ന്യൂഡൽഹി: ഇന്ത്യയും കാനഡയും തമ്മിൽ നിർദ്ദേശിക്കപ്പെട്ട സമഗ്ര സാമ്പത്തിക പങ്കാളിത്ത കരാറിന്റെ (CEPA) നാലാം ഘട്ട ചർച്ചകൾ ന്യൂഡൽഹിയിൽ ആരംഭിച്ചു. ഈ വർഷം തന്നെ ചർച്ചകൾ പൂർത്തിയാക്കുക എന്ന ലക്ഷ്യത്തോടെയാണ് സെപ്റ്റംബർ 14 മുതൽ 18 വരെ നീളുന്ന അഞ്ച് ദിവസത്തെ ചർച്ചകൾ സംഘടിപ്പിച്ചിരിക്കുന്നത്. മുൻപത്തെ മൂന്നാം ഘട്ട ചർച്ചകൾ ജൂലൈയിൽ ഓട്ടവയിലാണ് നടന്നത്. ചരക്ക്-സേവന വ്യാപാരം, ഉത്ഭവ നിയമാവലികൾ, സാങ്കേതിക വ്യാപാര തടസ്സങ്ങൾ തുടങ്ങിയ വിഷയങ്ങളാണ് പ്രധാനമായും ചർച്ച ചെയ്യുന്നത്.
2030-ഓടെ ഉഭയകക്ഷി വ്യാപാരം 50 ബില്യൺ ഡോളറായി ഉയർത്തുക എന്നതാണ് ഇരുരാജ്യങ്ങളുടെയും പ്രധാന ലക്ഷ്യം. 2024-25 ൽ 8.66 ബില്യൺ ഡോളറായിരുന്ന രണ്ട് വഴി വ്യാപാരം 2025-26 ൽ 8.22 ശതമാനം ഇടിഞ്ഞ് 7.95 ബില്യൺ ഡോളറായി കുറഞ്ഞിരുന്നു. ഇതിൽ 4.67 ബില്യൺ ഡോളർ ഇന്ത്യൻ കയറ്റുമതിയും 3.28 ബില്യൺ ഡോളർ ഇറക്കുമതിയുമാണ്.
Also Read: ഐസ്ക്രീം മുതൽ പ്രതിരോധ മേഖല വരെ; താരിഫിനിടയിലും കാനഡയിൽ തദ്ദേശീയ വ്യവസായങ്ങൾക്ക് മുന്നേറ്റം
ഇന്ത്യയിൽ നിന്ന് പ്രധാനമായും മരുന്നുകൾ, ഇരുമ്പ്-ഉരുക്ക്, കടൽവിഭവങ്ങൾ, കോട്ടൺ വസ്ത്രങ്ങൾ, ഇലക്ട്രോണിക്സ്, കെമിക്കലുകൾ, ടെലികോം, വിവരസാങ്കേതിക സേവനങ്ങൾ എന്നിവ കാനഡയിലേക്ക് കയറ്റി അയക്കുമ്പോൾ കാനഡയിൽ നിന്ന് പയറുവർഗ്ഗങ്ങൾ, രത്നങ്ങൾ, കൽക്കരി, വളം, പേപ്പർ, ക്രൂഡ് ഓയിൽ എന്നിവയാണ് ഇന്ത്യ ഇറക്കുമതി ചെയ്യുന്നത്. നിലവിൽ നാലേകാൽ ലക്ഷത്തിലധികം ഇന്ത്യൻ വിദ്യാർത്ഥികളും ശക്തമായ ഒരു ഇന്ത്യൻ സമൂഹവും വസിക്കുന്ന കാനഡയുമായുള്ള ബന്ധം സാധാരണ നിലയിലേക്ക് തിരികെ വരുന്നു എന്നതിന്റെ തെളിവുകൂടിയാണ് ഈ ചർച്ചകൾ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
