ടൊറന്റോ: മുന്നറിയിപ്പുകളോ കൃത്യമായ കാരണങ്ങളോ ഇല്ലാതെ ഫേസ്ബുക്ക്, ഇൻസ്റ്റഗ്രാം അക്കൗണ്ടുകൾ പെട്ടെന്ന് നീക്കം ചെയ്തതായി പരാതിയുമായി കാനഡയിലെ ടൊറന്റോയിൽ നിന്നുള്ള യുവതി രംഗത്ത്. ഇരുപത് വർഷത്തെ ഡിജിറ്റൽ ഓർമ്മകളും പ്രൊഫഷണൽ ബന്ധങ്ങളുമാണ് മെറ്റയുടെ അപ്രതീക്ഷിത നടപടിയിലൂടെ ജാസ്മിൻ ഔൾട്ട് എന്ന ടൊറന്റോ സ്വദേശിനിക്ക് നഷ്ടമായത്. അക്കൗണ്ട് തിരികെ ലഭിക്കുന്നതിനായി അപ്പീൽ നൽകാൻ ശ്രമിച്ചെങ്കിലും മനുഷ്യർക്ക് പകരം എ.ഐ ചാറ്റ്‌ബോട്ടുകൾ മാത്രമാണ് മറുപടി നൽകിയതെന്ന് ഇവർ പറയുന്നു.
കഴിഞ്ഞ ആഴ്ചയാണ് ജാസ്മിൻ ഔൾട്ടിന്റെ ഫേസ്ബുക്ക്, ഇൻസ്റ്റഗ്രാം അക്കൗണ്ടുകൾ യാതൊരു മുന്നറിയിപ്പുമില്ലാതെ സ്ഥിരമായി പ്രവർത്തനരഹിതമാക്കിയത്. അക്കൗണ്ട് റദ്ദാക്കാനുള്ള കാരണം വ്യക്തമാക്കാൻ മെറ്റ തയ്യാറായില്ല. തുടർന്ന് അപ്പീൽ നൽകാൻ ശ്രമിച്ചെങ്കിലും എ.ഐ ചാറ്റ്‌ബോട്ടുകൾ വഴി കടുത്ത പ്രതിരോധമാണ് നേരിടേണ്ടി വന്നത്. പണം നൽകി വെരിഫിക്കേഷൻ എടുത്താൽ പോലും യഥാർത്ഥ ജീവനക്കാരെ ബന്ധപ്പെടാൻ സാധിക്കാത്ത അവസ്ഥയാണെന്നും ഉപയോക്താക്കൾ കുറ്റപ്പെടുത്തുന്നു.
വലിയ കമ്പനികൾ ചെലവ് ചുരുക്കുന്നതിന്റെ ഭാഗമായി ഉപഭോക്തൃ സേവനത്തിനായി എ.ഐയെ വ്യാപകമായി ആശ്രയിക്കുന്നത് ഉപയോക്താക്കൾക്ക് വലിയ ബുദ്ധിമുട്ടുകൾ സൃഷ്ടിക്കുന്നുണ്ട്. സെർവീസ് നോളജ് പുറത്തുവിട്ട ആഗോള സർവ്വേ പ്രകാരം, എ.ഐ കസ്റ്റമർ സർവീസിലെ ആത്മബന്ധമില്ലായ്മയാണ് ഉപഭോക്താക്കൾ നേരിടുന്ന പ്രധാന നിരാശ. മെറ്റയെപ്പോലെയുള്ള വമ്പൻ കമ്പനികൾക്ക് മറ്റ് എതിരാളികൾ ഇല്ലാത്തതിനാൽ ഉപയോക്താക്കൾക്ക് മറ്റ് വഴികളില്ലാത്ത അവസ്ഥയാണുള്ളത്.
അക്കൗണ്ടുകൾ നഷ്ടപ്പെടുന്ന ഉപയോക്താക്കൾക്ക് നിയമപരമായ നടപടികളിലൂടെ പരിഹാരം തേടാൻ സാധിക്കുമെന്ന് നിയമ വിദഗ്ധർ അഭിപ്രായപ്പെടുന്നു. എ.ഐ സംവിധാനങ്ങളിലെ പിഴവുകൾ പരിഹരിക്കാൻ വ്യക്തമായ മാർഗ്ഗങ്ങളില്ലാത്തതാണ് പ്രധാന പ്രശ്നം. ഉപയോക്താക്കൾക്ക് നേരിട്ട് മനുഷ്യരായ ജീവനക്കാരെ ബന്ധപ്പെടാനുള്ള അവസരവും സുതാര്യമായ അപ്പീൽ സംവിധാനവും കമ്പനികൾ ഉറപ്പാക്കണമെന്നും കടുത്ത നിയന്ത്രണങ്ങൾ വേണമെന്നും വിദഗ്ധർ ആവശ്യപ്പെടുന്നു.
Also Read : ഓട്ടവ റിയൽ എസ്റ്റേറ്റ് വിപണി: വീട് വാങ്ങുന്നവരും വിൽക്കുന്നവരും അറിയേണ്ട പ്രധാന വിവരങ്ങൾ ഇതാ!
യൂറോപ്യൻ യൂണിയന്റെ ഡിജിറ്റൽ സർവീസസ് ആക്ട് മാതൃകയാക്കി ഇത്തരം വിഷയങ്ങളിൽ കർശനമായ നിയമപരമായ ചട്ടക്കൂടുകൾ കൊണ്ടുവരേണ്ടതുണ്ട്. ഉപയോക്താക്കളുടെ അവകാശങ്ങൾ സംരക്ഷിക്കപ്പെടുന്ന തരത്തിലുള്ള നിയമങ്ങൾ ഉണ്ടായാൽ മാത്രമേ ഇത്തരം ചൂഷണങ്ങൾക്ക് തടയിടാൻ സാധിക്കൂ. അല്ലാത്തപക്ഷം ആയിരക്കണക്കിന് ആളുകളുടെ വർഷങ്ങളായുള്ള ഡിജിറ്റൽ ഡാറ്റയും ഓർമ്മകളുമാണ് ഒറ്റ രാത്രികൊണ്ട് നഷ്ടപ്പെടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
