വാഷിംഗ്ടൺ: ജെറ്റ് ഇന്ധനവില ഉയർന്നതോടെ ലാഭം കുറഞ്ഞ വിമാന സർവീസുകൾ വെട്ടിക്കുറയ്ക്കാൻ പ്രമുഖ വിമാനക്കമ്പനികൾ തീരുമാനിച്ചു. അമേരിക്കൻ എയർലൈൻസ്, യുണൈറ്റഡ്, സൗത്ത് വെസ്റ്റ് എന്നീ പ്രധാന കമ്പനികളാണ് ഈ നീക്കത്തിന് പിന്നിൽ. ഇന്ധനച്ചെലവ് ക്രമാതീതമായി ഉയർന്ന സാഹചര്യത്തിൽ കമ്പനികളുടെ നഷ്ടം ഒഴിവാക്കാനാണ് സർവീസുകൾ കുറയ്ക്കുന്നത്. ടിക്കറ്റ് നിരക്കുകൾ ഉയർന്നതാണെങ്കിലും യാത്രക്കാരുടെ എണ്ണത്തിൽ ഇപ്പോഴും വലിയ കുറവൊന്നുമില്ലെന്ന് വിമാനക്കമ്പനികൾ വ്യക്തമാക്കുന്നു.
തിരക്ക് കുറഞ്ഞ ചൊവ്വ, ശനി ദിവസങ്ങളിലെ സർവീസുകളും, പാതിരാത്രിയിലെയോ പുലർച്ചെയോ ഉള്ള വിമാനങ്ങളുമാണ് പ്രധാനമായും നിർത്തിവെക്കുന്നത്. കുറഞ്ഞ നിരക്കിൽ യാത്ര വാഗ്ദാനം ചെയ്തിരുന്ന സ്പിരിറ്റ് എയർലൈൻസ് പ്രവർത്തനം നിർത്തിയതും, മറ്റ് കമ്പനികൾ കൂടുതൽ പണം ലഭിക്കുന്ന പ്രീമിയം സേവനങ്ങളിലേക്ക് മാറുന്നതും സാധാരണക്കാരായ യാത്രക്കാരെ കാര്യമായി ബാധിക്കും. കഴിഞ്ഞ വർഷത്തെ അപേക്ഷിച്ച് വിമാന ടിക്കറ്റ് നിരക്കിൽ ഇപ്പോൾ തന്നെ 25 ശതമാനം വരെ വർധനവുണ്ടായിട്ടുണ്ട്. ഇനി കുറഞ്ഞ നിരക്കിലുള്ള ടിക്കറ്റുകൾ കണ്ടെത്തുക പ്രയാസകരമാകും.
Also Read : കാനഡയിലെ പ്രേക്ഷകരിലേക്ക് ഇനി ‘തുടക്കം’; കാണാം ജിയോ ഹോട്ട്സ്റ്റാറിൽ
അന്താരാഷ്ട്രതലത്തിലെ യുദ്ധ സാഹചര്യങ്ങളാണ് ഇന്ധനവില വർധിക്കാൻ പ്രധാന കാരണം. കഴിഞ്ഞ ഏപ്രിൽ മുതൽ ജൂൺ വരെയുള്ള മാസങ്ങളിൽ എയർലൈനുകൾ ഇന്ധനത്തിനായി മുൻവർഷത്തേക്കാൾ 80 ശതമാനം വരെ കൂടുതൽ തുകയാണ് ചെലവഴിച്ചത്. നിലവിൽ ഒരു ഗാലൺ ജെറ്റ് ഇന്ധനത്തിന് 4.56 ഡോളറോളമാണ് വില. ഇന്ധനവില വർധിച്ചതിന് പുറമെ, വിമാനത്തിൽ യാത്ര ചെയ്യാൻ ആളുകൾ കൂടുതലായി എത്തുന്നത് ഉയർന്ന ടിക്കറ്റ് നിരക്കിന് മറ്റൊരു കാരണമായി കമ്പനികൾ ചൂണ്ടിക്കാണിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
