സാസ്‌കറ്റൂണ്‍: കാനഡയിലെ കുടിയേറ്റ നയങ്ങളില്‍ പ്രവിശ്യകള്‍ക്ക് കൂടുതല്‍ നിയന്ത്രണം നല്‍കണമെന്ന നിലപാടുമായി സസ്‌കാച്വാന്‍ പ്രീമിയര്‍ സ്‌കോട്ട് മോ. ആല്‍ബര്‍ട്ടയില്‍ നടന്ന റഫറണ്ടത്തിലെ ഫലത്തെ സ്വാഗതം ചെയ്ത അദ്ദേഹം, കുടിയേറ്റം സാമ്പത്തിക ആവശ്യങ്ങള്‍ക്ക് മുന്‍ഗണന നല്‍കുന്ന രീതിയിലാകണമെന്നും അഭിപ്രായപ്പെട്ടു. തിങ്കളാഴ്ച നടന്ന റഫറണ്ടത്തില്‍ കുടിയേറ്റ നിയന്ത്രണവുമായി ബന്ധപ്പെട്ട ചോദ്യത്തിന് 56 ശതമാനത്തിലധികം പേര്‍ അനുകൂലമായി വോട്ട് ചെയ്‌തെന്നാണ് പ്രാഥമിക കണക്ക്.
കുടിയേറ്റത്തിലൂടെ രാജ്യത്തെത്തുന്നവരെ തിരഞ്ഞെടുക്കുമ്പോള്‍ സാമ്പത്തിക കുടിയേറ്റത്തിന് മുന്‍ഗണന നല്‍കണമെന്ന് സ്‌കോട്ട് മോ ചൊവ്വാഴ്ച പറഞ്ഞു. സസ്‌കാച്വാന്‍, ആല്‍ബര്‍ട്ട തുടങ്ങിയ പ്രവിശ്യകളുടെ ആവശ്യങ്ങള്‍ അറ്റ്‌ലാന്റിക് കാനഡയിലെ പ്രവിശ്യകളില്‍നിന്ന് വ്യത്യസ്തമായിരിക്കാം. അതിനാല്‍ ഫെഡറല്‍ സര്‍ക്കാരും പ്രവിശ്യകളും സഹകരിച്ച് നയങ്ങള്‍ രൂപീകരിക്കണമെന്നും അദ്ദേഹം വ്യക്തമാക്കി.
അതേസമയം, കുടിയേറ്റം നിയന്ത്രിതവും സുസ്ഥിരവുമായ നിലയിലെത്തിക്കാനുള്ള നടപടികള്‍ സര്‍ക്കാര്‍ ഇതിനകം ആരംഭിച്ചിട്ടുണ്ടെന്ന് പ്രധാനമന്ത്രി മാര്‍ക്ക് കാര്‍ണി പറഞ്ഞു. ഭരണഘടനയില്‍ മാറ്റം വരുത്താതെ തന്നെ ഫെഡറല്‍ സര്‍ക്കാരിനും പ്രവിശ്യകള്‍ക്കും സഹകരിച്ച് ഫലപ്രദമായ കുടിയേറ്റ സംവിധാനം ഒരുക്കാനാകുമെന്നും അദ്ദേഹം കൂട്ടിച്ചേര്‍ത്തു.
ALSO READ: ക്യുബെക്ക് മാതൃകയിൽ ആൽബർട്ടയ്ക്കും കുടിയേറ്റ അധികാരം? തള്ളിക്കളയാതെ മാർക്ക് കാർണി
കാനഡയില്‍ സ്ഥിരതാമസക്കാരായി എത്തിയവരുടെ എണ്ണം 2024-ല്‍ റെക്കോര്‍ഡ് ഉയരത്തിലെത്തിയിരുന്നു. അന്ന് 4,83,640 പേരാണ് സ്ഥിരതാമസാനുമതി നേടിയത്. 2025-ല്‍ ഇത് ഏകദേശം 3,93,500 ആയി കുറഞ്ഞു. ഭവനപ്രതിസന്ധിയും സാമൂഹിക സേവനങ്ങള്‍ക്കുമേലുള്ള സമ്മര്‍ദ്ദവും കുടിയേറ്റത്തെക്കുറിച്ചുള്ള പൊതുചര്‍ച്ചകളില്‍ പ്രധാന വിഷയങ്ങളായി മാറിയിട്ടുണ്ടെന്ന് വന്‍കൂവര്‍ ഐലന്‍ഡ് സര്‍വകലാശാലയിലെ ഗവേഷകന്‍ ഡാനിയല്‍ വെസ്റ്റ്‌ലേക്ക് ചൂണ്ടിക്കാട്ടി.
നിലവില്‍ സസ്‌കാച്വാന്‍ ഇമിഗ്രന്റ് നോമിനി പ്രോഗ്രാം വഴി സാമ്പത്തിക കുടിയേറ്റക്കാരെയും സംരംഭകരെയും സ്ഥിരതാമസത്തിനായി നാമനിര്‍ദേശം ചെയ്യാന്‍ പ്രവിശ്യയ്ക്ക് അധികാരമുണ്ട്. 2026-ലെ പദ്ധതിയില്‍ അനുവദിച്ച 5,261 നാമനിര്‍ദേശങ്ങളില്‍ 4,023 എണ്ണം ഇതിനകം നല്‍കിയിട്ടുണ്ട്. എന്നാല്‍ താല്‍ക്കാലിക വിദേശ തൊഴിലാളികളും അന്താരാഷ്ട്ര വിദ്യാര്‍ത്ഥികളും ഉള്‍പ്പെടെ എല്ലാ വിഭാഗം കുടിയേറ്റക്കാരെയും ഈ പദ്ധതി ഉള്‍ക്കൊള്ളുന്നില്ല.
അടുത്തയാഴ്ച ഓട്ടവയില്‍ പ്രധാനമന്ത്രിയും പ്രവിശ്യാ പ്രീമിയര്‍മാരും കൂടിക്കാഴ്ച നടത്താനിരിക്കെ കുടിയേറ്റ നിയന്ത്രണം ചര്‍ച്ചാവിഷയമാകുമെന്ന് സ്‌കോട്ട് മോ പ്രതീക്ഷിക്കുന്നു. എന്നാല്‍ നിലവിലുള്ള പ്രവിശ്യാ നാമനിര്‍ദേശ പദ്ധതികള്‍ക്കപ്പുറം കൂടുതല്‍ അധികാരം നല്‍കുന്നതില്‍ ഫെഡറല്‍ സര്‍ക്കാര്‍ എന്ത് നിലപാട് സ്വീകരിക്കുമെന്നത് വ്യക്തമല്ലെന്ന് വെസ്റ്റ്‌ലേക്ക് പറഞ്ഞു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Saskatchewan Premier Wants Provinces to Control Immigration’
