വോൺ : ഒന്റാരിയോയിലെ വോണിൽ ഞായറാഴ്ച പുലർച്ചെയുണ്ടായ വാഹനാപകടത്തിൽ മലയാളി കാൽനടയാത്രക്കാരനായ തിരുവനന്തപുരം സ്വദേശി സുഗീഷ് മരിച്ചു. ട്രക്ക് ഡ്രൈവറായ സുഗീഷ് റോഡ് മുറിച്ചു കടക്കുന്നതിനിടെ വാഹനം ഇടിക്കുകയായിരുന്നു. കീൽ സ്ട്രീറ്റിന് സമീപം വെച്ചുണ്ടായ അപകടത്തിൽ ഗുരുതരമായി പരിക്കേറ്റ ഇയാൾ സംഭവസ്ഥലത്തുതന്നെ മരണപ്പെട്ടതായി ടോറന്റോ പോലീസ് ഔദ്യോഗികമായി സ്ഥിരീകരിച്ചു.
പരിക്കേറ്റ നിലയിൽ റോഡിൽ കിടന്നിരുന്ന ഇയാളുടെ ശരീരത്തിലൂടെ മറ്റൊരു വാഹനവും കയറിയിറങ്ങിയതായി പോലീസ് അറിയിച്ചു. വിവരമറിഞ്ഞ് ഉടൻതന്നെ പോലീസും രക്ഷാസംഘവും സംഭവസ്ഥലത്ത് എത്തിയെങ്കിലും ഇയാളുടെ ജീവൻ രക്ഷിക്കാൻ സാധിച്ചില്ല.
അപകടത്തെ തുടർന്ന് പ്രദേശത്ത് മണിക്കൂറുകളോളം ഗതാഗത നിയന്ത്രണം ഏർപ്പെടുത്തി. കീൽ സ്ട്രീറ്റിൽ ‘ദി ചിമ്മിനിസ്റ്റാക്ക് റോഡ്’ മുതൽ ‘യോർക്ക് ബൊളിവാർഡ്’ വരെയുള്ള ഭാഗം പോലീസ് പൂർണ്ണമായും അടച്ചിട്ടു. അപകടസ്ഥലത്തുനിന്ന് തെളിവുകൾ ശേഖരിച്ച ശേഷമാണ് ഗതാഗതം പുനഃസ്ഥാപിച്ചത്. സംഭവത്തിൽ പോലീസ് കൂടുതൽ അന്വേഷണം നടത്തിവരികയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
