ഓട്ടവ: ജനപ്രിയ ബ്രാൻഡിന്റെ പേരിൽ വിപണിയിലെത്തിയ വ്യാജ ലേസർ ഹെയർ റിമൂവൽ മെഷീനുകൾക്കെതിരെ ഹെൽത്ത് കാനഡയുടെ ജാഗ്രതാ മുന്നറിയിപ്പ്. കാനഡയിലെ വിവിധ ക്ലിനിക്കുകളിൽ ഉപയോഗിക്കുന്ന ‘സോപ്രാനോ’ ബ്രാൻഡ് ഡയോഡ് ലേസർ ഹെയർ റിമൂവൽ, തെറാപ്പി സിസ്റ്റങ്ങൾ അനധികൃതവും വ്യാജവുമാണെന്ന് കണ്ടെത്തിയതിനെ തുടർന്നാണിത്. പരിശോധിക്കപ്പെടാത്ത ഇത്തരം ഉപകരണങ്ങളുടെ ഉപയോഗം ഗുരുതരമായ ആരോഗ്യ അപകടങ്ങൾ സൃഷ്ടിച്ചേക്കാമെന്നാണ് മുന്നറിയിപ്പ്.
‘ആൽമ ലേസേഴ്സ് ലിമിറ്റഡ്’ നിർമ്മിക്കുന്ന യഥാർത്ഥ സോപ്രാനോ ഉപകരണങ്ങൾക്ക് പകരം ‘ബെയ്ജിംഗ് പെർഫെക്റ്റ് ലേസർ ടെക്നോളജി കമ്പനി ലിമിറ്റഡ്’ എന്ന ചൈനീസ് കമ്പനിയുടെ പേരിലുള്ള ഉപകരണങ്ങളാണ് വിറ്റഴിക്കപ്പെട്ടിരിക്കുന്നത്. വ്യാജ മെഡിക്കൽ ഡിവൈസ് ലൈസൻസ് നിർമ്മിച്ച്, സർക്കാർ അംഗീകാരമുള്ള ഉപകരണങ്ങളാണെന്ന് തെറ്റിദ്ധരിപ്പിച്ചാണ് കാനഡയിലുടനീളമുള്ള ക്ലിനിക്കുകളിലേക്ക് കമ്പനി ഇവ വിറ്റഴിച്ചത്.
Also Read: സെപ്റ്റംബർ 23 മുതൽ 29 വരെ! കാനഡയിലെ 10 പ്രധാന ആനുകൂല്യങ്ങൾ ഉടൻ അക്കൗണ്ടുകളിലേക്ക്
കാനഡയിൽ നിയമവിരുദ്ധമായ ഇത്തരം ഉപകരണങ്ങൾ ഉപയോഗിക്കുന്നതിൽ നിന്ന് ക്ലിനിക്കുകൾ ഉടനടി പിന്തിരിയണമെന്നും അവ സുരക്ഷിതമായി നശിപ്പിച്ചു കളയണമെന്നും അധികൃതർ നിർദ്ദേശിച്ചു. സോപ്രാനോ മെഷീനുകൾ വാങ്ങുമ്പോഴോ ഉപയോഗിക്കുമ്പോഴോ അതിലെ നിർമ്മാതാവിന്റെ പേരും മോഡൽ നമ്പറും ഹെൽത്ത് കാനഡയുടെ ഔദ്യോഗിക ലൈസൻസ് ലിസ്റ്റുമായി ഒത്തുനോക്കി ഉറപ്പുവരുത്തണം. കൂടാതെ, ലേസർ ചികിത്സയ്ക്ക് ശേഷം അമിതമായ വേദന, ചർമ്മം ചുവന്നു തടുക്കൽ, വീക്കം തുടങ്ങിയ ബുദ്ധിമുട്ടുകൾ അനുഭവപ്പെടുന്ന രോഗികൾ ഉടനടി ആരോഗ്യ വിദഗ്ധരുടെ സേവനം തേടാനും പാർശ്വഫലങ്ങൾ ഹെൽത്ത് കാനഡയെ അറിയിക്കാനും നിർദ്ദേശമുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
