ടൊറന്റോ: ഒക്ടോബർ 26-ന് നടക്കുന്ന ടൊറന്റോ മേയർ തിരഞ്ഞെടുപ്പ് അന്തിമഘട്ടത്തിലേക്ക് കടക്കവെ ഡിജിറ്റൽ പ്രചാരണ രംഗത്ത് വൻ തുക ഒഴുക്കി പ്രധാന സ്ഥാനാർത്ഥികൾ. സർവേകളിൽ പോരാട്ടം പ്രവചനാതീതമായി തുടരുന്ന പശ്ചാത്തലത്തിൽ, നിലവിലെ മേയർ ഒലീവിയ ചൗവും എതിരാളി ബ്രാഡ് ബ്രാഡ്ഫോർഡും വോട്ടർമാരെ സ്വാധീനിക്കാൻ സോഷ്യൽ മീഡിയ പരസ്യങ്ങൾക്കായി പതിനായിരക്കണക്കിന് ഡോളറാണ് ചെലവഴിക്കുന്നത്. ഫെയ്‌സ്ബുക്ക്, ഇൻസ്റ്റാഗ്രാം എന്നിവ ഉൾപ്പെടുന്ന മെറ്റാ പ്ലാറ്റ്‌ഫോമുകളിലൂടെ പരസ്പരം കടന്നാക്രമിച്ചും സ്വന്തം അനുകൂലികളെ ആവേശത്തിലാക്കിയുമാണ് ഇരുവരുടെയും പ്രചാരണം.
മെറ്റാ ആഡ് ലൈബ്രറിയിൽ നിന്നുള്ള വിവരങ്ങൾ പ്രകാരം ഒക്ടോബർ 14 നും 20 നും ഇടയിലുള്ള ഒറ്റ ആഴ്ചയിൽ മാത്രം രണ്ടു സ്ഥാനാർത്ഥികളും കൂടി 40,000 ഡോളറിലധികം പരസ്യങ്ങൾക്കായി ചെലവഴിച്ചു. ഇതിൽ ഒലീവിയ ചൗ 30,694 ഡോളർ ചെലവഴിച്ചപ്പോൾ ബ്രാഡ് ബ്രാഡ്‌ഫോർഡിന്റെ ചെലവ് 12,952 ഡോളറാണ്. ഓഗസ്റ്റ് മാസങ്ങളിൽ പ്രചാരണ രംഗത്ത് ബ്രാഡ്‌ഫോർഡായിരുന്നു മുന്നിലെങ്കിൽ സെപ്റ്റംബർ പകുതിയോടെ ഒലീവിയ ചൗ വേഗം കൂട്ടുകയും പരസ്യച്ചെലവിൽ ബ്രാഡ്‌ഫോർഡിനെ മറികടക്കുകയുമായിരുന്നുവെന്ന് രാഷ്ട്രീയ നിരീക്ഷണ ഏജൻസിയായ ഇ.ഒ.കെ കൺസൾട്ട് വ്യക്തമാക്കി.
നിലവിൽ ഒലീവിയ ചൗ പ്രതിദിനം അയ്യായിരം ഡോളറോളം പരസ്യങ്ങൾക്കായി മാറ്റിവെക്കുമ്പോൾ, ബ്രാഡ്‌ഫോർഡ് 1,700 ഡോളറോളമാണ് ചെലവഴിക്കുന്നത്. പ്രധാനമായും മുതിർന്ന വോട്ടർമാരെ ലക്ഷ്യമിട്ടാണ് ബ്രാഡ്‌ഫോർഡിന്റെ പരസ്യങ്ങൾ. അതേസമയം വനിതകളെയും ഉന്നത വിദ്യാഭ്യാസമതിയെയുമാണ് ഒലീവിയ ചൗ കൂടുതലായി ലക്ഷ്യമിടുന്നത്. ഇതിന് പുറമെ ഇരു സ്ഥാനാർത്ഥികൾക്കും പിന്തുണയുമായി എബിസി ടൊറന്റോ, പ്രോഗ്രസ്സ് ടൊറന്റോ എന്നീ സാമൂഹിക സംഘടനകളും ആയിരക്കണക്കിന് ഡോളറിന്റെ പരസ്യ പ്രചാരണം നടത്തുന്നുണ്ട്.
അവസാനവട്ട സർവേ ഫലങ്ങൾ പുറത്തുവന്നതോടെയാണ് തിരഞ്ഞെടുപ്പ് പോരാട്ടം കൂടുതൽ കടുത്തിരിക്കുന്നത്. ലൈസൺ സ്ട്രാറ്റജീസ് ബുധനാഴ്ച പുറത്തുവിട്ട ഏറ്റവും പുതിയ സർവേയിൽ ബ്രാഡ് ബ്രാഡ്‌ഫോർഡ് 49 ശതമാനം വോട്ടുകളോടെ നേരിയ മുൻതൂക്കം നേടിയപ്പോൾ ഒലീവിയ ചൗ 47 ശതമാനം വോട്ടുകളുമായി തൊട്ടുപിന്നിലുണ്ട്. മൂന്ന് ശതമാനം വോട്ടർമാർ മറ്റു സ്ഥാനാർത്ഥികളെ പിന്തുണയ്ക്കുന്നു. മത്സരത്തിൽ മേൽക്കൈ നഷ്ടമാകുമെന്ന ഘട്ടം വന്നതോടെയാണ് ഒലീവിയ ചൗ എതിരാളിക്കെതിരെ കടുത്ത ഭാഷയിലുള്ള ഡിജിറ്റൽ ആക്രമണ പരസ്യങ്ങളിലേക്ക് കടന്നത്.
നഗരത്തിലെ നികുതി വർദ്ധനവ്, ഗതാഗതക്കുരുക്ക്, സുരക്ഷാ ആശങ്കകൾ എന്നിവ ചൂണ്ടിക്കാട്ടി ഒലീവിയ ചൗവിന്റെ ഭരണപരാജയങ്ങളെ ബ്രാഡ്‌ഫോർഡ് പരസ്യങ്ങളിലൂടെ ചോദ്യം ചെയ്യുമ്പോൾ, ബ്രാഡ്‌ഫോർഡിനെ വിശ്വസിക്കാൻ കൊള്ളില്ലെന്ന രീതിയിലാണ് ഒലീവിയ ചൗവിന്റെ ഡിജിറ്റൽ പരസ്യങ്ങൾ. തങ്ങളുടെ വോട്ടർമാർ കൃത്യമായി വോട്ടിംഗ് ബൂത്തിലെത്തുന്നുണ്ടെന്ന് ഉറപ്പാക്കാനും കൂടിയാണ് അവസാന മണിക്കൂറുകളിൽ ഇത്തരം ഡിജിറ്റൽ പ്രചാരണങ്ങൾ സ്ഥാനാർത്ഥികൾ ശക്തമാക്കുന്നത്. മുൻവർഷങ്ങളെ അപേക്ഷിച്ച് ഇത്തവണ മുൻകൂർ വോട്ടിംഗിൽ വൻ പങ്കാളിത്തമാണ് രേഖപ്പെടുത്തിയിട്ടുള്ളത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
