ഓട്ടവ : കാനഡ സന്ദർശനത്തിനായി ഉക്രേനിയൻ പ്രസിഡന്റ് വ്ലോഡിമിർ സെലെൻസ്കി കാൽഗറിയിലെത്തി. പ്രധാനമന്ത്രി മാർക്ക് കാർണിയുമായി അദ്ദേഹം കൂടിക്കാഴ്ച നടത്തും. ഇന്ന് രാവിലെ കാൽഗറിയിൽ വെച്ചാണ് ഇരുവരുടെയും ഔദ്യോഗിക ചർച്ചകൾ നടക്കുന്നത്. തുടർന്ന് ബാൻഫ് നഗരത്തിൽ നടക്കുന്ന മന്ത്രിസഭാ യോഗത്തിലും സെലെൻസ്കി അഭിസംബോധന ചെയ്ത് സംസാരിക്കും.
പ്രതിരോധം, സാമ്പത്തികം, ഊർജ്ജ മേഖലകളിലെ സഹകരണം തുടങ്ങിയ ഇരു രാജ്യങ്ങളുടെയും പരസ്പര താൽപ്പര്യമുള്ള വിഷയങ്ങൾ ചർച്ചയിൽ വരുമെന്ന് പ്രധാമന്ത്രി മാർക്ക് കാർണി വ്യക്തമാക്കി. റഷ്യയുടെ യുദ്ധം കാരണം ഉക്രെയ്ന് ഏറ്റ മനുഷ്യനാശവും കാനഡയും ഉക്രെയ്നും തമ്മിലുള്ള ജനങ്ങൾ തമ്മിലുള്ള ബന്ധവും ചർച്ചയിൽ വിഷയമാകും. ഉക്രെയ്ന്റെ പ്രതിരോധത്തിനും പുനർനിർമ്മാണത്തിനും കാനഡ നൽകുന്ന പിന്തുണ തുടരുമെന്നും അദ്ദേഹം കൂട്ടിച്ചേർത്തു.
സെലെൻസ്കിക്കൊപ്പം ഭാര്യ ഒലീന സെലെൻസ്കിയും കാനഡയിലെത്തിയിട്ടുണ്ട്. കാൽഗറി സന്ദർശനത്തിന് ശേഷം ടൊറന്റോ, നോർത്ത് ബേ എന്നിവിടങ്ങളും സന്ദർശിക്കുന്ന ഇവർ വെള്ളിയാഴ്ച കാനഡയിൽ നിന്ന് മടങ്ങും. ഈ വർഷം സെലെൻസ്കി നടത്തുന്ന ആദ്യ കാനഡ സന്ദർശനമാണിത്. കഴിഞ്ഞ ഡിസംബറിലാണ് അദ്ദേഹം അവസാനമായി ഹാലിഫാക്സ് സന്ദർശിച്ചത്. 2022-ലെ റഷ്യൻ അധിനിവേശത്തിന് ശേഷം കാനഡ ഇതുവരെ 6.5 ബില്യൺ ഡോളറിന്റെ സൈനിക സഹായമാണ് ഉക്രെയ്ന് പ്രഖ്യാപിച്ചിട്ടുള്ളത്.
കടുത്ത വ്യോമാക്രമണങ്ങളെ നേരിടുന്ന ഉക്രെയ്ൻ സഖ്യകക്ഷികളുടെ കൂടുതൽ പ്രതിരോധ സഹായങ്ങൾ തേടുന്നുണ്ട്. ഇതിനിടയിൽ ഉക്രെയ്നിൽ രാഷ്ട്രീയപരമായ സമ്മർദ്ദങ്ങളും വർധിച്ചുവരുന്നുണ്ട്. യുദ്ധകാലത്തെ ഭരണഘടനയുടെ അടിസ്ഥാനത്തിൽ തെരഞ്ഞെടുപ്പുകൾ നടത്താൻ കഴിയാത്ത സാഹചര്യം നിലനിൽക്കെ, ചില അഴിമതി ആരോപണങ്ങളും വിമർശനങ്ങളും സെലെൻസ്കി നേരിടുന്നുണ്ട്. എങ്കിലും അന്താരാഷ്ട്ര വേദികളിൽ ഉക്രെയ്ന്റെ പരമാധികാരത്തിനായി കാനഡ ഉറച്ചുനിൽക്കുന്നു.
റഷ്യൻ യുദ്ധത്തടവുകാരുടെയും തട്ടിക്കൊണ്ടുപോയ ഉക്രേനിയൻ കുട്ടികളുടെയും തിരിച്ചുവരവിനായി ഈ മാസം ടൊറന്റോയിൽ നടക്കുന്ന ഉച്ചകോടിക്കും കാനഡ ആതിഥേയത്വം വഹിക്കുന്നുണ്ട്. കനേഡിയൻ വിദേശകാര്യ മന്ത്രി അനിത ആനന്ദാണ് ഈ ഉച്ചകോടിയുടെ സഹ-ആതിഥേയത്വം വഹിക്കുന്നത്. ആഗോളതലത്തിൽ ഉക്രെയ്ന് ഏറ്റവും കൂടുതൽ സഹായം നൽകുന്ന രാജ്യങ്ങളിൽ പന്ത്രണ്ടാം സ്ഥാനത്താണ് കാനഡ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
