വൻകൂവർ: പ്രൊഫഷണൽ പ്രവർത്തനങ്ങളുമായി ബന്ധപ്പെട്ട ലൈസൻസ് നിബന്ധനകൾ ലംഘിച്ചതിനെ തുടർന്ന് ബ്രിട്ടീഷ് കൊളംബിയയിലെ നഴ്സിന്റെ ലൈസൻസ് നാല് ആഴ്ചത്തേക്ക് സസ്പെൻഡ് ചെയ്തു. ബി.സി. കോളേജ് ഓഫ് നഴ്സസ് ആൻഡ് മിഡ്വൈവ്സ് (BCCNM) നടത്തിയ അന്വേഷണത്തിലാണ് മുൻപ് റെഗുലേറ്റർ ഏർപ്പെടുത്തിയ കർശന നിബന്ധനകൾ നഴ്സ് ലംഘിച്ചതായി കണ്ടെത്തിയത്. പൊതുജനങ്ങളുടെ ആരോഗ്യ സുരക്ഷ ഉറപ്പാക്കുന്നതിന്റെ ഭാഗമായി സെപ്റ്റംബർ 8 മുതലാണ് സസ്പെൻഷൻ നടപടി പ്രാബല്യത്തിൽ വന്നത്.
2025 നവംബറിൽ അഞ്ച് ദിവസത്തെ സസ്പെൻഷൻ നിലനിൽക്കെ, മറ്റൊരു തൊഴിലുടമയുടെ കീഴിൽ അധിക ജോലി ചെയ്ത വിവരവും സസ്പെൻഷൻ വിവരവും മറച്ചുവെച്ചതാണ് പ്രധാന ലംഘനമായി റെഗുലേറ്റർ ചൂണ്ടിക്കാണിക്കുന്നത്. നിശ്ചിത സമയത്തിൽ കൂടുതൽ ജോലി ചെയ്യരുത്, രാത്രി ഷിഫ്റ്റുകളിൽ മേൽനോട്ടമില്ലാതെ സേവനം അനുഷ്ഠിക്കരുത്, ഗുരുതര രോഗികൾക്ക് മരുന്നുകൾ നൽകരുത് തുടങ്ങിയ പ്രധാന നിർദ്ദേശങ്ങളും ഇവർ ലംഘിച്ചു. തനിക്കുണ്ടായ വ്യക്തിപരമായ ബുദ്ധിമുട്ടുകൾ കാരണമാണ് വീഴ്ച സംഭവിച്ചതെന്നും ചെയ്ത പ്രവർത്തിയിൽ ഖേദിക്കുന്നുവെന്നും ഡോഡ്വെൽ വ്യക്തമാക്കിയതായി BCCNM അറിയിച്ചു.
Also Read: ഡ്രൈവിങ് ലൈസൻസ് പുതുക്കുന്നവർക്ക് ആശ്വാസം: നിബന്ധനകളിൽ മാറ്റവുമായി ആൽബർട്ട
2023 ഡിസംബർ മുതൽ 2024 മെയ് വരെയുള്ള കാലയളവിൽ മരുന്ന് നൽകൽ, വിവരങ്ങൾ രേഖപ്പെടുത്തൽ, പ്രൊഫഷണൽ ആശയവിനിമയം എന്നിവയിൽ വീഴ്ച വരുത്തിയതിനെ തുടർന്നാണ് മുൻപ് ഇവർക്കെതിരെ ആദ്യഘട്ട നടപടി സ്വീകരിച്ചത്. അന്ന് അഞ്ച് ദിവസത്തെ സസ്പെൻഷനും പ്രത്യേക പരിശീലനവും പൂർത്തിയാക്കാൻ നിർദ്ദേശിച്ചിരുന്നു. എന്നാൽ ഈ നിബന്ധനകൾ ലംഘിച്ച് നഴ്സും റെഗുലേറ്ററും തമ്മിലുള്ള വിശ്വാസബന്ധം തകർത്ത സാഹചര്യത്തിലാണ് നാല് ആഴ്ചത്തെ പുതിയ സസ്പെൻഷൻ ഏർപ്പെടുത്തിയത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
