ഓട്ടവ: യുഎസ് സംരക്ഷണ പദവി അവസാനിപ്പിച്ചതിനെത്തുടർന്ന് ദുരിതമനുഭവിക്കുന്ന ഹെയ്തിക്കാർക്ക് കാനഡയിൽ സ്ഥിരതാമസം നേടാൻ അവസരമൊരുങ്ങുന്നു. ഫ്രഞ്ച് ഭാഷ സംസാരിക്കുന്നവർക്കായി കാനഡ നടപ്പിലാക്കുന്ന എക്സ്പ്രസ് എൻട്രി പദ്ധതി വഴി 6 മാസത്തിനുള്ളിൽ നടപടികൾ പൂർത്തിയാക്കാൻ സാധിക്കും. അമേരിക്കയിൽ നിന്ന് പലായനം ചെയ്യേണ്ടി വരുന്ന ഹെയ്തി പൗരന്മാർക്ക് കാനഡയുടെ ഈ എക്സ്പ്രസ് എൻട്രി സിസ്റ്റം വലിയ ആശ്വാസമാകുകയാണ്.
ഫ്രഞ്ച് ഭാഷ അറിയാവുന്ന അപേക്ഷകർക്ക് കാനഡയുടെ എക്സ്പ്രസ് എൻട്രി സിസ്റ്റത്തിൽ പ്രത്യേക മുൻഗണന ലഭിക്കുന്നുണ്ട്. ഓരോ വർഷവും ഒരു ലക്ഷത്തിലധികം ആളുകൾക്കാണ് ഈ രീതിയിലൂടെ കാനഡ സ്ഥിരതാമസം നൽകുന്നത്. ഫ്രഞ്ച് ഭാഷാ പ്രാവീണ്യമുള്ളവർക്ക് അധിക പോയിന്റുകൾ ലഭിക്കുമെന്നതും, ഇവർക്കായി മാത്രം പ്രത്യേക സെലക്ഷൻ റൗണ്ടുകൾ നടത്തുന്നു എന്നതും ഹെയ്തിക്കാർക്ക് കാര്യങ്ങൾ കൂടുതൽ എളുപ്പമാക്കുന്നു.
എക്സ്പ്രസ് എൻട്രി വഴി അപേക്ഷിക്കാൻ ആഗ്രഹിക്കുന്നവർ ഫെഡറൽ സ്കിൽഡ് വർക്കർ പ്രോഗ്രാം (FSWP) പോലുള്ള ഏതെങ്കിലും ഒരു പദ്ധതിയുടെ യോഗ്യതകൾ പൂർത്തിയാക്കണം. അംഗീകൃത ഭാഷാ പരീക്ഷ വിജയിച്ച ശേഷം ഒരു ഓൺലൈൻ പ്രൊഫൈൽ നിർമ്മിക്കുകയാണ് ആദ്യപടി. കാൻഡിഡേറ്റ് പൂളിൽ നിന്ന് തിരഞ്ഞെടുക്കപ്പെടുന്നവർക്ക് സ്ഥിര താമസത്തിന് അപേക്ഷിക്കാനുള്ള ക്ഷണം (ITA) ലഭിക്കും. തുടർന്ന് മെഡിക്കൽ പരിശോധനയും പോലീസ് സർട്ടിഫിക്കറ്റും ഉൾപ്പെടെയുള്ള രേഖകൾ സമർപ്പിക്കണം.
ഹെയ്തിക്കാർക്ക് ഏറ്റവും അനുയോജ്യമായ വഴി ഫെഡറൽ സ്കിൽഡ് വർക്കർ പ്രോഗ്രാം ആണ്. ഇതിനായി കഴിഞ്ഞ 10 വർഷത്തിനിടെ കുറഞ്ഞത് ഒരു വർഷത്തെ പ്രവൃത്തിപരിചയം ഉണ്ടായിരിക്കണം. കൂടാതെ, 100 പോയിന്റ് സെലക്ഷൻ സിസ്റ്റത്തിൽ കുറഞ്ഞത് 67 പോയിന്റും നേടണം. ഫ്രഞ്ചിലോ ഇംഗ്ലീഷിലോ ആവശ്യമായ ഭാഷാ യോഗ്യത, വിദ്യാഭ്യാസം, കാനഡയിൽ ജീവിക്കാനാവശ്യമായ പണം എന്നിവ തെളിയിക്കുന്ന രേഖകളും പ്രൊഫൈലിനൊപ്പം നൽകേണ്ടതുണ്ട്.
എക്സ്പ്രസ് എൻട്രി വഴി അപേക്ഷിക്കാനുള്ള ക്ഷണം ലഭിച്ചാൽ 60 ദിവസത്തിനകം പൂർണ്ണമായ അപേക്ഷ ഓൺലൈനായി സമർപ്പിക്കണം. അപേക്ഷ അംഗീകരിച്ചാൽ സ്ഥിര താമസത്തിനുള്ള സ്ഥിരീകരണ രേഖ (COPR) ലഭിക്കും. ഈ രേഖ ലഭിച്ച ശേഷം നിശ്ചിത സമയത്തിനുള്ളിൽ കാനഡയിലേക്ക് യാത്ര ചെയ്യാവുന്നതാണ്. അതിർത്തിയിലെ നടപടികൾ പൂർത്തിയാകുന്നതോടെ അപേക്ഷകർക്ക് ഔദ്യോഗികമായി സ്ഥിര താമസ പദവി ലഭിക്കും.
കാനഡയിൽ ലാൻഡ് ചെയ്ത ശേഷം അഞ്ച് വർഷത്തേക്ക് സാധുതയുള്ള പിആർ കാർഡ് തപാൽ വഴി അപേക്ഷകർക്ക് ലഭിക്കും. കാനഡയിലെ പൗരന്മാർക്ക് ലഭിക്കുന്ന എല്ലാ ജോലി, പഠന, സാമൂഹിക ആനുകൂല്യങ്ങളും ഈ പദവിയിലൂടെ ഹെയ്തിക്കാർക്കും ലഭ്യമാകും. കാനഡയിൽ 3 വർഷം പൂർത്തിയാക്കുന്നവർക്ക് സ്വാഭാവികമായി കനേഡിയൻ പൗരത്വത്തിന് അപേക്ഷിക്കാനും സാധിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
