോൺ മസ്കിന്റെ ആദ്യത്തെ ലക്ഷ്യമെങ്കിലും, ഇപ്പോൾ സേവനങ്ങളെ വെവ്വേറെ ആപ്പുകളായി നൽകുന്ന രീതിയിലേക്കാണ് X മാറുന്നത്. ഇതിന്റെ ഭാഗമായാണ് മെസേജിംഗിനായി മാത്രമായി XChat അവതരിപ്പിച്ചത്. നിലവിൽ കുറഞ്ഞ ഉപയോഗവും സ്പാം ഭീഷണിയും നേരിടുന്ന ‘കമ്മ്യൂണിറ്റീസ്’ ഫീച്ചറിന് പകരമായി XChat പ്രവർത്തിക്കും. 2026-ന്റെ തുടക്കത്തിൽ തിരഞ്ഞെടുത്ത ഉപയോക്താക്കളിൽ നടത്തിയ പരീക്ഷണത്തിന് ശേഷമാണ് ആപ്പ് പൊതുജനങ്ങൾക്കായി ലഭ്യമാക്കിയിരിക്കുന്നത്.

മെസേജിംഗ് രംഗത്ത് വരാനിരിക്കുന്ന വലിയ മാറ്റങ്ങളുടെ തുടക്കം മാത്രമാണ് XChat എന്ന് കമ്പനിയുടെ ലീഡ് ഡിസൈനർ ബെഞ്ചി ടെയ്‌ലർ സൂചിപ്പിച്ചു. നിലവിൽ ഐഫോൺ ഉപയോക്താക്കൾക്ക് ലഭ്യമായ ഈ സേവനം വൈകാതെ തന്നെ മറ്റ് പ്ലാറ്റ്‌ഫോമുകളിലേക്കും എത്തിയേക്കും. പേയ്‌മെന്റ് സംവിധാനങ്ങൾ ഉൾപ്പെടെയുള്ള കൂടുതൽ ഫീച്ചറുകൾ വരും ദിവസങ്ങളിൽ മസ്ക് അവതരിപ്പിക്കുമെന്നാണ് സൂചന.

A challenge to WhatsApp; Elon Musk's 'XChat' has arrived for iPhone users

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt