കാനഡ: ഓൺലൈൻ വഴി അനധികൃതമായി കഞ്ചാവ് വിൽപന നടത്തിവന്ന വൻ സംഘത്തെ കാനഡയിൽ പോലീസ് പിടികൂടി. ഒന്റാറിയോയിലെ വിൻഡ്സറിൽ പ്രവർത്തിച്ചിരുന്ന ‘420 ഹൈവേ’ എന്ന ഓൺലൈൻ നെറ്റ്വർക്കാണ് ഒന്റാറിയോ പ്രൊവിൻഷ്യൽ പോലീസും (OPP) വിൻഡ്സർ പോലീസും ചേർന്ന് പൂട്ടിച്ചത്. കേസിൽ നാല് പേരെ പോലീസ് അറസ്റ്റ് ചെയ്തു.
സർക്കാർ അനുമതിയില്ലാതെ വിൻഡ്സറിലെ വിവിധ സ്ഥലങ്ങൾ കേന്ദ്രീകരിച്ചായിരുന്നു ഇവരുടെ കച്ചവടം. ജൂലൈയിൽ ആരംഭിച്ച രഹസ്യ അന്വേഷണത്തിനൊടുവിൽ, സെപ്റ്റംബർ 2-നാണ് പോലീസ് തിരച്ചിൽ ശക്തമാക്കിയത്. നഗരത്തിലെ രണ്ട് വീടുകളിലും ഒരു ഗോഡൗണിലും ഒരേസമയം നടത്തിയ മിന്നൽ പരിശോധനയിലാണ് പ്രതികൾ പിടിയിലായത്.
Also Read: പേരും നമ്പറും മതി; തൊഴിലാളികളുടെ സർട്ടിഫിക്കേഷൻ ഇനി എളുപ്പത്തിൽ പരിശോധിക്കാം
പരിശോധനയിൽ ഉണക്കിയ കഞ്ചാവ്, ഹാഷിഷ്, ലഹരി അടങ്ങിയ മിഠായികളും ഭക്ഷണ സാധനങ്ങളും, വേപ്പ് (Vape) ഉൽപ്പന്നങ്ങൾ, വ്യാജ പുകയില എന്നിവ പോലീസ് കണ്ടെടുത്തു. കൂടാതെ ഇവ പാക്ക് ചെയ്യാനുള്ള മെഷീനുകളും 24,000 കനേഡിയൻ ഡോളറും കസ്റ്റഡിയിലെടുത്തിട്ടുണ്ട്. പിടിച്ചെടുത്ത സാധനങ്ങൾക്ക് വിപണിയിൽ 3.66 ലക്ഷത്തിലധികം കനേഡിയൻ ഡോളർ (ഏകദേശം 2.25 കോടി ഇന്ത്യൻ രൂപ) വിലവരുമെന്ന് പോലീസ് പറഞ്ഞു.
സാർണിയ സ്വദേശിയായ 28-കാരനും വിൻഡ്സർ സ്വദേശികളായ മൂന്ന് പേർക്കുമാണ് (42, 57, 41 വയസ്സ്) എതിരെ കേസ്സെടുത്തിരിക്കുന്നത്. ഇവർക്കെതിരെ മയക്കുമരുന്ന് നിരോധന നിയമപ്രകാരം ഗുരുതരമായ വകുപ്പുകൾ ചുമത്തിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
