അൽബാനി: ജീവനക്കാർക്ക് അർഹമായ വേതനം നൽകുന്നതിൽ വീഴ്ച പറ്റിയെന്ന പരാതിയിൽ വൻതുക പിഴയൊടുക്കാൻ പ്രമുഖ ഓൺലൈൻ ഭക്ഷണ വിതരണ കമ്പനിയായ ഡോർഡാഷ് (DoorDash). ന്യൂയോർക്ക് സിറ്റിയിലെ റെഗുലേറ്റർമാരുമായുള്ള ഒത്തുതീർപ്പിന്റെ ഭാഗമായി കമ്പനി 99 മില്യൺ പൗണ്ട് നൽകാൻ സമ്മതിച്ചു. തൊഴിലാളികൾക്ക് കൃത്യസമയത്ത് വേതനം നൽകുന്നതിലും അർഹമായ തുക നൽകുന്നതിലും വീഴ്ച പറ്റിയതായി ഡോർഡാഷ് പരസ്യമായി സമ്മതിച്ചു. തങ്ങളുടെ ഭാഗത്തുനിന്ന് വീഴ്ച സംഭവിച്ചെന്നും ചില ഡാഷർമാർക്ക് കുറഞ്ഞ കൂലി ലഭിക്കുകയോ വേതനം വൈകി ലഭിക്കുകയോ ചെയ്തതായി കമ്പനി പ്രതികരിച്ചു.
ഡെലിവറികൾക്കായി ഓർഡറുകൾ കാത്തിരിക്കുന്ന സമയത്തെ വേതന കണക്കുകൂട്ടലുമായി ബന്ധപ്പെട്ട തർക്കമാണ് സെറ്റിൽമെന്റിലൂടെ പ്രധാനമായും പരിഹരിച്ചത്. ഇതിനായി മാറ്റിവെച്ച 8.3 കോടി ഡോളറാണ് സെറ്റിൽമെന്റ് തുകയുടെ ഭൂരിഭാഗവും. ഡെലിവറി സമയത്ത് ആപ്പിൽ ഓൺലൈനായിരിക്കുന്ന മുഴുവൻ സമയത്തിനും വേതനം നൽകണമെന്നാണ് ന്യൂയോർക്കിലെ നിയമം. എന്നാൽ, ഓർഡറുകൾക്കിടയിലെ കാത്തിരിപ്പ് സമയത്തിന് കൂലി നൽകുന്നതുമായി ബന്ധപ്പെട്ട തർക്കം വലിയ ചർച്ചയായിരുന്നു.
2023-ൽ നടപ്പാക്കിയ മിനിമം വേതന നിയമത്തിലെ സങ്കീർണതകളാണ് പ്രശ്നങ്ങൾക്ക് കാരണമെന്ന് സാൻ ഫ്രാൻസിസ്കോ ആസ്ഥാനമായുള്ള ഡോർഡാഷ് വിശദീകരിച്ചു. സാങ്കേതിക തകരാറുകളും മൾട്ടി-സ്റ്റെപ്പ് ഡെലിവറി റൂട്ടുകളും കാരണം തൊഴിലാളികൾക്ക് കുറഞ്ഞ വേതനം ലഭിക്കുകയോ വേതനം വൈകുകയോ ചെയ്തതായി കമ്പനി അറിയിച്ചു. ഉദ്ദേശിച്ചല്ല ഈ വീഴ്ചകൾ സംഭവിച്ചതെങ്കിലും അവ ന്യായീകരിക്കാനാവില്ലെന്നും കമ്പനി വ്യക്തമാക്കി.
ഏകദേശം 2.64 ലക്ഷം തൊഴിലാളികളെയാണ് ഈ പിഴവുകൾ ബാധിച്ചത്. ഇതിൽ 66 ലക്ഷം ഡോളറിന്റെ വേതനം തൊഴിലാളികൾക്ക് പൂർണമായും നഷ്ടപ്പെടുകയും 57 ലക്ഷം ഡോളർ വൈകിയാണ് ലഭിക്കുകയും ചെയ്തത്. പ്രശ്നങ്ങൾക്ക് കാരണമായ സോഫ്റ്റ്വെയർ തകരാറുകൾ പരിഹരിച്ചതായും കമ്പനി അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
