പ്രിൻസ് കൗണ്ടി: പ്രിൻസ് എഡ്വേഡ് ഐലൻഡിൽ വളർത്തുനായകൾക്കിടയിൽ പാർവോവൈറസ് രോഗബാധ പടരുന്നതായി റിപ്പോർട്ട്. പ്രിൻസ് കൗണ്ടിയിലെ ഒരു കൂട്ടം നായക്കുട്ടികളിൽ രോഗം സ്ഥിരീകരിക്കുകയും ചിലത് ചാവുകയും ചെയ്തതിനെ തുടർന്ന് ഉടമകൾ നിർബന്ധമായും വാക്സിൻ നൽകണമെന്ന് വെറ്ററിനറി ഡോക്ടർമാർ മുന്നറിയിപ്പ് നൽകി. രോഗം ബാധിച്ച മൃഗങ്ങളിൽ നിന്ന് നേരിട്ടോ അവയുടെ അവശിഷ്ടങ്ങളിലൂടെയോ അതിവേഗം പകരുന്ന ഒന്നാണ് ഈ വൈറസ്.
നായക്കുട്ടികളിലെ പ്രതിരോധശേഷിയെയാണ് പാർവോവൈറസ് പ്രധാനമായും തകർക്കുന്നത്. ശരീരത്തിലെ അസ്ഥിമജ്ജ, വെളുത്ത രക്താണുക്കൾ എന്നിവയെ വൈറസ് ബാധിക്കുന്നു. കടുത്ത ക്ഷീണം, ഛർദ്ദി, രക്തം കലർന്ന വയറിളക്കം എന്നിവയാണ് രോഗത്തിന്റെ പ്രധാന ലക്ഷണങ്ങൾ. ഇത്തരം ലക്ഷണങ്ങൾ കണ്ടാൽ ഉടൻ തന്നെ വെറ്ററിനറി ആശുപത്രിയിൽ ചികിത്സ തേടണമെന്ന് ഷാർലറ്റ്ടൗണിലെ അറ്റ്ലാന്റിക് വെറ്ററിനറി കോളേജ് അധ്യാപിക ഡോ. മാർട്ടി ഹോപ്സൺ അറിയിച്ചു.
രോഗം പകരുന്ന പശ്ചാത്തലത്തിൽ വാക്സിൻ കൃത്യമായി എടുത്ത നായകൾക്ക് കൂടുതൽ സംരക്ഷണം ലഭിക്കുമെന്ന് ഡോക്ടർമാർ വ്യക്തമാക്കുന്നു. കൂടുതൽ നായകൾക്ക് വാക്സിൻ നൽകുന്നതുവഴി രോഗം പടരുന്നത് തടയാൻ സാധിക്കും. ലളിതമായ രക്ത പരിശോധനയിലൂടെ ഏതാനും മണിക്കൂറുകൾക്കുള്ളിൽ തന്നെ നായകൾക്ക് പാർവോവൈറസ് ബാധയുണ്ടോ എന്ന് കണ്ടെത്താനാകും. വാക്സിനേഷൻ നിരക്ക് കുറവുള്ള പ്രദേശങ്ങളിലാണ് രോഗവ്യാപന സാധ്യത കൂടുതൽ.
രോഗം സ്ഥിരീകരിച്ച വാർത്ത പുറത്തുവന്നതോടെ പി.ഇ.ഐയിലെ വളർത്തുമൃഗ ഉടമകളിൽ ആശങ്ക വർധിച്ചിട്ടുണ്ട്. മറ്റു നായകളുമായി സമ്പർക്കത്തിൽ വരുമ്പോൾ രോഗം പകരുമോ എന്ന ഭയമുള്ളതായി ഉടമയായ സാറ ഗാലന്റ് പറഞ്ഞു. എന്നാൽ വെറ്ററിനറി ഡോക്ടർമാരുടെ നിർദേശപ്രകാരം കൃത്യമായി വാക്സിൻ എടുത്തതിനാൽ സ്വന്തം നായ സുരക്ഷിതമാണെന്ന ആശ്വാസവും ഇവർ പങ്കുവെച്ചു.
Also Read: കാനഡയ്ക്ക് വീണ്ടും അഭിമാനം; ലോകത്തിലെ മികച്ച നഗരങ്ങളുടെ പട്ടികയിൽ ഇടംപിടിച്ച് സെന്റ് കാതറൈൻസ്
ദ്വീപിൽ കഴിഞ്ഞ രണ്ടു ദിവസമായി പുതിയ കേസുകളൊന്നും റിപ്പോർട്ട് ചെയ്തിട്ടില്ലെന്ന് ഡോ. വേഡ് സ്വീറ്റ് അറിയിച്ചു. ഇതോടെ രോഗവ്യാപനം അവസാന ഘട്ടത്തിലാണെന്നാണ് വിദഗ്ധരുടെ വിലയിരുത്തൽ. എന്നാൽ നായക്കുട്ടികളെ മറ്റു മൃഗങ്ങളുമായി സമ്പർക്കം പുലർത്താൻ അനുവദിക്കുന്നതിന് മുൻപ് അവയ്ക്ക് വാക്സിൻ നൽകിയിട്ടുണ്ടെന്ന് ഉടമകൾ ഉറപ്പാക്കണമെന്നും ഡോക്ടർമാർ നിർദേശിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
