നോവ സ്കോഷ്യ: ശമ്പളവര്‍ധന ആവശ്യപ്പെട്ട് നോവ സ്‌കോഷ്യയിലെ സ്‌കൂള്‍ സപ്പോര്‍ട്ട് ജീവനക്കാര്‍ തിങ്കളാഴ്ച പണിമുടക്കിയേക്കും. പ്രവിശ്യാ സര്‍ക്കാരും സ്‌കൂള്‍ ബോര്‍ഡ് അധികൃതരും തൊഴിലാളി യൂണിയനുമായി ധാരണയിലെത്തിയില്ലെങ്കില്‍ 5,500-ലധികം ജീവനക്കാര്‍ സമരത്തില്‍ പങ്കെടുക്കും.
എട്ട് കനേഡിയന്‍ യൂണിയന്‍ ഓഫ് പബ്ലിക് എംപ്ലോയീസ് (CUPE) പ്രാദേശിക യൂണിറ്റുകളെ പ്രതിനിധീകരിക്കുന്ന നോവ സ്കോഷ്യ സ്‌കൂള്‍ ബോര്‍ഡ് കൗണ്‍സില്‍ ഓഫ് യൂണിയന്‍സ് (NSSBCU) വെള്ളിയാഴ്ച 48 മണിക്കൂര്‍ മുന്‍കൂര്‍ സമരനോട്ടീസ് നല്‍കാനാണ് തീരുമാനിച്ചിരിക്കുന്നത്. 2029-ഓടെ മണിക്കൂറിന് കുറഞ്ഞത് 3.50 ഡോളറിന്റെ ശമ്പളവര്‍ധന ഉറപ്പുനല്‍കുന്ന നിര്‍ദേശമാണ് യൂണിയന്‍ ആവശ്യപ്പെടുന്നത്.
വിദ്യാര്‍ത്ഥികള്‍ക്കും കുടുംബങ്ങള്‍ക്കും ആവശ്യമായ സേവനങ്ങള്‍ നല്‍കുന്ന സ്‌കൂളുകളില്‍ ജോലി തുടരാനാണ് ജീവനക്കാര്‍ ആഗ്രഹിക്കുന്നതെന്നും എന്നാല്‍ ന്യായമായ കരാറിനായി ഒരുമിച്ച് പോരാടാന്‍ അംഗങ്ങള്‍ തയ്യാറാണെന്നും യൂണിയന്‍ അധ്യക്ഷന്‍ നെല്‍സണ്‍ സ്‌കോട്ട് പറഞ്ഞു. പ്രശ്‌നം പരിഹരിക്കാനുള്ള വിഭവങ്ങളും ഉത്തരവാദിത്വവും സര്‍ക്കാരിനുണ്ടെന്നും അദ്ദേഹം വ്യക്തമാക്കി. ബസ് ഡ്രൈവര്‍മാര്‍, ശുചീകരണ തൊഴിലാളികള്‍, വിദ്യാഭ്യാസ സഹായികള്‍, സെക്രട്ടറിമാര്‍, കഫറ്റീരിയ ജീവനക്കാര്‍ എന്നിവരും സമരത്തില്‍ പങ്കെടുക്കാന്‍ സാധ്യതയുണ്ട്.
ALSO READ: സ്റ്റെല്ലാന്റിസിൽ പണിമുടക്ക് ഭീഷണി: 97.3% വോട്ടോടെ പിന്തുണച്ച് തൊഴിലാളികൾ
പണിമുടക്ക് ഉണ്ടായാല്‍ ഓരോ മേഖലയിലും വ്യത്യസ്തമായിരിക്കും പ്രത്യാഘാതമെന്ന് പ്രവിശ്യാ സര്‍ക്കാര്‍ അറിയിച്ചു. ചില സ്‌കൂളുകളില്‍ ക്ലാസുകള്‍ സാധാരണ നിലയില്‍ തുടര്‍ന്നേക്കാം. മറ്റിടങ്ങളില്‍ വിദ്യാര്‍ത്ഥികള്‍ക്ക് ഓണ്‍ലൈന്‍ പഠനത്തിലേക്ക് മാറേണ്ടിവരും. ചില പ്രദേശങ്ങളില്‍ സ്‌കൂള്‍ ബസ് സര്‍വീസുകള്‍ നിര്‍ത്തിവയ്ക്കുകയും പ്രീ-പ്രൈമറി, സ്‌കൂളിന് മുമ്പും ശേഷവുമുള്ള പരിചരണ പരിപാടികള്‍ റദ്ദാക്കുകയും ചെയ്യും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Nova Scotia School Staff Strike’
