വാഷിങ്ടൺ: ചരിത്രത്തിലെ ഏറ്റവും ചെലവേറിയ തെരഞ്ഞെടുപ്പ് എന്ന വിശേഷണത്തോടെ നടന്ന അമേരിക്കൻ ഇടക്കാല തെരഞ്ഞെടുപ്പിൽ കോടീശ്വരന്മാരുടെ പണമൊഴുക്കിനെക്കാൾ ജനവികാരം നിർണായകമായി. ടെസ്‌ല സിഇഒ ഇലോൺ മസ്‌ക് അടക്കമുള്ള മുൻനിര വ്യവസായികൾ റിപ്പബ്ലിക്കൻ സ്ഥാനാർത്ഥികൾക്കായി വാരിയെറിഞ്ഞ കോടികൾക്ക് വോട്ടർമാരെ സ്വാധീനിക്കാൻ സാധിച്ചില്ലെന്നാണ് പുറത്തുവരുന്ന ഫലങ്ങൾ വ്യക്തമാക്കുന്നത്. ഭരണകൂടത്തിനെതിരെയുള്ള ജനങ്ങളുടെ പ്രതിഷേധത്തിന് മുൻപിൽ പ്രചാരണ പണത്തിന് മാറ്റുരയ്ക്കാൻ കഴിഞ്ഞില്ലെന്ന് രാഷ്ട്രീയ നിരീക്ഷകർ വ്യക്തമാക്കി.
ലോകത്തിലെ ഏറ്റവും വലിയ പണക്കാരനായ ഇലോൺ മസ്‌ക് മാത്രം ഏകദേശം 24.5 കോടിയിലധികം യുഎസ് ഡോളറാണ് റിപ്പബ്ലിക്കൻ സ്ഥാനാർത്ഥികൾക്കായി ചെലവഴിച്ചത്. അതിൽ ടെക്സസിലെ സെനറ്റ് പോരാട്ടത്തിൽ മത്സരിച്ച കെൻ പാക്സ്റ്റണ് വേണ്ടി മാത്രം 20 കോടി ഡോളറിലധികം മസ്‌ക് ചെലവാക്കിയിരുന്നു. എന്നാൽ ഡെമോക്രാറ്റിക് സ്ഥാനാർത്ഥിയായ ജെയിംസ് തലാരി കോയോട് പാക്സ്റ്റൺ പരാജയപ്പെടുകയാണുണ്ടായത്. മസ്‌ക് പിന്തുണച്ച ഭൂരിഭാഗം റിപ്പബ്ലിക്കൻ സ്ഥാനാർത്ഥികളും തെരഞ്ഞെടുപ്പിൽ കനത്ത തിരിച്ചടിയാണ് നേരിട്ടത്.
ആഡ് ഇംപാക്ട് എന്ന പരസ്യ വിശകലന ഏജൻസിയുടെ കണക്കനുസരിച്ച് ഏകദേശം 1160 കോടി യുഎസ് ഡോളറാണ് ഈ തെരഞ്ഞെടുപ്പ് സീസണിൽ ആകെ ചെലവഴിക്കപ്പെട്ടത്. ബാഹ്യ സംഘടനകളിൽ നിന്നും ശതകോടീശ്വരന്മാരിൽ നിന്നും ധനസമാഹരണം നടത്തുന്നതിൽ റിപ്പബ്ലിക്കൻ പാർട്ടി ഏറെ മുന്നിലായിരുന്നു. ഏറ്റവും കൂടുതൽ പണം സംഭാവന ചെയ്ത മുൻനിരയിലെ 15 പേരിൽ എട്ടുപേരും റിപ്പബ്ലിക്കൻ അനുകൂല സംഘടനകൾക്കാണ് തുക നൽകിയത്. എന്നിട്ടും 80 ബില്യൺ ഡോളറിന്റെ സാമ്പത്തിക മേൽക്കൈ ഉണ്ടായിരുന്ന ടെക്സസിലടക്കം റിപ്പബ്ലിക്കൻ സ്ഥാനാർത്ഥികൾക്ക് പരാജയം നേരിടേണ്ടി വന്നു.
അവസാന ഫലങ്ങൾ പുറത്തുവരുമ്പോൾ ജനപ്രതിനിധി സഭയിൽ നാപ്പതിലധികം സീറ്റുകൾ അധികമായി നേടി ഡെമോക്രാറ്റുകൾ ഭൂരിപക്ഷം ഉറപ്പിച്ചു. കൂടാതെ സെനറ്റിൽ ഏഴ് സീറ്റുകൾ പിടിച്ചെടുത്ത് അവിടെയും ഡെമോക്രാറ്റിക് പാർട്ടി മേൽക്കൈ നേടി. ചുരുങ്ങിയത് അഞ്ച് പ്രവിശ്യകളിൽ ഗവർണർ പദവിയും ഡെമോക്രാറ്റുകൾ സ്വന്തമാക്കി. പ്രസിഡന്റ് ഡോണൾഡ് ട്രംപിന്റെ ഭരണ ശൈലിയിലും രാജ്യത്തിന്റെ നിലവിലെ പോക്കിലും ജനങ്ങൾക്കുള്ള ശക്തമായ വിയോജിപ്പാണ് തെരഞ്ഞെടുപ്പ് ഫലത്തിൽ പ്രതിഫലിച്ചതെന്ന് ജോർജ്ജ് വാഷിങ്ടൺ യൂണിവേഴ്സിറ്റിയിലെ അധ്യാപകനായ പീറ്റർ ലോഗ് വ്യക്തമാക്കി.
ALSO READ: യു.എസ് ആശ്രയം അവസാനിപ്പിക്കുന്നു; ചരിത്ര ബജറ്റ് പ്രഖ്യാപിച്ച് കാനഡ
മത്സരരംഗത്ത് സജീവമാകാനും പരസ്യങ്ങൾ നൽകാനും തുടക്കത്തിൽ സ്ഥാനാർത്ഥികൾക്ക് പണം ആവശ്യമാണെങ്കിലും, ജനപ്രീതിയില്ലാത്ത ഒരു പാർട്ടിക്കും മോശം സ്ഥാനാർത്ഥിക്കും പണം കൊണ്ട് മാത്രം വിജയം വാങ്ങാനാകില്ലെന്ന് ഈ തെരഞ്ഞെടുപ്പ് തെളിയിച്ചതായി യുമാസ് അമർസ്റ്റ് പോൾ കോ-ഡയറക്ടറായ പ്രൊഫസർ റെയ്മണ്ട് ലാ രാജ അഭിപ്രായപ്പെട്ടു. എന്നാൽ അടുത്ത പൊതുതെരഞ്ഞെടുപ്പിലും പ്രചാരണങ്ങൾക്കായി ശതകോടികൾ ഒഴുകിയെത്തുമെന്നും, പണം എവിടെ എങ്ങനെ ചെലവഴിക്കണമെന്നതിൽ കൂടുതൽ തന്ത്രപരമായ മാറ്റങ്ങൾ ഉണ്ടായേക്കാമെന്നുമാണ് വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
