സാൻ ഫ്രാൻസിസ്കോ: ആപ്പിളിന്റെ ഫോൾഡബിൾ ഫോണായ ഐഫോൺ ഡ്യുവോയുടെ അകത്തെ ഡിസ്പ്ലേയിൽ തകരാർ കണ്ടെത്തിയതിനെ തുടർന്ന് പ്രശ്നമുള്ള ഫോണുകൾ മാറ്റിനൽകുമെന്ന് കമ്പനി അറിയിച്ചു. ഡിസ്പ്ലേയിൽ വിള്ളലുകളോ വരകളോ പ്രത്യക്ഷപ്പെട്ടാൽ ആപ്പിൾ കെയറുമായി ബന്ധപ്പെടണം.
വിപണിയിലെത്തി ദിവസങ്ങൾക്കകമാണ് ഫോണിന്റെ ഡിസ്പ്ലേയിൽ തകരാർ റിപ്പോർട്ട് ചെയ്തത്. ഹിഞ്ചിന് സമീപം വിള്ളലുകളും വരകളും പ്രത്യക്ഷപ്പെട്ടതായി ഉപയോക്താക്കൾ സോഷ്യൽ മീഡിയയിൽ പങ്കുവച്ചിരുന്നു. തകരാറിന്റെ കാരണം ആപ്പിൾ ഇതുവരെ വ്യക്തമാക്കിയിട്ടില്ല.
കഴിഞ്ഞ ആഴ്ചയാണ് ഫോണിന്റെ വിതരണം ആരംഭിച്ചത്. ഓൺലൈൻ വിൽപ്പന തുടങ്ങി മിനിറ്റുകൾക്കകം സ്റ്റോക്ക് തീർന്നിരുന്നു. ഫോണിന്റെ നിർമാണത്തിലെ സങ്കീർണതകൾ ആഗോളതലത്തിൽ ലഭ്യത കുറയാൻ കാരണമായേക്കാമെന്ന് നേരത്തെ വിദഗ്ധർ വിലയിരുത്തിയിരുന്നു.
ഫോണിന്റെ ഹിഞ്ച് സംവിധാനത്തെക്കുറിച്ച് ഐഫിക്സിറ്റ് നടത്തിയ പഠനത്തിലും ഡിസ്പ്ലേ തകരാറുമായി ബന്ധപ്പെട്ട സൂചനകളുണ്ട്. ഫോൺ മടക്കുമ്പോൾ ഡിസ്പ്ലേ കേബിൾ കടന്നുപോകുന്ന ഭാഗത്തിന് സമീപം സമ്മർദം ഉണ്ടാകാമെന്നാണ് പഠനത്തിലെ കണ്ടെത്തൽ. ഹിഞ്ചിലെ സപ്പോർട്ട് ബാർ ഡിസ്പ്ലേയിൽ സമ്മർദമുണ്ടാക്കുന്നതാകാം വിള്ളലിന് കാരണമെന്നും ഐഫിക്സിറ്റ് ചൂണ്ടിക്കാട്ടി. എന്നാൽ ഈ കണ്ടെത്തലുകൾ ആപ്പിൾ സ്ഥിരീകരിച്ചിട്ടില്ല. തങ്ങൾ പരിശോധിച്ച ഫോൾഡബിൾ ഫോണുകളിൽ അറ്റകുറ്റപ്പണി നടത്താൻ ഏറ്റവും എളുപ്പമുള്ള ഫോണാണ് ഐഫോൺ ഡ്യുവോയെന്നും ഐഫിക്സിറ്റ് വിലയിരുത്തി.
തകരാറുള്ള ഫോണുകൾ മാറ്റിനൽകാമെന്ന കമ്പനിയുടെ തീരുമാനം പ്രശ്നം കൈകാര്യം ചെയ്യുന്നതിലെ ശരിയായ ആദ്യ നടപടിയാണെന്ന് ഐ.ഡി.സി വൈസ് പ്രസിഡന്റ് ഫ്രാൻസിസ്കോ ജെറോനിമോ പറഞ്ഞു. 2019-ൽ സാംസങ്ങിന്റെ ആദ്യ ഗാലക്സി ഫോൾഡ് ഫോണും സമാനമായ പ്രശ്നങ്ങൾ നേരിട്ടിരുന്നു. അന്ന് കമ്പനി വേഗത്തിലും സുതാര്യമായും പ്രതികരിച്ചത് ഇത്തരം പ്രശ്നങ്ങൾ കൈകാര്യം ചെയ്യുന്നതിൽ പ്രധാനമായിരുന്നുവെന്നും അദ്ദേഹം പറഞ്ഞു
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
