വാഷിങ്ടണ്‍: കെന്നഡി സെന്റര്‍ കെട്ടിടത്തിന്റെ പേരില്‍ യുഎസ് പ്രസിഡന്റ് ഡോണള്‍ഡ് ട്രംപിന്റെ പേര് ചേര്‍ക്കുന്നതുമായി ബന്ധപ്പെട്ട നിയമതര്‍ക്കം തുടരുന്നതിനിടെ, ഈ വര്‍ഷത്തെ കെന്നഡി സെന്റര്‍ ഹോണേഴ്‌സ് വാഷിങ്ടണിലെ ക്യാപിറ്റല്‍ വണ്‍ അരീനയില്‍ നടക്കും. ഡിസംബര്‍ ഏഴിനാണ് 49-ാമത് കെന്നഡി സെന്റര്‍ ഹോണേഴ്‌സ്.
പൊട്ടോമാക് നദിക്കരയിലെ കെന്നഡി സെന്റര്‍ കെട്ടിടത്തിലാണ് സാധാരണ പുരസ്‌കാര ചടങ്ങ് നടക്കുന്നത്. എന്നാല്‍ ഇത്തവണ ചടങ്ങ് ക്യാപിറ്റല്‍ വണ്‍ അരീനയിലേക്ക് മാറ്റിയതായി കെന്നഡി സെന്റര്‍ വക്താവ് വെള്ളിയാഴ്ച അറിയിച്ചു. വേദി മാറ്റാനുള്ള കാരണം വ്യക്തമാക്കിയിട്ടില്ല.
ട്രംപിന്റെ പേര് കെട്ടിടത്തില്‍ ചേര്‍ക്കാനുള്ള നീക്കത്തെച്ചൊല്ലിയാണ് കെന്നഡി സെന്റര്‍ നിലവില്‍ നിയമപോരാട്ടം നേരിടുന്നത്. കഴിഞ്ഞ മാസം കെന്നഡി സെന്റര്‍ ബോര്‍ഡ് കെട്ടിടം അടച്ചിടാന്‍ തീരുമാനിച്ചിരുന്നു. കെട്ടിടത്തിന്റെ അറ്റകുറ്റപ്പണികള്‍ക്കായി സുരക്ഷാ പ്രശ്‌നങ്ങള്‍ ചൂണ്ടിക്കാട്ടിയ ട്രംപ്, തന്റെ പേര് കൂടി കെട്ടിടത്തില്‍ ചേര്‍ക്കാനുള്ള പദ്ധതിയുമായി അറ്റകുറ്റപ്പണികളെ ബന്ധിപ്പിച്ചിരുന്നു.
കെട്ടിടത്തില്‍ ട്രംപിന്റെ പേര് ചേര്‍ക്കാന്‍ കോണ്‍ഗ്രസിന്റെ അനുമതി ആവശ്യമാണെന്ന് ഫെഡറല്‍ ജഡ്ജി രണ്ടുതവണ വ്യക്തമാക്കിയിട്ടുണ്ട്. കെന്നഡി സെന്ററിന്റെ അറ്റകുറ്റപ്പണികള്‍ക്കായി കോണ്‍ഗ്രസ് 257 മില്യണ്‍ യുഎസ് ഡോളര്‍ അനുവദിച്ചിട്ടുണ്ട്.
ALSO READ: വ്യാപാരയുദ്ധം മുറുകുന്നു; കാനഡയ്‌ക്കെതിരെ വീണ്ടും ട്രംപ്
2025-ലെ കെന്നഡി സെന്റര്‍ ഹോണേഴ്‌സ് ട്രംപ് നേരിട്ട് സംഘടിപ്പിച്ചിരുന്നു. സില്‍വസ്റ്റര്‍ സ്റ്റാലോണ്‍, ജോര്‍ജ് സ്‌ട്രെയ്റ്റ് തുടങ്ങിയവരായിരുന്നു അന്നത്തെ പുരസ്‌കാര ജേതാക്കള്‍. ചടങ്ങിനിടെ കെട്ടിടത്തിന്റെ പേര് ‘ട്രംപ് കെന്നഡി സെന്റര്‍’ എന്നാക്കുമെന്ന് ട്രംപ് പറഞ്ഞിരുന്നു. പിന്നാലെ കെട്ടിടത്തില്‍ അദ്ദേഹത്തിന്റെ പേര് ചേര്‍ക്കാനുള്ള നടപടികള്‍ ആരംഭിച്ചു.
ട്രംപ് നിയമിച്ച കെന്നഡി സെന്റര്‍ ബോര്‍ഡ് ഓഫ് ട്രസ്റ്റീസ് പിന്നീട് ഏകകണ്ഠമായി പേരുമാറ്റത്തിന് അനുകൂലമായി വോട്ട് ചെയ്തു. ഇതിനെതിരെ കോടതിയില്‍ നിയമനടപടികള്‍ തുടരുകയാണ്.
1963-ല്‍ പ്രസിഡന്റ് ജോണ്‍ എഫ്. കെന്നഡി കൊല്ലപ്പെട്ടതിന് പിന്നാലെ 1964-ലാണ് കോണ്‍ഗ്രസ് കലാകേന്ദ്രത്തിന് അദ്ദേഹത്തിന്റെ പേരില്‍ സ്മാരക പദവി നല്‍കിയത്. മറ്റൊരാളുടെ പേരില്‍ കേന്ദ്രത്തെ സ്മാരകമാക്കുന്നതും കെട്ടിടത്തിന്റെ പുറത്ത് മറ്റൊരാളുടെ പേര് ചേര്‍ക്കുന്നതും തടയുന്ന വ്യവസ്ഥ നിയമത്തിലുണ്ട്.
അമേരിക്കന്‍ കലാരംഗത്തെ ആജീവനാന്ത സംഭാവനകള്‍ക്ക് നല്‍കുന്ന കെന്നഡി സെന്റര്‍ ഹോണേഴ്‌സ് 1978-ലാണ് ആരംഭിച്ചത്. 2026-ലെ പുരസ്‌കാര ജേതാക്കളുടെ പേരുകള്‍ പിന്നീട് പ്രഖ്യാപിക്കുമെന്ന് കെന്നഡി സെന്റര്‍ വക്താവ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
‘Kennedy Center Honors Move’
