അബോട്ട്സ്ഫോർഡ്: ബ്രിട്ടീഷ് കൊളംബിയയിലുള്ള അബോട്ട്സ്ഫോർഡിൽ അമിതവേഗതയിൽ വാഹനമോടിച്ച 65-കാരന് പൊലീസ് വൻ തുക പിഴ ചുമത്തി. വ്യാഴാഴ്ച രാവിലെ 10 മണിയോടെ കിംഗ് റോഡും ബ്രാഡ്നർ റോഡും ചേരുന്ന ഭാഗത്തായിരുന്നു സംഭവം നടന്നത്. ശുചിമുറിയിൽ എത്താനുള്ള ധൃതിയിലാണ് വാഹനം വേഗത്തിൽ ഓടിച്ചതെന്നാണ് ഡ്രൈവർ നൽകിയ വിശദീകരണം. അബോട്ട്സ്ഫോർഡ് പൊലീസ് വകുപ്പാണ് സോഷ്യൽ മീഡിയ പോസ്റ്റിലൂടെ ഈ വിവരം പുറത്തുവിട്ടത്.
റോഡിലെ നിർമാണ പ്രവർത്തനങ്ങൾ നടക്കുന്ന മേഖലയിൽ വേഗപരിശോധന നടത്തുകയായിരുന്ന ട്രാഫിക് ഉദ്യോഗസ്ഥനാണ് നിയമലംഘനം കണ്ടെത്തിയത്. മണിക്കൂറിൽ 50 കിലോമീറ്റർ വേഗപരിധിയുള്ള റോഡിലൂടെ 98 കിലോമീറ്റർ വേഗതയിലാണ് വാഹനം സഞ്ചരിച്ചിരുന്നത്. വാഹനം തൊട്ടടുത്തുള്ള സ്കൂൾ സോണിലേക്ക് പ്രവേശിക്കുന്നതിന് തൊട്ടുമുമ്പ് ഉദ്യോഗസ്ഥൻ തടഞ്ഞതിനാൽ വൻ അപകടം ഒഴിവായി.
അമിതവേഗതയ്ക്ക് ഡ്രൈവർക്ക് ടിക്കറ്റ് നൽകിയതിനൊപ്പം വാഹനം ഏഴ് ദിവസത്തേക്ക് പൊലീസ് പിടിച്ചെടുത്തു. മോട്ടോർ വെഹിക്കിൾ ആക്ട് പ്രകാരം നിശ്ചിത വേഗപരിധിയേക്കാൾ 40 കിലോമീറ്ററിൽ കൂടുതൽ വേഗതയിൽ സഞ്ചരിക്കുന്നത് കടുത്ത കുറ്റമാണ്. കുറ്റക്കാർക്ക് 368 മുതൽ 483 ഡോളർ വരെ പിഴയും ഡ്രൈവിംഗ് റെക്കോർഡിൽ മൂന്ന് പെനാൽറ്റി പോയിന്റും ലഭിക്കും.
Also Read: കുറ്റകൃത്യങ്ങൾ കുറഞ്ഞെങ്കിലും ഭയം മാറാതെ വിന്നിപെഗ്; പൊലീസിന്റെ കാൽനട പട്രോളിംഗ് ശക്തമാക്കുന്നു
മറ്റുള്ളവരുടെ സുരക്ഷ അപകടത്തിലാക്കുന്ന തരത്തിലുള്ള വേഗതയ്ക്ക് ഒരു ന്യായീകരണവുമില്ലെന്ന് അബോട്ട്സ്ഫോർഡ് പൊലീസ് വ്യക്തമാക്കി. സ്കൂൾ സോണുകളിലെ വേഗപരിധി പാലിക്കേണ്ടത് കുട്ടികളുടെയും കാൽനടയാത്രക്കാരുടെയും സുരക്ഷയ്ക്ക് അത്യന്താപേക്ഷിതമാണ്. പ്രദേശത്ത് അമിതവേഗത്തിന് ഈ വർഷം ഇതുവരെ 329 വാഹനങ്ങൾ പിടിച്ചെടുത്തിട്ടുണ്ടെന്നും അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
