ദുബായ്: യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ സഹോദരൻ ശൈഖ് അഹമ്മദ് ബിൻ റാഷിദ് അൽ മക്തൂം അന്തരിച്ചു. തിങ്കളാഴ്ച രാവിലെയായിരുന്നു അദ്ദേഹത്തിന്റെ വിയോഗം. ദുബായ് മീഡിയ ഓഫീസാണ് നിര്യാണ വാർത്ത ഔദ്യോഗികമായി പുറത്തുവിട്ടത്. തിങ്കളാഴ്ച മുതൽ ദുബായിൽ 10 ദിവസത്തെ ഔദ്യോഗിക ദുഃഖാചരണവും പ്രഖ്യാപിച്ചിട്ടുണ്ട്. ദുഃഖാചരണത്തിന്റെ ഭാഗമായി എമിറേറ്റിലുടനീളം ദേശീയപതാക പകുതി താഴ്ത്തിക്കെട്ടും.
പ്രിയ സഹോദരന്റെ വിയോഗത്തിൽ ശൈഖ് മുഹമ്മദ് ബിൻ റാഷിദ് അൽ മക്തൂം സോഷ്യൽ മീഡിയയിലൂടെ അഗാധമായ ദുഃഖം രേഖപ്പെടുത്തി. “സഹോദരാ, അല്ലാഹു നിങ്ങളോട് കരുണ കാണിക്കട്ടെ. നിങ്ങൾ ഞങ്ങളുടെ കണ്ണുകളിൽ നിന്ന് മറഞ്ഞെങ്കിലും ഞങ്ങളുടെ പ്രാർത്ഥനകളിലും ഹൃദയങ്ങളിലും എന്നും ജീവിക്കും” എന്ന് അദ്ദേഹം കുറിച്ചു. 10 ദിവസത്തെ ദുഃഖാചരണ കാലയളവിൽ സർക്കാർ സ്ഥാപനങ്ങളിലും പൊതുയിടങ്ങളിലും ഔദ്യോഗിക പതാകകൾ പകുതി താഴ്ത്തിക്കെട്ടുന്നതാണ്.
ശൈഖ് അഹമ്മദ് ബിൻ റാഷിദ് അൽ മക്തൂമിന്റെ നിര്യാണത്തിൽ യുഎഇയിലെ വിവിധ ഭരണാധികാരികളും പ്രമുഖരും അനുശോചനം രേഖപ്പെടുത്തി. രാജ്യത്തിനായി നൽകിയ സേവനങ്ങളും സംഭാവനകളും സ്മരിച്ചുകൊണ്ടുള്ള അനുശോചന സന്ദേശങ്ങൾ സമൂഹത്തിന്റെ വിവിധ കേന്ദ്രങ്ങളിൽ നിന്ന് ഒഴുകിയെത്തിക്കൊണ്ടിരിക്കുകയാണ്. എമിറേറ്റിലെ പ്രധാന ഔദ്യോഗിക ചടങ്ങുകളും മറ്റും ഈ ദുഃഖാചരണത്തിന് അനുസൃതമായി മാറ്റം വരുത്തിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
