അഭിപ്രായ സ്വാതന്ത്ര്യം കവർന്നെടുക്കുന്നോ? ഇന്ത്യയിലെ യുവജന സമരത്തിൽ പിന്തുണയുമായി മോൺട്രിയൽ ജനത

മോൺട്രിയൽ: ഇന്ത്യയിലെ യുവാക്കളുടെ സമരത്തിന് പിന്തുണ പ്രഖ്യാപിച്ച് മോൺട്രിയൽ നഗരത്തിൽ വലിയ പ്രതിഷേധ മാർച്ച് നടന്നു. തിങ്കളാഴ്ച ഉച്ചയ്ക്ക് നോർമൻ ബെത്യൂൺ സ്ക്വയറിലായിരുന്നു ഇന്ത്യക്കാരും സാമൂഹിക പ്രവർത്തകരും ഉൾപ്പെടെയുള്ളവർ ഒത്തുകൂടിയത്. ഇന്ത്യയിൽ ജനാധിപത്യം തകരുകയാണെന്നും, സർക്കാരിനെതിരെ ശബ്ദമുയർത്തുന്നവരെ പോലീസ് കർശനമായി അടിച്ചമർത്തുകയാണെന്നും പ്രകടനക്കാർ ആരോപിച്ചു.

ഇന്ത്യയിലുള്ള തങ്ങളുടെ സുഹൃത്തുക്കളുടെയും ബന്ധുക്കളുടെയും സുരക്ഷയെക്കുറിച്ച് വലിയ ആശങ്കയുണ്ടെന്ന് പ്രതിഷേധത്തിൽ പങ്കെടുത്തവർ വ്യക്തമാക്കി. ഇന്ത്യയിലെ ‘കോക്രോച്ച്’ എന്നറിയപ്പെടുന്ന യുവജന പ്രസ്ഥാനത്തിന് പിന്തുണ പ്രഖ്യാപിച്ചായിരുന്നു പ്രകടനം. വോട്ടർ പട്ടികയിലെ ക്രമക്കേടുകൾക്കും വിദ്യാർത്ഥി സമരങ്ങൾക്കുമെതിരെ നടക്കുന്ന അടിച്ചമർത്തലുകളിൽ പ്രതിഷേധിച്ചാണ് വിദേശത്തുള്ള ഇന്ത്യക്കാർ ഒത്തുകൂടുന്നത്.

കഴിഞ്ഞ വർഷം വോട്ടർ പട്ടിക പരിഷ്കരിച്ചതിനെ തുടർന്ന് 130 ദശലക്ഷത്തിലധികം വോട്ടർമാരെ ഒഴിവാക്കിയതാണ് ഇപ്പോഴത്തെ പ്രതിഷേധങ്ങൾക്ക് പ്രധാന കാരണമായത്. ഇതോടൊപ്പം ചോദ്യപേപ്പർ ചോർച്ചയും അഴിമതി ആരോപണങ്ങളും ഉയർന്നതോടെ വിദ്യാർത്ഥികളും യുവാക്കളും തെരുവിലിറങ്ങി. ചീഫ് ജസ്റ്റിസിന്റെ ഒരു പരാമർശത്തിൽ നിന്നാണ് ‘കോക്രോച്ച്’ എന്ന പേരിൽ ഈ യുവജന പ്രസ്ഥാനം അറിയപ്പെടാൻ തുടങ്ങിയത്.

മുഖ്യ തിരഞ്ഞെടുപ്പ് കമ്മീഷണർ രാജി വെക്കണമെന്ന് ആവശ്യപ്പെട്ട് പ്രതിപക്ഷ പാർട്ടികളും സമരത്തിൽ ഒപ്പമുണ്ട്. എന്നാൽ, വോട്ടർ പട്ടികയിലെ തെറ്റായ പേരുകൾ നീക്കം ചെയ്യുക മാത്രമാണ് ചെയ്തതെന്നും, ഈ ആരോപണങ്ങളെല്ലാം വ്യാജമാണെന്നുമാണ് ബിജെപിയുടെയും തിരഞ്ഞെടുപ്പ് കമ്മീഷന്റെയും നിലപാട്. അതേസമയം, വീക്കെൻഡിൽ ആയിരക്കണക്കിന് സമരക്കാരെ പോലീസ് കസ്റ്റഡിയിലെടുത്തത് വലിയ സംഘർഷത്തിന് ഇടയാക്കിയിട്ടുണ്ട്.

ഇന്ത്യയിലെ ക്രമസമാധാനം തകരുന്നതിലും, തുറന്നു സംസാരിക്കാനുള്ള സ്വാതന്ത്ര്യം ഇല്ലാതാകുന്നതിലും തങ്ങൾക്ക് ഭയമുണ്ടെന്ന് പ്രതിഷേധക്കാർ പറഞ്ഞു. ഇന്ത്യക്കാർക്ക് പുറമെ അയൽരാജ്യങ്ങളിൽ നിന്നുള്ളവരും മനുഷ്യാവകാശ പ്രവർത്തകരും പ്രകടനത്തിൽ പങ്കെടുത്തു. ലോകമെമ്പാടും തീവ്ര ദേശീയത വളരുന്നതിന്റെ തെളിവാണ് ഇന്ത്യയിലെ സംഭവങ്ങളെന്ന് ഇവർ ചൂണ്ടിക്കാട്ടുന്നു.

Also Read: ജോർജിയയിലെ റൈഡ് അപകടം; കാനഡയിലെ വണ്ടർലാന്റിൽ 2 പ്രമുഖ റോളർ കോസ്റ്ററുകൾ താല്‍ക്കാലികമായി പൂട്ടി

ഇന്ത്യയുമായി വർഷാവസാനത്തോടെ സ്വതന്ത്ര വ്യാപാര കരാറിൽ ഒപ്പുവെക്കാൻ കാനഡ തയാറെടുക്കുന്നതിനിടെയാണ് ഈ പ്രതിഷേധങ്ങൾ അരങ്ങേറുന്നത്. ഇതിന്റെ ഭാഗമായി കനേഡിയൻ അന്താരാഷ്ട്ര വ്യാപാര മന്ത്രി മനീന്ദർ സിദ്ധു ഈ ആഴ്ച ഇന്ത്യ സന്ദർശിക്കുന്നുണ്ട്. സാമ്പത്തിക ബന്ധങ്ങൾ ശക്തമാക്കുമ്പോഴും മനുഷ്യാവകാശ സംരക്ഷണത്തിന് കാനഡ മുൻഗണന നൽകണമെന്ന് പ്രതിഷേധക്കാർ ആവശ്യപ്പെടുന്നു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z