വാഷിങ്ടൺ : കൊളംബിയ യൂണിവേഴ്സിറ്റിയുടെ ജേണലിസം മാസ്റ്റേഴ്സ് (എം.എ.) പ്രോഗ്രാമിലേക്കുള്ള പ്രവേശനം ഒരു വർഷത്തേക്ക് താൽക്കാലികമായി നിർത്തിവച്ചു. യു.എസ്. വിസ നയങ്ങളിൽ വന്ന മാറ്റങ്ങൾ അന്താരാഷ്ട്ര വിദ്യാർത്ഥികളുടെ അപേക്ഷകളിൽ വൻ ഇടിവുണ്ടാക്കിയതിനെ തുടർന്നാണ് തീരുമാനം. 2005-ൽ ആരംഭിച്ച ഈ ഡിഗ്രി കോഴ്സ് കാലാനുസൃതമായി പരിഷ്കരിക്കുന്നതിന്റെ ഭാഗമായാണ് ഒരു വർഷത്തെ ഇടവേളയെന്ന് ജേണലിസം സ്കൂൾ അധികൃതർ വ്യക്തമാക്കി.
വിസാനയങ്ങളിലെ കർശന നടപടികളും അനിശ്ചിതത്വവുമാണ് വിദേശത്തുനിന്നുള്ള വിദ്യാർത്ഥികളെ പിന്തിരിപ്പിച്ചത്. എം.എ. പ്രോഗ്രാമിലെ മൊത്തം വിദ്യാർത്ഥികളിൽ പകുതിയോളം വരുന്നത് അന്താരാഷ്ട്ര വിദ്യാർത്ഥികളാണ്. യു.എസ്. സർക്കാരിന്റെ പുതിയ വിസ നിയന്ത്രണങ്ങളും ഓൺലൈൻ നിരീക്ഷണങ്ങളും പ്രവേശന നടപടികളെ സാരമായി ബാധിച്ചിട്ടുണ്ടെന്ന് ഇതുമായി ബന്ധപ്പെട്ട വൃത്തങ്ങൾ വ്യക്തമാക്കി. പ്രോഗ്രാമിന്റെ ഘടന മാറ്റുന്നതിനൊപ്പം വിസ പ്രതിസന്ധികളും ഈ തീരുമാനത്തിന് കാരണമായതായി ജേണലിസം സ്കൂൾ ഡീൻ ജെലാനി കോബ് പറഞ്ഞു.
പ്രധാന മാധ്യമ സ്ഥാപനങ്ങളിലെ പ്രൊഫഷണലുകൾക്കായി രൂപകൽപ്പന ചെയ്തിട്ടുള്ളതാണ് ഒമ്പത് മാസം നീളുന്ന ഈ എം.എ. കോഴ്സ്. എന്നാൽ വലിയ തുക ഫീസ് വരുന്ന ഈ കോഴ്സിന്റെ ദൈർഘ്യത്തെയും ചിലവിനെയും കുറിച്ച് ചില കോണുകളിൽ വിമർശനങ്ങൾ ഉയർന്നിരുന്നു. നിലവിൽ ഫിനാൻഷ്യൽ എയ്ഡ് ലഭിക്കുന്നതിനാൽ ഭൂരിഭാഗം വിദ്യാർത്ഥികൾക്കും ഇത് ആശ്വാസകരമാണെന്ന് അധികൃതർ വ്യക്തമാക്കുന്നു. പ്രോഗ്രാം കൂടുതൽ കാലാനുസൃതമാക്കുന്നതിന്റെ ഭാഗമായി പുതിയ ഫണ്ടിംഗ് തന്ത്രങ്ങളും പാർട്ട് ടൈം ഓപ്ഷനുകളും സ്കൂൾ പരിഗണിക്കുന്നുണ്ട്.
പലസ്തീൻ അനുകൂല ക്യാമ്പസ് പ്രക്ഷോഭങ്ങളെ തുടർന്ന് കൊളംബിയ യൂണിവേഴ്സിറ്റി നേരത്തെ യു.എസ്. ഭരണകൂടത്തിന്റെ കടുത്ത നടപടികൾക്ക് വിധേയമായിരുന്നു. ഫെഡറൽ അന്വേഷണങ്ങൾ അവസാനിപ്പിക്കുന്നതിന്റെ ഭാഗമായി കഴിഞ്ഞ വർഷം സർവ്വകലാശാല വലിയ തുക പിഴയൊടുക്കുകയും ചെയ്തിരുന്നു. വിസ നടപടികളിലെ കടുത്ത വ്യവസ്ഥകൾ തുടരുന്നതിനിടയിലാണ് പ്രമുഖ പത്രപ്രവർത്തന പഠനകേന്ദ്രമായ കൊളംബിയയിലെ ഈ നിർണായക നടപടി.
അതേസമയം, ജേണലിസം സ്കൂളിന്റെ മാസ്റ്റർ ഓഫ് സയൻസ് (എം.എസ്.) പ്രോഗ്രാമുകളെ ഈ താൽക്കാലിക നിർത്തിവെയ്ക്കൽ ബാധിക്കില്ല. കുറഞ്ഞ പ്രവൃത്തിപരിചയമുള്ള വിദ്യാർത്ഥികൾക്കായി നടത്തുന്ന എം.എസ്. പ്രോഗ്രാമിലേക്കുള്ള പ്രവേശനം പതിവുപോലെ തുടരും. കൂടാതെ, വിസയുടെ ആവശ്യമില്ലാതെ അന്താരാഷ്ട്ര വിദ്യാർത്ഥികൾക്ക് പ്രയോജനപ്പെടുത്താവുന്ന പുതിയ രണ്ട് വർഷത്തെ ഓൺലൈൻ എം.എസ്. പ്രോഗ്രാമും സ്കൂൾ അടുത്തിടെ പ്രഖ്യാപിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
