യുണൈറ്റഡ് നേഷൻസ്: ഐക്യരാഷ്ട്രസഭാ രക്ഷാസമിതിയിൽ ഇന്ത്യയ്ക്ക് സ്ഥിരാംഗത്വം നൽകണമെന്ന ദീർഘകാലമായുള്ള ആവശ്യത്തിന് ആഗോളതലത്തിൽ വീണ്ടും ശക്തമായ പിന്തുണ. യുഎൻ പൊതുസഭയിൽ സംസാരിക്കവെ റഷ്യൻ വിദേശകാര്യ മന്ത്രി സെർഗേ ലാവ്റോവ് ആണ് ഇന്ത്യയുടെ സ്ഥിരാംഗത്വത്തെ പിന്തുണച്ച് പരസ്യ പ്രഖ്യാപനം നടത്തിയത്. രക്ഷാസമിതി വിപുലീകരിക്കുമ്പോൾ വികസ്വര രാജ്യങ്ങളുടെ പങ്കാളിത്തം ഉറപ്പാക്കണമെന്നും ഏഷ്യ, ആഫ്രിക്ക, ലാറ്റിൻ അമേരിക്കൻ രാജ്യങ്ങൾക്ക് അർഹമായ പ്രാതിനിധ്യം നൽകണമെന്നും അദ്ദേഹം വ്യക്തമാക്കി. ഇന്ത്യയ്ക്കൊപ്പം ബ്രസീലിന്റെ സ്ഥിരാംഗത്വത്തെയും റഷ്യ പിന്തുണച്ചു.
അതേസമയം, രക്ഷാസമിതി പരിഷ്കരണത്തിന്റെ പേരിൽ കൂടുതൽ പാശ്ചാത്യ രാജ്യങ്ങളെ സമിതിയിൽ ഉൾപ്പെടുത്തുന്നതിനെ റഷ്യ ശക്തമായി എതിർത്തു. ജർമനി, ജപ്പാൻ തുടങ്ങിയ രാജ്യങ്ങൾക്ക് സ്ഥിരാംഗത്വം നൽകുന്നത് അംഗീകരിക്കാനാകില്ലെന്നാണ് റഷ്യയുടെ നിലപാട്. വികസിത പാശ്ചാത്യ രാജ്യങ്ങളുടെ ആധിപത്യം വർധിപ്പിക്കുന്നതിന് പകരം ആഗോള സന്തുലിതാവസ്ഥ ഉറപ്പാക്കുന്ന രീതിയിലാകണം രക്ഷാസമിതിയുടെ ഘടനാപരമായ മാറ്റങ്ങളെന്ന് റഷ്യ ചൂണ്ടിക്കാട്ടി.
റഷ്യക്ക് പുറമേ പോർച്ചുഗലും മൗറീഷ്യസും ഇന്ത്യയുടെ അവകാശവാദത്തിന് അനുകൂലമായി നിലകൊണ്ടു. മൗറീഷ്യസ് വിദേശകാര്യ മന്ത്രി ധനഞ്ജയ് രാംഫുൽ പൊതുസഭയിൽ ഇന്ത്യയ്ക്കുള്ള പിന്തുണ ആവർത്തിച്ചപ്പോൾ, ആഫ്രിക്കൻ രാജ്യങ്ങൾക്കും ഇന്ത്യ, ബ്രസീൽ എന്നിവർക്കും രക്ഷാസമിതിയിൽ സ്ഥിരാംഗത്വം നൽകണമെന്ന് പോർച്ചുഗൽ പ്രധാനമന്ത്രി ലൂയിസ് മോണ്ടെനെഗ്രോ ആവശ്യപ്പെട്ടു. ഇതിനിടെ, മാർഷൽ ദ്വീപുകൾ ജപ്പാനും മറ്റ് ജി4 രാജ്യങ്ങൾക്കും പിന്തുണ അറിയിച്ചു. 1.6 ബില്യണിലധികം ജനസംഖ്യയുള്ള ആഫ്രിക്കൻ ഭൂഖണ്ഡത്തിന് സമിതിയിൽ പ്രാതിനിധ്യമില്ലാത്ത വിഷയം സിയറ ലിയോൺ, ഘാന എന്നീ രാജ്യങ്ങൾ സഭയിൽ ഉന്നയിച്ചു.
നിലവിൽ ചൈന, ഫ്രാൻസ്, റഷ്യ, യുണൈറ്റഡ് കിംഗ്ഡം, യുഎസ് എന്നീ അഞ്ച് രാജ്യങ്ങളാണ് യുഎൻ രക്ഷാസമിതിയിലെ സ്ഥിരാംഗങ്ങൾ. ഇവർക്ക് പുറമേ രണ്ട് വർഷത്തെ കാലാവധിയിലേക്ക് പത്ത് താത്കാലിക അംഗങ്ങളെയും തെരഞ്ഞെടുക്കുന്നുണ്ട്. സമഗ്രമായ പരിഷ്കരണത്തിലൂടെ മാത്രമേ യുഎൻ രക്ഷാസമിതിക്ക് സമകാലിക യാഥാർത്ഥ്യങ്ങളെ ഉൾക്കൊള്ളാൻ കഴിയൂ എന്ന വാദത്തിന് അന്താരാഷ്ട്ര തലത്തിൽ ശക്തിപകരുന്നതാണ് ഈ പുതിയ സംഭവവികാസങ്ങൾ.
India Gets Russia, Portugal, Mauritius Support for UNSC Seat
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
