വാഷിംഗ്‌ടൺ: അമേരിക്കയിലെ വിർജീനിയയിൽ കാണാതായ ഇന്ത്യൻ യുവതിയുടെ മൃതദേഹം കഷ്ണങ്ങളാക്കി ഉപേക്ഷിച്ചതായി ഭർത്താവ് നരേഷ് ഭട്ട് കോടതിയിൽ സമ്മതിച്ചു. എന്നാൽ താൻ കൊലപ്പെടുത്തിയതല്ലെന്നും ഭാര്യ വിഷം കഴിച്ച് ആത്മഹത്യ ചെയ്യുകയായിരുന്നു എന്നുമാണ് ഇയാളുടെ വാദം.
2024 ജൂലൈ 29-നാണ് 28കാരിയായ മംതയെ കാണാതാകുന്നത്. ഓഗസ്റ്റ് 5-ന് ജോലിസ്ഥലത്ത് എത്താതിരുന്നതിനെ തുടർന്ന് നടത്തിയ അന്വേഷണത്തിലാണ് കാണാതായ വിവരം പുറത്തറിയുന്നത്. തുടക്കത്തിൽ പോലീസിനെ തെറ്റിദ്ധരിപ്പിച്ച നരേഷ് ഭട്ട് പിന്നീട് കാണാതായതായി പരാതി നൽകുകയായിരുന്നു. എന്നാൽ ദമ്പതികളുടെ കിടപ്പുമുറിയിലും ബാത്ത്‌റൂമിലും രക്തക്കറകളും, മുടിയിഴകൾ കുടുങ്ങിയ നിലയിൽ ഈർച്ചവാളും കണ്ടെത്തിയതിനെ തുടർന്ന് 2024 ഓഗസ്റ്റ് 22-ന് ഇയാളെ പോലീസ് അറസ്റ്റ് ചെയ്തു.
അഞ്ചു ആഴ്ചയായി തുടരുന്ന വിചാരണയ്ക്കിടെയാണ് നരേഷ് ഭട്ട് കോടതിയിൽ സ്വന്തം വാദങ്ങൾ നിരത്തിയത്. ജൂലൈ 29 രാത്രിയിൽ മംത വിഷാംശമടങ്ങിയ മരുന്ന് കഴിച്ച്ബോധരഹിതയായി കിടക്കുന്നത് കണ്ടെന്നാണ് ഇയാളുടെ അവകാശവാദം. ഒരു മണിക്കൂറോളം സി.പി.ആർ നൽകി രക്ഷിക്കാൻ ശ്രമിച്ചെങ്കിലും മരണം സംഭവിച്ചതായി മനസ്സിലായി. 911-ൽ വിളിച്ച് പോലീസിനെ അറിയിക്കാതിരുന്നത് ഭയം കൊണ്ടും പരിഭ്രാന്തി കൊണ്ടുമാണെന്ന് ഇയാൾ പറഞ്ഞു.
തുടർന്ന് ആത്മഹത്യ ചെയ്യാൻ ആലോചിച്ചെങ്കിലും പിന്നീട് മൃതദേഹം ഒളിപ്പിക്കാൻ തീരുമാനിക്കുകയായിരുന്നു. ഹോം ഡിപ്പോയിൽ നിന്ന് സാധനങ്ങൾ വാങ്ങി മൃതദേഹം ട്രാഷ് ബാഗിലാക്കാൻ ശ്രമിച്ചെങ്കിലും നടക്കാത്തതിനെ തുടർന്ന് ബാത്ത്റൂമിൽ വെച്ച് ഈർച്ചവാൾ ഉപയോഗിച്ച് വെട്ടിമാറ്റുകയായിരുന്നുവെന്ന് ഇയാൾ സമ്മതിച്ചു. പിന്നീട് മൃതദേഹാവശിഷ്ടങ്ങൾ മാലിന്യത്തിൽ തള്ളി.
രണ്ടു വർഷത്തിലേറെയായിട്ടും മംതയുടെ മൃതദേഹം ഇതുവരെ കണ്ടെത്താൻ കഴിഞ്ഞിട്ടില്ല. ഒന്നാം ഡിഗ്രി കൊലപാതകം, മൃതദേഹം ഒളിപ്പിക്കൽ, മൃതദേഹത്തോട് അനാദരവ് കാണിക്കൽ എന്നീ കുറ്റങ്ങളാണ് നരേഷ് ഭട്ടിനെതിരെ ചുമത്തിയിട്ടുള്ളത്. ഒന്നാം ഡിഗ്രി കൊലപാതകത്തിന് ജീവപര്യന്തം തടവുശിക്ഷ ലഭിക്കാമെന്നിരിക്കെ, മരണം ആത്മഹത്യയാണെന്ന് വരുത്തിതീർത്ത് ശിക്ഷാ ഇളവ് നേടാനാണ് ഇയാൾ ശ്രമിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Indian Man Admits Disposing Wife’s Body in US’
