ബെയ്ജിങ്ങ്: ചൈനീസ് വാഹനങ്ങൾക്കെതിരായ ബില്ലിൽ ജർമ്മൻ വാഹന നിർമ്മാതാക്കളായ മെഴ്‌സിഡസ് ബെൻസിനെ അമേരിക്കയിൽ നിരോധിക്കില്ലെന്ന് സെനറ്റർ ബെർണി മൊറെനോ വ്യക്തമാക്കി. ചൈനീസ് സ്വാധീനം തടയുന്നതിനുള്ള പുതിയ ബില്ലിന്റെ മുഖ്യ പ്രയോജകരിൽ ഒരാളാണ് റിപ്പബ്ലിക്കൻ സെനറ്ററായ ബെർണി മൊറെനോ. മെഴ്‌സിഡസ് ബെൻസിന് അമേരിക്കയിൽ വിലക്കേർപ്പെടുത്താൻ ഉദ്ദേശിക്കുന്നില്ലെന്നും ചർച്ചകൾ പുരോഗമിക്കുകയാണെന്നും അദ്ദേഹം പറഞ്ഞു.
ചൈനീസ് കമ്പനികളുടെ ഉടമസ്ഥത 15 ശതമാനത്തിൽ കൂടുതലുള്ള കമ്പനികൾക്ക് അമേരിക്കയിൽ വാഹനം വിൽക്കുന്നതിൽ വിലക്കേർപ്പെടുത്തുന്നതാണ് ജൂലൈയിൽ സെനറ്റ് കൊമേഴ്‌സ് കമ്മിറ്റി അംഗീകരിച്ച ബിൽ. എന്നാൽ മെഴ്‌സിഡസ് ബെൻസിൽ ചൈനീസ് സ്ഥാപനങ്ങളുടെ നിക്ഷേപം ഏകദേശം 20 ശതമാനത്തോളമാണ്. കമ്പനിക്ക് തിരിച്ചടിയാകാത്ത രീതിയിൽ ഈ പരിധി മറികടക്കാൻ സാധിക്കുമോയെന്ന ആശങ്ക നിലനിൽക്കുന്നുണ്ട്.
ചൈനീസ് കമ്പനിയായ ഗീലിയുടെ ഭൂരിപക്ഷ ഉടമസ്ഥതയിലുള്ള വോൾവോ കാറുകളുടെ കാര്യത്തിലും സമാനമായ ചർച്ചകൾ നടക്കുന്നുണ്ടെന്ന് മൊറെനോ വ്യക്തമാക്കി. ഗീലിയുടെ ഉടമസ്ഥതയിലുള്ള ആസ്റ്റൺ മാർട്ടിൻ, ലോടസ് തുടങ്ങിയ ബ്രാൻഡുകളെയും പുതിയ നിയമം ബാധിച്ചേക്കാം. സെനറ്റിൽ ബില്ലിന് വലിയ പിന്തുണയുണ്ടെങ്കിലും സെനറ്റർ റാൻഡ് പോൾ ഇതിനെതിരെ രംഗത്തുവന്നിട്ടുണ്ട്.
മെഴ്‌സിഡസിനെ ലക്ഷ്യമിട്ടുള്ള അനാവശ്യ നീക്കമാണ് ബില്ലിൽ ഉള്ളതെന്ന് സെനറ്റർ റാൻഡ് പോൾ വിമർശിച്ചു. ആ കമ്പനിയെ ഒഴിവാക്കിയാൽ ബില്ലിനെ പിന്തുണയ്ക്കാമെന്നാണ് അദ്ദേഹം നിലപാടെടുത്തിട്ടുള്ളത്. നവംബറിൽ സെനറ്റ് പിരിയുന്നതിന് മുമ്പ് തന്നെ ബിൽ പാസാക്കാനുള്ള നീക്കത്തിലാണ് അണിയറ പ്രവർത്തകർ.
ചൈനീസ് നിർമ്മിത വാഹനങ്ങൾ അമേരിക്കയിലേക്ക് പ്രവേശിക്കുന്നത് തടയാൻ കർശന നിയമങ്ങളാണ് നിലവിലുള്ളത്. ഡ്രൈവർമാരുടെ സുരക്ഷാ വിവരങ്ങൾ ചോരാൻ സാധ്യതയുണ്ടെന്ന വിലയിരുത്തലിലാണ് മുൻ ഭരണകൂടം ഇതിന് നിയന്ത്രണങ്ങൾ ഏർപ്പെടുത്തിയത്. ചൈനീസ് ഇലക്ട്രിക് വാഹനങ്ങൾക്ക് നൂറ് ശതമാനത്തിലേറെ ഇറക്കുമതി തീരുവയും അമേരിക്ക ചുമത്തുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
