നെയ്റോബി: യേശുവിനെ കാണിച്ചുനൽകാമെന്ന് വിശ്വസിപ്പിച്ച് അനുയായികളെ പട്ടിണിക്കിട്ട് കൊലപ്പെടുത്തിയ കുപ്രസിദ്ധ കെനിയൻ പാസ്റ്റർക്ക് 200 വർഷത്തെ തടവുശിക്ഷ. ഗുഡ് ന്യൂസ് ഇന്റർനാഷണൽ ചർച്ച് തലവനായ പോൾ മക്കൻസിയെയാണ് മൊംബാസ ഹൈക്കോടതി കഠിനമായ ശിക്ഷയ്ക്ക് വിധിച്ചത്. ലോകം അവസാനിക്കുന്നതിന് മുൻപ് യേശുവിനെ കാണാനായി മരണം വരെ ഉപവസിക്കണമെന്നായിരുന്നു പാസ്റ്റർ അനുയായികൾക്ക് നൽകിയ നിർദ്ദേശം. പട്ടിണിക്കിട്ട് കൊലപ്പെടുത്തിയതിന് 100 വർഷവും നേരിട്ടുള്ള കൊലപാതകങ്ങൾക്ക് 100 വർഷവും വീതമാണ് ജസ്റ്റിസ് ഡയാന കവേദ്സ ശിക്ഷ വിധിച്ചത്.
കെനിയയിലെ കിലിഫി കൗണ്ടിയിലെ മക്കെൻസി പള്ളിയിൽ നിന്ന് 15 ഇടവകക്കാരെ പോലീസ് രക്ഷപ്പെടുത്തിയപ്പോഴാണ് ഈ ദാരുണ സംഭവം പുറംലോകം അറിയുന്നത്. തുടർന്ന് ആരാധനാലയത്തിന് സമീപത്തെ വനമേഖലയിൽ നടത്തിയ പരിശോധനയിൽ 400-ലേറെ കുഴിമാടങ്ങളും കണ്ടെത്തിയിരുന്നു. പാസ്റ്ററുടെ കൽപന അക്ഷരാർത്ഥത്തിൽ അനുസരിച്ചതിനെ തുടർന്ന് 190 കുട്ടികളും ഒരു മുതിർന്ന വ്യക്തിയും ഉൾപ്പെടെ 191 പേരാണ് പട്ടിണി കിടന്ന് ദാരുണമായി മരണപ്പെട്ടത്. കിഴക്കൻ കെനിയയിലെ ശാഖാഹോള വനത്തിൽ അഞ്ഞൂറിലധികം ആളുകളുടെ മൃതദേഹങ്ങൾ ആഴമില്ലാത്ത കുഴികളിൽ തള്ളിയ നിലയിലും ചിലത് ശ്വാസം മുട്ടിച്ചും മർദ്ദിച്ചും കൊലപ്പെടുത്തിയ നിലയിലുമാണ് പോലീസ് കണ്ടെത്തിയത്.
ദിവസങ്ങളോളം പട്ടിണി കിടന്ന കുട്ടികൾ വിശപ്പ് കാരണം ഭക്ഷണം മോഷ്ടിക്കാൻ ശ്രമിച്ചപ്പോൾ അവരെ ക്രൂരമായി മർദ്ദിക്കുകയും മുറികളിൽ പൂട്ടിയിട്ട് മരണത്തിന് വിട്ടുകൊടുക്കുകയുമായിരുന്നുവെന്ന് അന്വേഷണ സംഘം കോടതിയിൽ തെളിയിച്ചു. മുൻപ് ടാക്സി ഡ്രൈവറായിരുന്ന മക്കെൻസി 2003-ലാണ് ഗുഡ് ന്യൂസ് ഇന്റർനാഷണൽ മിനിസ്ട്രീസ് സ്ഥാപിക്കുന്നത്. കുട്ടികളെ സ്കൂളിൽ അയക്കുന്നതിനെയും രോഗികൾ ആശുപത്രിയിൽ ചികിത്സ തേടുന്നതിനെയും ഇയാൾ കർശനമായി എതിർത്തിരുന്നു. ഉപവാസം അനുഷ്ഠിക്കാൻ വിസമ്മതിക്കുന്നവരെ മർദ്ദിച്ച് സ്വർഗത്തിലേക്ക് അയക്കുമെന്നായിരുന്നു ഇയാൾ അനുയായികൾക്ക് നൽകിയ ഭീഷണി.
ALSO READ: യു.എസ് ആശ്രയം അവസാനിപ്പിക്കുന്നു; ചരിത്ര ബജറ്റ് പ്രഖ്യാപിച്ച് കാനഡ
വിദ്യാഭ്യാസത്തെ ‘തിന്മ’ എന്നും ആരോഗ്യ സംരക്ഷണത്തെ ദൈവവിരുദ്ധമെന്നും ഡിജിറ്റൽ തിരിച്ചറിയൽ കാർഡുകളെ ‘പിശാചിന്റെ അടയാളം’ എന്നും വിശേഷിപ്പിക്കുന്ന ഗൂഢാലോചന സിദ്ധാന്തങ്ങളാണ് മക്കെൻസി തന്റെ പ്രഭാഷണങ്ങളിലൂടെ പ്രചരിപ്പിച്ചത്. 2017 മുതൽ പോലീസ് നിരീക്ഷണത്തിലായിരുന്ന ഇയാൾ 2019-ൽ പള്ളി അടച്ചുപൂട്ടിയ ശേഷമാണ് അനുയായികളുമായി വനത്തിലേക്ക് താമസം മാറ്റിയത്. ഈ കേസിൽ കോടതി വിധിച്ച കനത്ത ശിക്ഷ പശ്ചിമേഷ്യൻ ആഫ്രിക്കൻ രാജ്യങ്ങളെയും ലോകത്തെയും ഒരുപോലെ ഞെട്ടിച്ചിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
