കൊൽക്കത്ത: അന്താരാഷ്ട്ര സൗഹൃദ മത്സരത്തിൽ ഇന്ത്യയെ എതിരില്ലാത്ത നാല് ഗോളുകൾക്ക് തകർത്ത് ബ്രസീൽ. കൊൽക്കത്ത സാൾട്ട് ലേക്ക് സ്റ്റേഡിയത്തിൽ നടന്ന പോരാട്ടത്തിൽ സാമുവൽ ലിനോ ഇരട്ട ഗോളുകൾ നേടി. എസ്റ്റേവാവോ ഒരു ഗോളും അസിസ്റ്റും സ്വന്തമാക്കിയപ്പോൾ പെഡ്രോയാണ് ശേഷിക്കുന്ന ഗോൾ നേടിയത്.
അന്‍ചലോട്ടിയുടെ നേതൃത്വത്തിലുള്ള ബ്രസീല്‍ തുടക്കം മുതല്‍ ആക്രമണത്തിലായിരുന്നു. ആദ്യ 40 സെക്കന്‍ഡിനുള്ളില്‍ തന്നെ ബ്രസീലിന് കോര്‍ണര്‍ ലഭിച്ചു. ഇന്ത്യ ജാഗ്രതയോടെ പ്രതിരോധിച്ചെങ്കിലും ഏഴാം മിനിറ്റില്‍ ലാലെങ്മാവിയ റാള്‍ട്ടെയുടെ ഷോട്ടിലൂടെ ഇന്ത്യ ആദ്യ അവസരം സൃഷ്ടിച്ചു.
28-ാം മിനിറ്റിലാണ് ബ്രസീല്‍ മുന്നിലെത്തിയത്. ചെല്‍സി താരം എസ്റ്റേവാവോ ഇടതുവശത്തേക്ക് നീങ്ങി ആഷിഖ് കുരുണിയനെ മറികടന്ന് തൊടുത്ത ഷോട്ട് ഗോള്‍കീപ്പര്‍ ഗുര്‍പ്രീത് സിങ് സന്ധുവിന്റെ കൈയില്‍ തട്ടി വലയിലെത്തി. 42-ാം മിനിറ്റില്‍ എസ്റ്റേവാവോയുടെ ത്രൂബോളില്‍ നിന്ന് പെഡ്രോ ബ്രസീലിന്റെ ലീഡ് രണ്ടാക്കി.
രണ്ടാം പകുതിയില്‍ ഗുര്‍പ്രീതിന് പകരം പ്രഭ്‌സുഖന്‍ ഗില്‍ ഗോള്‍വല കാത്തു. ഇന്ത്യ ആക്രമണം ശക്തമാക്കാന്‍ മുഹമ്മദ് സനാന്‍, ജയ് ഗുപ്ത എന്നിവരെ കളത്തിലിറക്കി. എന്നാല്‍ ഇന്ത്യയുടെ പ്രതിരോധത്തിലെ പിഴവ് മുതലെടുത്ത് ഡഗ്ലസ് ലൂയിസും പെഡ്രോയും ചേര്‍ന്ന് ഒരുക്കിയ അവസരത്തില്‍ ലിനോ 67-ാം മിനിറ്റില്‍ ബ്രസീലിന്റെ മൂന്നാം ഗോള്‍ നേടി.
ALSO READ: ഫൈനലില്‍ പാകിസ്ഥാന് തിരിച്ചടി; 19 റണ്‍സ് ജയവുമായി ഇന്ത്യ
ഇന്ത്യ തിരിച്ചടിക്കാന്‍ ശ്രമിച്ചെങ്കിലും ബ്രസീലിന്റെ പ്രതിരോധം അവസരങ്ങള്‍ തടഞ്ഞു. റയാന്‍ വില്യംസ് ഇന്ത്യയ്ക്കായി മികച്ച നീക്കങ്ങള്‍ നടത്തി. 60-ാം മിനിറ്റിന് ശേഷം ലഭിച്ച അവസരത്തില്‍ അദ്ദേഹത്തിന്റെ ഷോട്ട് മൗറോ ജൂനിയര്‍ ഗോള്‍വരയില്‍ നിന്ന് രക്ഷപ്പെടുത്തി. പിന്നാലെ മന്‍വീര്‍ സിങ്ങുമായി ചേര്‍ന്ന് മറ്റൊരു അവസരവും സൃഷ്ടിച്ചെങ്കിലും ഷോട്ട് പുറത്തേക്ക് പോയി.
അവസാന നിമിഷങ്ങളിലും ബ്രസീല്‍ പന്തിന്മേല്‍ നിയന്ത്രണം നിലനിര്‍ത്തി. ഇഞ്ചുറി ടൈമില്‍ മൗറോയുടെ പാസില്‍ നിന്ന് ലിനോ വീണ്ടും വലകുലുക്കി. ഇതോടെ ബ്രസീല്‍ 4-0 ജയം ഉറപ്പിച്ചു.
അഞ്ച് തവണ ലോകചാമ്പ്യന്മാരായ ബ്രസീലിനെതിരെ 51,000-ത്തിലധികം ആരാധകരാണ് സാള്‍ട്ട് ലേക്ക് സ്റ്റേഡിയത്തിലെത്തിയത്. മത്സരത്തില്‍ ചില ഘട്ടങ്ങളില്‍ ഇന്ത്യ മികച്ച ആക്രമണ നീക്കങ്ങള്‍ നടത്തിയെങ്കിലും ബ്രസീലിന്റെ പരിചയസമ്പന്നമായ നിരയ്ക്ക് മുന്നില്‍ വിജയം നേടാനായില്ല. മൂന്ന് ദിവസത്തിന് ശേഷം ഇതേ വേദിയില്‍ ഇന്ത്യ ഉറുഗ്വെയെ നേരിടും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
‘Brazil Beats India 4-0’
