ഓട്ടവ: യുഎസ്, യുകെ, കാനഡ എന്നീ രാജ്യങ്ങളിലെ പ്രമുഖ സർവകലാശാലകളിൽ 2027 ലെ ഫാൾ ഇൻടേക്കിനുള്ള നടപടികൾ ആരംഭിച്ചു. ഉന്നതവിദ്യാഭ്യാസം ലക്ഷ്യമിടുന്ന വിദ്യാർത്ഥികൾക്ക് സർവകലാശാലകളുടെ ഔദ്യോഗിക പോർട്ടലുകൾ വഴി ഇപ്പോൾ അപേക്ഷകൾ സമർപ്പിച്ചു തുടങ്ങാം. സ്ഥാപനങ്ങളും തിരഞ്ഞെടുക്കുന്ന കോഴ്സുകളും അനുസരിച്ച് അപേക്ഷാ സമയപരിധിയിൽ വ്യത്യാസമുണ്ടാകും.
അപേക്ഷകൾ നേരത്തെ സമർപ്പിക്കുന്നത് വിദ്യാർത്ഥികൾക്ക് പ്രവേശനം ഉറപ്പാക്കാനും വിവിധ സ്കോളർഷിപ്പുകളും സാമ്പത്തിക സഹായങ്ങളും കരസ്ഥമാക്കാനും ഏറെ സഹായകരമാകും. പ്രവേശന പ്രക്രിയയിലെ ഉയർന്ന മത്സരം ഒഴിവാക്കാനും അവസാന നിമിഷത്തെ തിരക്കുകൾ ഇല്ലാതാക്കാനും ഇത് സഹായിക്കും. അതാത് സർവകലാശാലകളുടെ നിബന്ധനകൾ കൃത്യമായി മനസ്സിലാക്കി വേണം നടപടികൾ ആരംഭിക്കാൻ.
അമേരിക്കയിലെ സർവകലാശാലകളിൽ ഏർലി ഡിസിഷൻ അപേക്ഷകൾ സമർപ്പിക്കാനുള്ള അവസാന തീയതി 2026 നവംബർ 1 നും 15 നും ഇടയിലാണ്. റെഗുലർ ഡിസിഷൻ അപേക്ഷകൾക്ക് 2027 ജനുവരി 1 മുതൽ 15 വരെയുമാണ് സമയം അനുവദിച്ചിട്ടുള്ളത്. ബിരുദാനന്തര, ഗവേഷണ കോഴ്സുകളിലെ ഫണ്ടിംഗ് അപേക്ഷകൾ 2026 ഡിസംബർ മുതൽ 2027 ജനുവരി വരെയുള്ള കാലയളവിൽ പൂർത്തിയാക്കേണ്ടതുണ്ട്.
യുകെയിൽ ബിരുദ കോഴ്സുകളിലേക്കുള്ള അപേക്ഷകൾ യുകാസ് (UCAS) പോർട്ടൽ വഴി 2026 സെപ്റ്റംബർ 1 മുതൽ സ്വീകരിച്ചു തുടങ്ങിയിട്ടുണ്ട്. അവസാന തീയതി 2027 ജനുവരി 13 ആണ്. അതേസമയം, ഓക്‌സ്‌ഫോർഡ്, കേംബ്രിഡ്ജ് സർവകലാശാലകൾക്കും മെഡിക്കൽ കോഴ്‌സുകൾക്കും അപേക്ഷ സമർപ്പിക്കേണ്ട അവസാന തീയതി മുമ്പത്തെ സമയപരിധി പാലിക്കണം.
കാനഡയിലെ വിവിധ സർവകലാശാലകളിൽ 2027 സെപ്റ്റംബർ പ്രവേശനത്തിനായുള്ള പോർട്ടലുകൾ സജീവമായിട്ടുണ്ട്. ഭൂരിഭാഗം പ്രോഗ്രാമുകളുടെയും അപേക്ഷാ സമർപ്പണം 2027 ജനുവരി 15 നും ഫെബ്രുവരി 1 നും ഇടയിൽ അവസാനിക്കും. സ്ഥാപനവും കോഴ്സും അനുസരിച്ച് തീയതികളിൽ മാറ്റം വരാൻ സാധ്യതയുള്ളതിനാൽ വിദ്യാർത്ഥികൾ സൈറ്റുകൾ നേരിട്ട് പരിശോധിക്കണം.
അപേക്ഷ സമർപ്പിക്കുന്നതിനൊപ്പം ബാങ്ക് രേഖകളും സ്റ്റഡി പെർമിറ്റിന് ആവശ്യമായ വിവരങ്ങളും വിദ്യാർത്ഥികൾ മുൻകൂട്ടി സജ്ജമാക്കേണ്ടതാണ്. കാനഡ പോലെയുള്ള രാജ്യങ്ങളിലേക്ക് അപേക്ഷിക്കുന്നവർ ആവശ്യമെങ്കിൽ ഗ്യാരണ്ടീഡ് ഇൻവെസ്റ്റ്മെന്റ് സർട്ടിഫിക്കറ്റ് (GIC) ഉൾപ്പെടെയുള്ള കാര്യങ്ങൾ നേരത്തെ ക്രമീകരിക്കണം. കൃത്യമായ പ്ലാനിംഗിലൂടെ പ്രവേശന നടപടികൾ എളുപ്പമാക്കാം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
