കാല്ഗറി: സമ്മാനം വാങ്ങാൻ വൈകിയെന്ന കാരണം പറഞ്ഞ് തടഞ്ഞുവെച്ച ലോട്ടറി അടിച്ച തുക വിജയിക്ക് തന്നെ നൽകാൻ കാനഡയിലെ കാല്ഗറി സ്റ്റാമ്പീഡ് സംഘാടകർ തീരുമാനിച്ചു. ഇതോടെ കാനഡ സ്വദേശിയായ കർട്ടിസ് ഗീഗർക്ക് താൻ നേടിയ $125,150 ഡോളർ (ഏകദേശം 1 കോടിയിലധികം രൂപ) സമ്മാനമായി ലഭിക്കും. സാങ്കേതിക കാരണങ്ങൾ പറഞ്ഞ് ആദ്യം തുക നൽകാൻ വിസമ്മതിച്ച അധികൃതർ, പിന്നീട് തെറ്റ് തിരുത്തി ഗീഗറിന് അനുകൂലമായി തീരുമാനമെടുക്കുകയായിരുന്നു.
കഴിഞ്ഞ ജൂലൈയിൽ കാനഡയിൽ നടന്ന കാല്ഗറി സ്റ്റാമ്പീഡ് ഉത്സവത്തിനിടെയാണ് ഗീഗർ ‘ഷോബാൻഡ് 50/50’ ലോട്ടറി ടിക്കറ്റെടുത്തത്. ടിക്കറ്റ് വാങ്ങിയ ഉടൻ അദ്ദേഹം ഗ്രീസിലേക്ക് യാത്ര പോയി. ഒരു മാസത്തിനുശേഷം തിരികെ വന്നപ്പോഴാണ് തനിക്കാണ് ഒന്നാം സമ്മാനം അടിച്ചിരിക്കുന്നതെന്ന് ഗീഗർ അറിയുന്നത്. എന്നാൽ, ഫലം വന്ന് 48 മണിക്കൂറിനുള്ളിൽ പണം വാങ്ങണമായിരുന്നുവെന്നും സമയം കഴിഞ്ഞതിനാൽ തുക നൽകാനാവില്ലെന്നുമാണ് സംഘാടകർ ആദ്യം അറിയിച്ചത്. എന്നാൽ ഈ സമയപരിധി ടിക്കറ്റിൽ ഉണ്ടായിരുന്നില്ലെന്നും വെബ്സൈറ്റിൽ തെറ്റായ വിവരങ്ങളാണ് നൽകിയതെന്നും ഗീഗർ ചൂണ്ടിക്കാട്ടി.
Also Read: ഇന്ത്യ-കാനഡ വ്യാപാര കരാർ ഡിസംബറിനുള്ളിൽ; സ്ഥിരീകരിച്ച് പ്രധാനമന്ത്രി മാർക്ക് കാർണി
സംഭവം വിവാദമായതോടെ സംഘാടകർ നിലപാട് തിരുത്തി പണം നൽകാൻ തയ്യാറായി. വെബ്സൈറ്റിലെ വിവരങ്ങൾ ആശയക്കുഴപ്പത്തിന് കാരണമായെന്ന് മനസ്സിലാക്കുന്നുവെന്നും, ശരിയായ വിജയിക്ക് സമ്മാനം നൽകുന്നതാണ് ശരിയെന്നും സി.ഇ.ഒ ജോയൽ കൗലി അറിയിച്ചു. സ്വന്തമായി ഒരു വീട് വാങ്ങാനും കുടുംബത്തോടൊപ്പം യാത്രകൾ പോകാനും ഈ പണം ഉപയോഗിക്കുമെന്നും തനിക്കായി വീണ്ടും ആലോചിച്ച് തീരുമാനമെടുത്ത സംഘാടകർക്ക് നന്ദിയുണ്ടെന്നും ഗീഗർ പ്രതികരിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
